Read Southern Rengma Naga 1 SAMUEL 18 Bible Online

1 SAMUEL 18 - Southern Rengma Naga bible

1 SAMUEL 18

¹Saul lo David au le kenthon thüla. Tsüsiki Saul nyugü Jonathan le David shwi pe a-kenyüri tsinla, tson-o a-npvü a-keso hontse David so lola.

²sünyü gerho Saul le David zenlo lao no a-kaki rani gun mvula.

³Jonathan le David so sa kela genyu kethonthen au kepvüshe titse swela.

⁴A-le ben kehü a-phi yhünshü, a-terikanyü, zhethon, levü lo senkephin tse khipe David tsüla.

⁵David le Saul le a-nikeshü a-tha aphu nyu thathyü pe gwakü, ts"genyu Saul le a-khipe rihü dan so kedanyu nme thyüshü. Hile Saul hensin nyu kedanyu ju lo temi aphu a-kenyü küla.

⁶David le Goliath boshvu kela siki a-le shüpahü nyu dan zen-o kaki raniryü kejü ka Israel nyu rünyi aphu ka tenunyu dan le Raja Saul le teno titse chwiryü. Anyugun le tambourin lo lyre sen shekerhün thyü lüthyü lo dathyü.

⁷Anyugun le lüron-o, “Saul le yie yie dushvula, ai David we yie yie tseryü dushvula,” tsonshü.

⁸Saul le hile a-kenyü mvuo a-nyunta sa lola. A-le zoshü, “Anyugun le David le yie yie tseryü letse, ai a we yie yie nti letse. Anyugun le a-khipe hisigü ka raja thyü tiya bin nyo!”

⁹Tson-o tsügerho a-le David shwi a-yhüthyü lo rüchün nshvu lola.

¹⁰Tsüsinyü Sunggigü le gwakemvu kapu nishüo no whütse Saul gen ryüla, lo a-le a-kanyu kennunyu nme hontse jozo bin. David le khenyütsen thyü kehü hontse harp khunbin, lo Saul le mi nme senhü.

¹¹Saul le, “Ale a-shwen pe kabon nsü lati.” tse rüchün-o gwenhvu ge a-mi shweshü; ai gwenhvu ge nren David le pha la.

¹²Saul le David nshvula, Npugü le a-khe lao David zenhü kela genyu.

¹³Tsügenyu Saul le a-lope yie sakedanyu nme thyüo a-nishwila. David le a-temi dan zen-o terinyu gü

¹⁴lo Npugü le a-zenkehü genyu a-le nyuthyüyo tsü aphu ka gwalo.

¹⁵David tho kegwa sha shüo Saul le David nshvu kvula.

¹⁶Ai Israel lo Juda aphu David solo la, a-le sharhi kegwa nme genyu.

¹⁷Tsüselo Saul le David ka zoshü, “Anyuri gü Merab le hika bin nyo. Nle pecheo alothyü lo shüpahü kegwa nme thyüo Npugü genyu terithyü yatselo a-pe nno nnu thyüti.” (Saul kerüchün le hihontse a-le mvule Filistian nyu no David dushvu kela ndo.)

¹⁸David le zoshü, “Ale segü lo akami le nyu kon letseo ale raja gü mvuthyülo tila?”

¹⁹Ai tsontseo gwenkho gü le ryü laryü Merab pe David tsümvuo pe Meholah nyu Adriel tsüla.

²⁰Saul nyugi Mikal le David zen keso lola, lo Saul kotsü nyülo-o a-kendo la.

²¹A-le a-npvü a-nthon-o, “Ale Mikal pe David tsüti; ale tsügi pe a-nsen-o Filistian nyu no a-ga lati.” Tson-o gwenhvu ge gü Saul le David ka zoshü, “Nno amvu thyüti.”

²²A-le a-hensin kedanyu no kebu-o David ka zoshü lotse ahza hoshü, “Raja güle nshwi a-kenyü lo a-hensin nyu kedanyu aphu nso bin nyo, ntsoka hile a-nyugi lolo kegwa ngenyu gwenkho kegwa nme le.”

²³Tson-o anyugun le hipe David ka zoshü, lo a-le anyugun jokenishü, “Raja nyu mvü thyülo titse kethyü tsüle kerühvu keda nme, a hontse kendi nyu lo lihikemvu nyu genyu tsüle gonri tsin.”

²⁴Kedanyu jule David le nyu zoyo pe Saul ka zoshü,

²⁵lo Saul le anyugun no David ka zoshü lotse ahza hoshü: “Raja güle shenhü gi min nka lonyü kebin güle a-shwikerüchün nyu ge a-khen zo-o Filistian nyu pechenyu tsime gi lonyü kebin gwenzin,” tsonshü. (Hile Saul le Filistian nyu no David dushvula titse ndo kethyü gwenzin.)

²⁶Saul hensin kedanyu jule Saul jo pe David ka zoshü, tsontsin David le raja gü mvü thyü titse kethyü tsü rüchün a-dyüny"n lola. Sunkethyü jon pen kemvu ka,

²⁷David lo a-temi dan le gü Filistian nyu tsihvu dushvula. A-le tsüdan girülo njüo raja gü mvü thyülo nrün genyu sen-o a-ki gü aphu swü pe a-tsüshü. Tsügenyu Saul le anyugi Mikal pe David no a-nu thyüla.

²⁸Saul le Npugü le David zen hü, lo a-nugi Mikal le a-sohü tse kethyü sha tsentsü lola.

²⁹Tson-o Saul le David nshvu kvula lo a-le rhün kebin then a-shwi kerüchün nyu thyü tinla.

³⁰Filistian nyu rihü dan le ryü terithyü hü, ai teri aphu ka Saul hensin kedanyu kecha aphu nyeki David le gwakvula la tse. Tsügenyu David le a-zan chwisa soryüla.