Read Southern Rengma Naga 1 SAMUEL 19 Bible Online

1 SAMUEL 19 - Southern Rengma Naga bible

1 SAMUEL 19

¹Saul le anyugü Jonathan lo a-hensin kedanyu aphu ka a-le David boshvukela nda bin nle tse zoshü. Ai Jonathan le David shwi a-kenyü ritsin,

²tsügenyu a-ka zoshü, “Apvü le nboshvu kela nda bin nyo. Tsügenyu lonyüki pütsü sao bin peha ka kebu tin lalo.

³Ale gü lowki nle kebu kebin bin ki apvü khoka so-o ale nrüla pe a-ka zoti. Tson-o ale tha lihi-e shalo lo pe nka zoshü ti.”

⁴Jonathan le David shwe pe Saul hio zoshü, “Kedagü, ngogü David ge a-zükemvu thyü nyalo. A-le nge a-zükemvu nme-e thyü mvu; tsügü mvule a-le tha aphu ka nkeche sa shühü.

⁵A-le a-keyhun-e tepen mvutse Goliath dushvu lao, Npugü le kvukelo keda pe Israel nyu tsüshü. Nle tsü hyushüo nkenyü la. Tsonya tselonyuthyüo nle a-kon nme kendi ka kemu kendi temi David dushvuo thyüzü lati tse rhi bin nla?”

⁶Saul le Jonathan khwenyüo a-le David dushvu loho tse Npugü zan nyu swela.

⁷Tsüselo Jonathan le David koshüo tha aphu pe a-ka zoshü, tson-o a-zenryü Saul kishüo, David le himhundyü hontse raja gü lothyü tinla.

⁸Tsüka Filistian nyu zen terithyüni soryüla. David le anyugun wheo anyu sokvu lola, tson-o tsüdan le tin bula.

⁹Khenyüme npugü le gwakemvu kapu no Saul ge ryüla. A-le mi nme sen-o a-kanyu bin, lo David le harp vü bin.

¹⁰Saul le a-mi pe David shwe pe kabon nsü kela ndoshü, ai David le pha lao a-mi le kabon shwela. David le tin chwilao nrhilo.

¹¹Tsüje Saul le temi peha nipe no David ka khwe tseo lonyü gü a-dushvula lotse shü, tsüselo David nu Mikal le a-ka, “Nle ntsoje tinla mvulo senduki sikelai, tsonshü.

¹²Mikal le kafüphe nyu David no chwi gü kebu tinla.

¹³Tson-o a-le teromen nme pe no ge shü, lo tenyü hü pekhün pe a-pe ka shüo phi pe henla.

¹⁴Tson-o Saul temi dan le David tenlo titse ryü ntsin Mikal le anyugun ka a-le hobin nle tsela.

¹⁵Ai Saul le anyugun no David shwishü lotse ni nishü. A-le ahza hoshüo, “A-no ge a-khipen-o hika ryülo, lo ale a-dushvu lati.”

¹⁶Anyugun le kanyu yü laryü no ge teromen le bin, lo a-pe ka tenyü hü pekhün le kebin hyulo.

¹⁷Saul le Mikal ketsoshü, “Nle nyuthyüo hihontse asalao ashwikerüchün nyu no kebu tinla hü nla?” Tsügi le a-jokenishü, “A-le ale a-keche shüo a-no kebu tinla mvuya tselo a dushvula titse zola le.”

¹⁸David le tinchwi lo-o gü Ramah ki Samuel ka Saul le a-ge thyükeshü tsü aphu zoshü. Tson-o Samuel au Naioth kigü tsünyu bin tinla.

¹⁹David le Naioth ki bin nle tse mele Saul ka zoshü,

²⁰tsügenyu a-le temi peha no a-ten lolo tse nishü. Anyugun le sidyükeshanyu ju me le Samuel no anyugun sharhi thyüo nyhun lo nra kebin hyulo. Tsüka Sunggigü kapu güle Saul temi dan geryüo anyugun ko nyhun lo nra sola.

²¹Saul le hinyü kelo ka, a-le temi nisin shü, lo anyugun ko nyhun lo nra sola. A-le gwenshen ge gü temi nishü, lo tsüdan ko a-keme thyüla.

²²Tsüselo ako a-npvü Ramah ki gütitse tsonchü shü. A-le Seku nyu zülvu kedagü tikelo ka Samuel lo David au le dika bin yo ketsoshü, tsontsin au le Naioth ka bin nle tse a-ka zoshü.

²³Tson-o a-le tsüki gü kejü ka, Sunggigü kapu le a-ge ko ryüo a-le tson then nyhun lo nrao Naioth ki gü.

²⁴A-le a-phi yhün lao Samuel mhundyü ka nyhun lo nra bin, tsünyü jon gwen lo tsüje khensin a-kenben bin.(Hihontseo mele,“Saul-e sidyükeshanyu nme thyüla se ole?” tse zo chwiryü.)