Read Southern Rengma Naga 1 SAMUEL 2 Bible Online

1 SAMUEL 2 - Southern Rengma Naga bible

1 SAMUEL 2

¹Hannah le kehithyü shü: “Npugü le shekerhün pe anyun süshü laso; a-le thyü keshü gü genyu ale ditsüki thyü akenyü la! Ale a shwikerüchün nyu shwinyü; Sunggigü le a cheshü kela genyu ale ditsüki thyü asherhün la!

²“Nme-e Npugü hontse nshün mvu; a-hontse kethyü nme-e ndi ngun Sunggigü hontse n ntsen keloi ndi.

³Kemakin-o jozo tetso nya gwen; ketekho jo zonyao ma tse bin. Npugü le thakesha Sunggigü genyu, temi le thyü kehü kegwakeshvu aphu a-le shwi bin nyo.

⁴Shüpahü kenko dan levü bose la, ai kvukemvu gü no nko soryü.

⁵Gwengwa me ka kesükela thyü kehü temi dan le ntsoka we anyugun chvü chüntyü, ai nnyo kehünyu le nnyo nimvu laso. Nyegi nyu nyukendi gile mitsenyü nnyu, ai nyu kechon jvü gü le nme-e nsen mvu.

⁶Npugü le boshvu lo thyü nrhün nishü hü; a-le temi nipe kesinyu kazü ki shü lo zen raniryü hü.

⁷A-le temi peha no kendi nyu thyü; lo peha no kenya nyu thyüshü; a-le peha thyü ketsenyo lo kechanyu thyü ngo shü.

⁸A-le kenphü nyu kendi nyu penso shü lo rhokedyü nyu le kenjün thyü kebin süso shü. A-le anyugun no raja nyu nyuzen kengü lo kerühvu bin dan ge shüshü. Kazü gü binkejwe le Npugü hon; tsüge a-le kazü gü thyü shü.

⁹“A-le a-temi kenshün nyu dan keyhun ntsen loti, ai serikemvu gü we kezün nyu hyumvu lati; temi le a-npvü a-kenko nyu kvulo hümvu.

¹⁰Npugü kenrhi nyu nke lati; a-le tsangge tsangsen pe tsüdan ntsun ti. Npugü le kazü apentha jün kera ti; a-le kekvu pe a-raja tsüti, a-le kejükelo a-raja thyü pe no kvu loti.”

¹¹Tson-o Elkanah le ranio Ramah ki a-kanyu gunla, ai ntsenyu gü le Shiloh nyu bin-o püshükeda gü Eli hensin nyu Npugü lothyü bin tinla.

¹²Eli nyuhvu le serimvu. Au le Npugü rühvu

¹³nmvue püshükeda nyu le temi dan ka nyu lozüyo tsü rüchün mvu. Tsü sunka, temi le kerüshvu thyü binlo püshükeda gü go nyu no chen-kope kenshen kethyü senryü. Thyü gü ni nsen kebin ka,

¹⁴pe henla nyu rhishüo nyu jen sen chwiryüyo pe püshükeda gü hon thyü lahü. Israel nyu Shiloh nyu ryü tha hope Npugü kerüshvu nyu aphu ge hihontse thyü.

¹⁵Tsünyeki-e, thyükeshvu gü khipe ro kemvu ka püshükeda gü gogü le ryüo tha hope rüshvu kebin gü ka, “Püshükeda gü no rotyü nrün thyü peha khishülo; a-le hagun ka thyükeni lo kemvui, ketegi nti loti.”

¹⁶Tson-o temi gü le a-jokenio, “Agun no kenjü gü thyüo a-keshvu gü rola teri lo; tsüsiki nle nyu lonyüyo khilo.” Püshükeda gü gogü le zo, “Nmvu! Ntsoka pe atsüla! Nmvulo akenda thyü khilo lati!”

¹⁷Eli nyuhvu kemu higü le Npugü mhundyü nyu ntsun sala, au le mele tha hope Npugü kerüshvu rühvu mvu kela genyu.

¹⁸Tson bin-e ntsenyu gü Samuel we linen phi pe a-senphin pfüo Npugü lothyü bin hü.

¹⁹A-jvü le a-nyepvü zen kengüo tha hope chen kechwi kerüshvu thyü ryülo mirünketseyho keshe thyü senryü a-tsü hü.

²⁰Tson-o Eli le jochü pe Elkanah lo a-nu au tsüo Elkanah kazo, “Npugü no tenunyu higi ge hai le khikho pe a-tsü kela gü sunka ntsenyu khipe hai tsünda.” Tsonkeshü siki au le rani kaki gunla.

²¹Npugü le jochü pe Hannah tsüo a-le peche kecha mishen lo tenunyu mihvu tse nnyu lo. Ntsenyu gü Samuel le Npugü lothyüo min soryü.

²²Tsügwenkho tsüle Eli le then sala. A-le anyu hvu le Israel nyu ge thyü kehü rüla aphu lo au le Npugü kehü phika gü khenpvü ka kerathü kehü tenunyu ju zenzhü kehüe nyülo.

²³Tson-o a-le au ka zoshü, “Hai nyu genyu hihontse thyü bin nla? Temi aphu hai tha gwakemvu rüla aka zo bin nyo.

²⁴Tsükhela lo, anyuhvu! Npugü temi dan le kera kebin hile a-zükemvu keda nme laso!

²⁵Temi nme le kechanyu nme ge kemu thyü laza tse-e, Sunggigü le a-nopen loti; ai Npugü ge kemu thyü kela gü we segü le a-nopen logwa tila?” Ai au le au pvü khwenyü mvula, tsügenyu Npugü le au boshvu lati tse rhi lola.

²⁶Ntsenyu gü Samuel le min kenye lo, tson-o temi lo Npugü so pfülo.

²⁷Sidyükeshanyu nme le Npugü kipon jolo sen Eli kiryü: “Hagun bon Aron lo a-kami nyu le Ijipt raja gü do thyükebin ka, ale a npvü akhipe Aron hishü.

²⁸A püshükeda thyüo kershvubin ka lothyü, tharünkegwa ro, lo ephod ben-o a nthon titseo Israel nyu tsipwen aphu dan nyu ale a-kami kejülo. Lo kershvubin ge kero kerüshvu ka anyugun jün binlo kegwa kenjü ale pe anyugun tsüshü.

²⁹Tsonlo nyuthyüo ale atemi ka kerüshvu lo thaho keshü hikebin gü tepen-o nri hü nla? Eli, Nyuthyüo nle anyeki nnyu hvu rühvuo no atemi dan le hope akerüshvu aphu ka kegwatsin dan sen-o au thyü pe dabin nla?

³⁰Ale Npugü Israel nyu Sunggigü, nduka nkami lo npvüphun no kethonthen püshükeda thyüo alothyü hüti tse zoshwishü njü. Ai tsühontse sin loho so tse ale ntsoka zoshü bin nle! Tsü sunka, arühvu kehü nyu ale rühvu ti, lo a ntsun kehü nyu ale süjün mvu lati.

³¹Nyülo, ale nkami lo n pfüphun ka selo aphu boshvu kela gwenkho le ryüti, tson-o nkami nyu temi nme-e no then-o yhun loho.

³²Hagun no kenjün thyüo ale jochü pe Israel nyu kecha dan tsü nrün shwi pe hagun yhüthyü ti, ai hagun kami nyu temi nme-e yhun-o kethen nyu thyüni mvu lati.

³³Tson-e ale n tsipwen nme no yhun bin-o püshükeda thyü alothyü ti. Ai a-no a-yhüpo lao a-kenrin nme ndi ti, lo n tsipwen kecha dan no aphu terinyu siti.

³⁴Nnyu Hophni lo Phinehas ahvu mihvu nren khenyüme si kethyü nyü ale zokeshü aphu ketsin thyü ryüti tse kethyü tsin shüti.

³⁵Ale p:ushükeda nme kejü loti, a-le a jozen lo ale a-nothyü nyü kebin aphu thyü loti. Ale a-tsipwen pe tsüti lo a-le ale kejü kelo raja gü mhundyü ka a-zintse lothathyü hüti.

³⁶N tsipwen rhün kebin nyu ligü higü püshükeda tsügü ka gü pisa nmvue chvü hiti, lo ketyüketsü hyulo nrun genyu a-no püshükeda gü keche lo tse hiti.”