Read Southern Rengma Naga 1 SAMUEL 20 Bible Online

1 SAMUEL 20 - Southern Rengma Naga bible

1 SAMUEL 20

¹Tsüselo David le Ramah nyu Naioth ka bin mvuo Jonathan kigü. “Ale nyuthyü shüo? Ale nyu kemu thyülao? Ale npvü ge nyu a-zükemvu thyüla letseo a-le adushvu lanyü bin nla?” tse ketsoshü.

²Jonathan le zoshü, “Sunggig"i le nno sila loho! Apvü le thakeda nmvue keshe-e thyü titse-e a kebu kemvui, a-le tha aphu aka zohü nyo. Tson ketsin mvu ole?”

³Ai David le a-jokenishü, “Npvü le nle ditsüki asohü yo shabin, lo a-le rhikebin gü pe nka zoshülo nle rünyumvu sa kelai genyu ntesha mvu titse rhilo laso. Ale rhünkehü Npugü zan nyu sweo nka zobin nle, ale si nrün le phakvu nme nti laso.”

⁴Jonathan le zoshü, “Nle mvulokeshvu lihi-e ale thyü shü ti.”

⁵David le a-jokenishü, “Senduki le shyekeshün Nga so,” “Lo ale raja gü zen tyütsü kethyui. Ai hile nmhundyü nyu njü yatselo, ale gü low nyu kebu bin-o hadu gü ngwün ki titi.

⁶Ale ketyüketsü binka kendi npvü le sha lalo, akami nyu apentha chenkechwi kerüshvu gwenkho kela genyu ale nka hilo-o agun ka Bethlehem ki güla sele tse npvü ka zoshü lo.

⁷Tson-o a-le,‘Gwasa,’ tse zobin yatselo ale kenshvu ndi; ai a-nyunta layatselo a-le a nthyü nnyü titse rhilo laso tse nle sha logwa.

⁸Tsügenyu ncheno-e agenyu hithyü shülo lo nle kenshün nyu kejozen-o aka zoshü kenjü gü thenlo. Ai ale mu yatselo n npvü a dushvu lalo! Nyuthyüo azen gü npvü kishüo no adushvu tila?”

⁹Jonathan le a-jokenishü, “Tsühontse kethyü rüchün-e nya ta! Apvü le nnthyü nnyü lati tse rhikebin ale shatsentsülo ale nka zomvuti ole?”

¹⁰Tsüselo David le ketsoshü, “Npvü le a-nyuntao njokenishülo segü le aka zoshü tila?”

¹¹Jonathan le a-jokenishü, “Nnyi lowki tsüti le,” tson-o au gü,

¹²tson-o Jonathan le David ka zoshü, “Npugü, Israel nyu Sunggigü no nnyi jaka shahu gü thyülo! Senduki hi gwenkho lo haduki ale apvü ketso ti.Tson-o a-le nge a-kenyü bin yatselo, ale jolo nipe nki shüti.

¹³Lo a-le n nthyü nnyü lanyü bin-e ale tsü pe nka zoshüo nno tinchwi lomvu yatselo Npugü no avüshvu lalo. Npugü le npvü zen kehü hontse nzen hü nda!

¹⁴Lo ale rhünbin yatselo, kenshün nyu nle kejozen kenjü tsü age thyüshülo; ai ale sila yatselo,

¹⁵nle asokehü hontse kethonthen akami ge tsin shülo. Lo Npugü le nshwikerüchün nyu aphu nkebu kela ka,

¹⁶nnyi le khinyu nyu ka kejozen kenjü borho nya letse nda. Tsü borhola yatselo Npugü le shaja pe ntsüti.”

¹⁷Jonathan le David no a-so titse kejozen ni, Jonathan le David so pe a-npvü a-keso hontse kehü genyu.

¹⁸Tsüselo Jonathan le a-ka zoshü, “Senduki le shye keshün nga genyu nle ketyüketsü bin ka bin mvu yatselo sha loti.

¹⁹Lo haduki nle hükemvu tsüsha tsentsü lola ti; tsügenyu hi mhundyü nkebu bin ka gü tsothun dan jaka kebu binlo.

²⁰Tson-o ale thashwe kebin rothyüo tholevü tsi kenshen kvu pe tsüka shüti.

²¹Tson-o ale agonyu nipe tsü fü lotse shüti. Ale a-ka, ‘Tholevü tsi le hi denzin bin nle: Khilo lo, tsüle a-kon le kenshvu ndi, nle chwiryü lae gwa. Ale rhünkebin Npugü zan nyu swen bin nle, nle kenshvu nme ndi.

²²Ai ale a-ka, “Tholevü tsi dan le nnye kipon bin nle,” tse a-ka zobin yatselo, Npugü le nni kebin genyu tin lalo.

²³Nnyi le khinyu nyu ka kezoshü kenjü, Npugü le nnyi no kethonthen tsü thenlo nrün thyü tsentsü shüti.”

²⁴Tson-o David le low ki kebu bin. Shye keshün Nga ka Raja Saul le ketyüketsü bin ka ryü

²⁵a-le a-zin dun kehü hontse gü kabon khoka binlo. Abner le a-nye ka dun, lo Jonathan le dun pe a-ntsun. David bin le nrun bin,

²⁶ai tsünyü Saul le thame zomvu, a-kerüchün le, “Tha peha teno-o a-le nshün mvubin ado tse rüchün kela genyu.”

²⁷Tsü sinyü, shye keshün nga sinyü ko David bin le nrun bin, tsügenyu Saul le Jonathan ketsoshü, “Nyuthyüo David le ndue lo nthue ketyüketsü bin ka ryü mvula?”

²⁸Jonathan le zoshü, “A-le Bethlehem kigü titse aka hilo la le.

²⁹A-le, ‘Ncheno-e ano gülo, agun kaminyu le rünyi nyu kerüshvu Nga thyü bin lo atsanyu jule ano tsünyu binlo tse ahza shübin nle, tsügenyu nle apvü gü yatselo ano gü akaminyu shwishülo tse kezo genyu.’ Tsügenyu a-le nmiz ka a-bin ka ndi bin nle.”

³⁰Saul le Jonathan ge nthün-o a-ka zoshü, “Njvü le dihontse mejo zenmvu lo tenyen lokü mvula! Ntsoka nle David denzin bin-o npvü lo njvü no keja pfü kebin ale shabin nyo!

³¹David le rhün kebin then nle kazü higü nyu raja thyülo kemvui tse kethyü nle rüchün lomvu ole? Gü a-zen hika ryülo- a-no sila mvu loshvu!”

³²Jonathan le a-jokenishü, “Nyu genyu a-no si mon? A-le nyuthyü shüla?”

³³Tsüselo, Jonathan gala titse Saul le a-mi shweshü, lo Jonathan le a-pvü le ketsin thyü David dushvu la titse kebin sha lola.

³⁴Jonathan le nthün-o ketyüketsü bin ka sola, lo shye keshün nga jonhvu tsünyü a-le thame tyümvu. A-le David rüchün pe rünyumvu sala, Saul le a-nshwe kela genyu.

³⁵Tsüsigü lonyü, au kejozen kenjü hontse Jonathan le David teno titse lowki tsü. A-le ponyu nme zen gü,

³⁶“Ale tholevü kvu shü tilaryü tin gü tsü fülo,” tse a-ka zoshü. Ponyu gü le tin gülo Jonathan le a-levü kvu pe a-nye ka shüshü.

³⁷Ponyu gü le tholevü tsi le che kebin tilo ntsin, Jonathan le nrao, “Tholevü tsi gü le tsünye kibin nle!

³⁸Tsüka so bin nya! Nmhe!” Ponyu güle levütsi gü senryü a-npugü tsüshü,

³⁹tsü le nyu zo bin yo shamvu, Jonathan lo David au npvü kesha gwenzin.

⁴⁰Jonathan le a-teri kanyü pe ponyu gütsü shüo no sen rünyi ki nigun lalo tse zoshüla.

⁴¹Ponyu güle tinkela siki David le tsothun janyu chwiryüo, khosen lo njüo gwenshen ge kazünyu nkhün tsü. A-le lo Jonathan ko tse chüo khinyu nyu kenbashü; David le Jonathan nyeki-e a-nyun gwamvu kvu.

⁴²Tsüselo Jonathan le David ka zoshü, “Sunggigü no nzen hülo. Nle lo ale, n tsipwen lo a tsipwen ge nnyi le kenshün nyu kejozen kenjü gütsü Npugü le ketsin thyü shüti.” Tson-o David le tinla lo Jonathan le rünyi nyu niryü la.