Read Southern Rengma Naga 1 SAMUEL 21 Bible Online

1 SAMUEL 21 - Southern Rengma Naga bible

1 SAMUEL 21

¹David le Nob ka püshükeda gü Ahimelek kigü. Ahimelek le nshvuho tse ryü a-teno-o a-ketsoshü, “Nle nyuthyüo n npvü shü tse hiki ryübin nla?”

²David le zoshü, “Ale raja gü thothyüo hika ryübin nle. A-le nyu genyu anishü bin yo temi nme-e no shanya lotse aka zoshü. A temi dan yatselo anyugun no bin nme ka ateno lotse ale anyugun ka zoshü laso.

³Ntsoka nle nyu le bin nyo? Tensü thün pvün nmvue lihi-e nle kebin gü pe atsü shülo.”

⁴Püshükeda gü lezoshü, “Ale kenshün tensü nti ame tensü kedukeru ndi le; ntemi dan le hizon ka peche tenu jvü thyü mvubin yatselo nle khilo gwa le.”

⁵David le zoshü, “Anyugun le tsühontse mvu, atemi dan le thatho kedukeru thyü güe a-zintse anyugun thyü kenshün bin hü; tsonya tselo tsünye ki nthu le agun le thatho kerüche nme thyü güjü nyo!”

⁶Tsüselo Püshükeda gü le tensü kenshün gütsü pe David tsü shü, pe Sunggigü rüshvu lao tensü kenshün kecha pe a-sunka shü lao miz ge sen keryü tensü nti a-me tensü kecha kendi genyu.

⁷(Tsünyü Saul senru kekhwe keda gü Edom temi gü Doeg le tsü kahü, a-le kerüshvu peha thyüpen mvulo keshvu le kebin genyu.)

⁸David le Ahimelek ka zoshü, “Nle mi nmvue zhethon pe atsü logwa tile nmvula? Raja gü le ano nmheo gü mvulo keshvu ahza shü kela genyu ale azhethon nmvue terikanyü nme-e khilo mvu laso.”

⁹Ahimelek le zoshü, “Ale Goliath, Filistian nyu nle Elah kazü ketejon ka boshvu kela gü zhethon le bin nle; tsüle phi no je pe ephod sika bin njü. Nle sen mvulo shvulo tsü khi lota- hika terikanyü le tsü nti le bin nle.” David le zoshü, “Tsü pe atsüshülo, tsünyeki zhethon kegwa thame ka-e ndi!”

¹⁰Tson-o David le Saul ben nyu tin-o Gath nyu raja gü Akish ki güla.

¹¹Raja gü hensin kedanyu jule Akish ka zoshü, “David higü hile a-kazü nyu raja gü mvu ole? Tenunyu dan le nyhun-o lüthyü kethyü ka temi higü rüla zo-o, ‘Saul le yie yie galo ai David we yie yie tseryü galo.’ ”

¹²David le jo hidan shalo njüo Akish raja gü nshvusa lola.

¹³Tson-o mele a-hun lolo David le kenunyu rothyüo nyida gü khinrun ge thazü lo a-tsijon pe no a-münhü ge je tse so.

¹⁴Tsüselo, Akish le a-hensin kedanyu juka, “Shwishüta! Hile kenunyu! Nyuthyüo hagun le a-zen akiryü hü nla?

¹⁵Ale kenunyu senmvulo shvu letse ole? Nyuthyüo kenunyu zenryü amhundyü nyu kenu tho thyü bin nla? Temi higü no akanyu tinla.”