Read Southern Rengma Naga 1 SAMUEL 22 Bible Online

1 SAMUEL 22 - Southern Rengma Naga bible

1 SAMUEL 22

¹David le Gath nyida gü nyu tin gü Adullam rünyi khoka tsokü nyu bin. Atsanyu ju lo anyugun kaminyu dan le a-le tsüka bin nle tse nyükelo ka gü a-sinlo.

²Mele nshwe kehünyu nmvue tepu kepfü nyu nmvue yhun kenjün thyü kebin dan le a-kiryüo, anyugun aphu kesin le tsizi kho thyülo-o a-le anyugun sharhi gü thyülo.

³David le tsünyu bin-o Moab nyu kazü Mizpah nyu gü tsünyu raja gü ka zoshü, “Npugü le agenyu nyuthyü shü tiyo ale hyulo kemvu ka ncheno-e apvü lo ajvü au no nzen bin tselo.”

⁴Tson-o David le tsokü gü nyu kebu kebin then apvü-ajvü au khepe Moab raja gü khoka shüo au le tsünyu bin.

⁵Tsüselo sidyükesha gü Gad le ryü David ka zoshü, “Hika bin nya; whütse Juda kazü ki gunlo.” Tson-o David le tsü nken-o Hereth chün nyu gunla.

⁶Khenyüme Saul le mi nme sen-o Gibeah ki rincho nme ka tamarisk senbin nme hensin dun bin, lo a-hensin kedanyu aphu a-hun pfü bin. Tsüka mele David lo a-temi dan hyula sele tse a-ka zoshü,

⁷tsontsin a-le a-hensin kedanyu juka zoshü, “Nyülo, Benjamin temi dan! Hagun kerüchün le David le low, lo vainchwi pe hagun aphu tsü, lo hagun no a-rihüdan nyu kedanyu thyüti ado tse bin nle?

⁸Tsügenyu hagun le tedo rhio a ntsun bin le? Hagun nme-e a npvü anyun le David denzin kebin pe aka zomvu. Hagun nme-e aphin rüchün nmvue atemi dan nyu nme David le gwenkho kegwa hyulo lo a dushvula titse lo anyugü le a-nyun thyü kepeche kebin pe aka zoshü mvu!”

⁹Doeg le tsüka Saul hensin kedanyu ju zen sobin laryü a-le zoshü, “David le Nob nyu Ahitub nyugü Ahimelek ki kegü ale hyu.

¹⁰David no nyuthyü mvulo shvuyo Ahimelek le Npugü ka ketsoshü, tson-o ketyüketsü peha lo Filistian nyugü Goliath zhethon pe David tsüla le.”

¹¹Tsüselo Raja Saul le me nishüo Ahimelek lo Nob nyu püshükeda thyü kebin a-shvunye aphu a-kiryü.

¹²Saul le Ahimelek ka zoshü, “Nyülo, Ahimelek!” Ahimelek le a-jokenio, “Kedagü, ale hika bin nle.”

¹³Saul le a-ketsoshü, “Nyuthyüo David hai le tedo rhio a ntsun hü nla? Nle nyuthyüo ketyüketsü peha, zhethon nme pe a-tsüshü lo a-genyu Sunggigü zen kenthon la? Ntsoka we a-le a ntsun-o gwenkho hyulo lo a dushvula titse khwebin nyo!”

¹⁴Ahimelek le a-jokenishü, “David le nhensin kedanyu dan nyu tenyenlo kekü tsin gü! A-le nmvü gü, nkekhwenyu dan sokeda gü lo nraja kanyu temi aphu a-rühvusa kehü gü.

¹⁵Ele, ale a-genyu Sunggigü nthon le, lo tsüle a-kerigü mvu. Lo tedo rhio nkentsun we, Raja gü no pe a-e nmvue akami kechanyue nmu nya lo. Ale hi rüla thame shamvu le!”

¹⁶Raja gü le zoshü, “Ahimelek, nle lo nshvunye aphu no siti.”

¹⁷Tson-o a-le a-khoka sokebin rikhun juka zoshü, “Npugü püshükeda ju dushvu lalo! Anyugun le David zen phisin ki kenthon-o a-le tin kela anyugun aphu shabin-e aka zokemvu genyu. Ai rikhun nyuju le anyugun benshwe pe Npugü püshükeda ju boshvu titse anyugun ben shü mvula.

¹⁸Tsüselo Saul le Doeg ka zoshü, “Nle anyugun dushvula lo!” tso-o Doeg le anyugun aphu dushvula. Tsünyü a-le püshükeda ephod senlo kegwa hentetse pvün dushvula.

¹⁹Saul le püshükeda gü nyida Nob nyu keyhun nyu ko aphu dushvula lotse ahza shüla: Peche, tenu, ntsenyu, nyuhanyu, methu, gada, lo tanyü aphu dushvula.

²⁰Ai Abiathar tse kethyü Ahimelek nyu peche nme le tin chwilo-o David ki güla.

²¹A-le Saul le dihontse Npugü püshükeda ju dushvu layo pe a-ka zoshü.

²²Tsontsin David le a-ka zoshü, “Tsü jonyü Doeg le tsüka kebin ale hyu keshüka, a-le Saul ka zoshüla tsentsü tse ale shala le. Tsügenyu nshvunye nyu aphu sikela tsüle age laso.

²³Azen binlo, nshvu nya. Saul le nnyi mihvu nren dushvula nyü bin nyo, ai nle azen binlo kenshvu ndi.”