Read Southern Rengma Naga 1 SAMUEL 23 Bible Online

1 SAMUEL 23 - Southern Rengma Naga bible

1 SAMUEL 23

¹Filistian nyu le Keilah r"nyi wheo anyugun le lowgvü kenjü rühu kebin David le nyülo.

²Tsügenyu a-le Npugü ketsoshü, “Ano gü Filistian nyu whe le nnya mon?” Tsontsin Npugü le a-jokenishü, “Ele, anyugun wheo Keilah kenishü lo.”

³David temi dan le a-ka zoshü, “Ngun hika Juda kae kenshvu nyu bin nyo; tsünye ki ngun le gü Keilah ki Filistian nyu whelo gwamvu kvu tile!”

⁴Tson-o David le Npugü zen kenthon ni, lo Npugü le a-ka zoshü, “Gü Keilah whelo, ale Filistian nyu sokvu kelo pe ntsü nrün genyu.”

⁵Tsonn-o David lo a-temi dan le Keilah ki gü Filistian nyu whe; anyugun le tsü dan temi kechon dushvulao anyugun senru hü lola. Tsü hontseo David le rünyi tsügü kenishü.

⁶Ahimelek nyugü Abiathar le tin chwi gü Keilah ki David zen kengü kelo ka a-le ephod ko khi sen hü.

⁷David le Keilah kigü kela rüla Saul ka zoshü laryü a-le zoshü, “Sunggigü le a-khipe aben nyu shü laso. David le a-npvü gü chwida lo khinrun le kebin rünyi nyu a-minlo laso.”

⁸Tson-o Saul le a-rihü dan kolo-o gü Keilah ntsun-o David lo a-temi dan hunlo titse so.

⁹David le Saul le a-whe titse rhikebin nyülo ntsin püshükeda gü Abiathar ka, “ephod sen hika ryülo,” tse zoshü.

¹⁰Tsüselo David le zoshü, “Israel nyu Npugü, Sunggigü, ngogü ahi genyu Saul le Keilah ka ryüo tsü nkela titse rhikebin ale nyülo laso.

¹¹Keilah nyu phenyü nyu dan le akhipe Saul ben nyu shüla tile? Ale nyü kelo hontse Saul le ryü ketsin thyü tile? Israel nyu Npugü, Sunggigü, ale nno akehi kenishü lotse hibin nle!”

¹²“Keilah nyu Phenyü nyu le atemi dan lo a-e tse pe Saul ben nyu shüla tile?” tse David le ketso nishü?” “Anyugun le tson lati.” Npugü le zonishü.

¹³Tsüselo David lo a-temi tsi tsero kho le whütse Keilah nken-o chwila. Saul le David le Keilah nyu chwikela shakelo ka ale rhikebin gütsü khela.

¹⁴David le rincho ki Ziph tehenyhun kemvu khoki kebu bin tinla. Saul le a-zintse a-fü hü, ai Sunggigü le David khipe a-ben ka shümvu.

¹⁵David le Saul le a-dushvula titse chwi keryü hyu. David le Ziph khoka tehenyhun kemvu nyu Horesh ka bin.

¹⁶Jonathan le a-kigü Sunggigü le a-ntsen bin tsentsü kethyü zope a-thyü kepeche shü,

¹⁷a-ka zo-o, “Nshvu nya. Apvü Saul le nnthyü nnyü lo kemvui. A-le, Israel nyu raja thyü nrün gü tsüle nle, ale nsika kedagü thyü titse sha tsentsü bin nyo.”

¹⁸Au mihvu nren kepvüshe titse kenshün nyu khinyu nyu ka kejozenlo. David le Horesh ka bin lo Jonathan le kaki gunla.

¹⁹Ziph nyu temi peha le Gibeah ki gü Saul ka, “David le agun kazü nyu Judia tehenyhun kemvu tesinzin Hakilah kazüthun ge Horesh ka kebu bin nle,” tsonshü.

²⁰“Raja gü, nle a-tenlo nyüsa kebin agun le sha; ts"genyu agun kazünyu ryülo, lo agun le nno a-tenlo tsentsü ti.”

²¹Saul le zoshü, “Hagun le a shwinjün sa keshü genyu Npugü no jochü pe hagun tsülo nda!

²²Gü sha tsentsü gwa nishü; a-le dika bin yo lo segü le tsüka a-hyuyo sha pütsü la. A-le a-do gwaritsin letse ale nyülo laso.

²³A-le dika ka kebu hüyo sha tsentsüla, tson-o gwa shvue njü niryüo aka zoshülo. Tson-o a-le lojvü tsünyu binzun ya tselo ale hagun zen güti, ale a-hü nsheryüo Judia apentha nyue a-fü ti.”

²⁴Tson-o anyugun le Saul mhundyü rio Ziph nyu raniryü. David lo a-temi dan le Judia tehenyhun kemvu tesinzin me kendi bin ketejon ki Maon tehenyhun kemvu nyu bin.

²⁵Saul lo a-temi dan le David fü chwi, ai a-le tsü shalao Maon tehenyhun kemvu ki tsonyethun ki güla. Saul le hi nyülo njüo David then gü.

²⁶Saul lo a-temi dan le rinchothun pehazin, lo David lo a-temi dan le kecha kipon tse anyu kekha bin. Anyugun le Saul lo a-temi dan le anyugun tenlo titse anyugun kho nni ryüzhü kela genyu nyhun-o tin hü.

²⁷Tson kebin ka lilo nme le ryü Saul ka zoshü, “Whütse rani ryülo! Filistian nyule ngun rünyi hü bin laso!”

²⁸Tsügenyu Saul le David hümvulao Filistian nyu zen kega titse gunla. Tsügenyu bin tsügü pe kekekha rincho tse kola.

²⁹Lo David le Engedi lojvü ki gü kebu tinla.