Read Southern Rengma Naga 1 SAMUEL 24 Bible Online

1 SAMUEL 24 - Southern Rengma Naga bible

1 SAMUEL 24

¹Saul le Filistian nyu zen kega tseo raniryü laryü David le Engedi khoka tehenyhunkemvu ki hü nle tse a-ka zoshü.

²Tsüselo Saul le Israel nyu dan nyu shüpahü kegwatsin yie shen zen David lo a-temi dan füo Thyünyu Tsonye nphozin gü.

³Tson-o ryü tsonda khoka tanyü chwi nme nyu tsokü nme ka rüyü loti tse yü. Tsokü tsügü nyu David lo a-temi dan le kentsun ki kebu bin.

⁴David temi dan le a-ka zoshü, “Npugü le nshwikerüchün nyu pe nben ka shüla titse nka zokeshü tsü, hile ngenyu gwenkho kegwa laso, tsügenyu nle a-ge nyuthyü nyüyo thyülo gwaso.” David le npvü gü Saul no sha mvu tse a-phi rüthü lola.

⁵Ai David le a-nyunbwe mvuo,

⁶a-temi dan ka zoshü, “Npugü no a ntsenlo-o ano Npugü le kejükelo raja, a npugü nthyü nnyü nya lo. A-le Npugü le kejükelo raja gü genyu ale a-nthyü nnyü loshvu!”

⁷Tsü hontseo David le a-temi jvü pe no Saul whe mvula. Saul le soryü tsokü gü nken-o a-tson nyu güla.

⁸Tsüselo David le a-then chwigü a-ko-o, “Raja gü!” Tson shü ntsin Saul le raniryü lo David le kazü nyu nkhün tsügü a-keluo,

⁹zoshü, “Nle nyuthyüo ale nnthyü nnyü titse bin nle tse mele nka kezo tsünyü hü nla?

¹⁰Ntsoka tsokü günyu Npugü le nkhipe aben nyu shükela nko n npvü hyu logwa. A temi peha le ano ndushvu lalo tse aka zo, ai ale nnjün lao anyugun ka nle Npugü le kejükelo raja genyu nnthyü nnyü loshvu tse anyugun ka zola le.

¹¹Shwi shüta, apvü, ale nphi sen kebin re! Ale n ntsun nmvue nnthyü nnyü titse rüchün mvutse kethyü hisha lota. Ale nge a-zükemvu thame thyü mvue n we adushvu lati tse ahü bin nyo.

¹²Nnyi digü le a-zü mvuyo Npugü no kera shüta! Nle a ntsun kebin tho higenyu Npugü no shaja pe ntsülo, ale thakeshanyu ka-e nnthyü nnyü loho kethyü genyu.

¹³Nduka nyule zokehü nle shabin, ‘Temi gwakemvu nyu npvü gwakemvu thyü hü,’ tsügenyu ale nnthyü nnyü loho.

¹⁴Israel raja gü le nyu dushvula titse fü hü nla! A-le nyu hübin yo nrishü! Tehi kesi nme le, tehei nme yo!

¹⁵Nnyi digü le a-zümvu yo Npugü le nnyi jün kera lo pen shüti. Npugü no shwishüo ano penlo, lo nben nyu akenishü nda.”

¹⁶David le jozo thüshü ntsin, Saul le zoshü, “Tsüle ketsin nle le, anyugü David?” tson-o a-le chü sola.

¹⁷Tson-o a-le David ka zoshü, “Nle njü lo ale a-zümvu laso. Ale nge a-zükemvu tsühontse thyü lae n we ashwi njün sashü!

¹⁸Nthu Npugü le akhipe nben nyu shülae nle adushvu mvukela genyu, nle ditsüki age njvü gwa hüyo tsinshü la sele.

¹⁹Temi nme le a-shwikerüchün nyu tenlo lo nthyü nnyü mvuo no tin lahü ola? Nle nthu age thyükeshü gü genyu Npugü no jochü pe ntsü lo!

²⁰Ntsoka we ale sha tsentsü laso, nle Israel nyu raja thyüti, lo rajaphen le nhensin nyu bin hüti.

²¹Ai azan lo akami zan nmhinshüla mvu nrün genyu nle a tsipwen nrho shü titse kethyü Npugü zan nyu aka njo hoshü lo.”

²²David le ale tsonti tse a-jo hoshü. Tson-o Saul le kaki ranila, lo David lo a-temi dan le anyugun kebu bin ki ni güla.