Read Southern Rengma Naga 1 SAMUEL 25 Bible Online

1 SAMUEL 25 - Southern Rengma Naga bible

1 SAMUEL 25

¹Samuel le silao Israel nyu aphu ryü kequenlo-o a-chechü. Tson-o Ramah nyu a-ka ka a-sunla. Tsüselo David le tehenyhun kemvu kazü Paran ki güla.

²Tsünyu Kaleb pfüphun ka Nabal tse kethyü temi nme le bin lo a-le Karmel rünyi khoka a-kazü le bin. A-le nnyasa kethyü nyu nme, tanyü yie shen lo tenyü yie me tse bin. A-nu Abigail le zegwasa lo nsü, ai a-we a-jvü gwamvu lo kenthün temi nme. Nabal le Karmel ka a-tanyü hütse bin,

⁴lo David le tehenyhunkemvu ki hüo tsü shalo,

⁵tson-o a-le selo min tseryü no gü Karmel ki Nabal hyulo lo a-le kelukeshü pe a-tsüshü bin nle tson zoshülo tse ahza shüo nishü.

⁶A-le anyugun no Nabal ka: “David le nkelushü bin nle, apvü gü, nle, nkami lo nhon aphu no kegwa gü thyülo.

⁷A-le nle ntanyü hütse kebin rüla shalo, lo ntanyü kekhwenyu le agun zen kehü ka agun le anyugun nthyü nnyü mvu tse kethyü nno shanyü. Anyugun le Karmel ka kebin then anyu hon thame nmhe lamvu.

⁸Anyugun ketsoshü lo anyugun le nka zoshü ti. Agun le nga jon nyü ryü bin nle, tsügenyu nno agun njün-o agun zen lolo tse David le nka hishü bin nle. Tsügenyu nle nyu khishü logwa yo pe agun ngonyu ju lo npvügü David tsü shülo,” tse zoshü.”

⁹David temi jule David zan nyu jolo higü pe Nabal ka zoshü. Tson-o anyugun le tsüka khwebin,

¹⁰tsüka Nabal le anyugun jokenio, “David la? A-le següo? Ale a-rüla nyülo shwimvu! Njaka kazü günyu donyu tin kela le kesü thyü laso!

¹¹Ale a tensü, zü lo ale a-hütse kehü senru dushvu pe dikipon ryüyo ale shakemvu temi tsü loho!”

¹²David temi jule rani gü Nabal le zokeshü jo pe a-ka zoshü.

¹³Tsontsin a-le, “Hagun zhethon pfü külo!” tse ahza shüo, anyugun aphu tsonlo. David ko a-zhethon pfülo-o temi tsihvu no anyugun kanyü khwe bin lo tsizi zen-o tsonchü shü.

¹⁴Nabal gonyu nme le Nabal nu ka zoshü, “David le tehenyhun kemvu ki bin-o lilonyu peha nipe no ngun npugü kelushü, ai a-le tsüdan nshwe kela, nle nyülo le mvula?

¹⁵Agun le anyugun zen low nyu kehü ka, anyugun le agun genyu gwasa; anyugun le agun kevü keben mvushü, lo agun hon thame nmhe mvu.

¹⁶Agun le tanyü khwe kebin gwenkho aphu ka anyugun le nhenyu lo khejenyue agun ntsen hüle.

¹⁷Tsügenyu hi rüchün shüo nyuthyü mvulo shvuyo rhi lolo. Hile ngun npugü lo a-kami aphu genyu kenke kenmhü nme thyüla logwa le. A-le a-jvü gwamvuritsin-o temi nme khwe kenyüi kemvu!”

¹⁸Tsüselo Abigail le whütse tensü thün tsihvu, vainzu thyügi khinhvu, tanyü pvün ga pe ketsükela lo, shye keshvu kilogram tseryüo tsenyü, vainsha kenko chwe tsi me lo kherosha pe tensü kethyü pon tsihvu tse pe gada khvü thyülo.

¹⁹Tson-o a-le gonyu juka, “Hagun le rigü lalo, ale hagun then ryü ti,” tson zoshü. Ai a-le a-nyepvü ka thame zomvu.

²⁰A-le a-gada ge dun-o rinchothun nme ka chwiryü laryü David lo a-temi dan le a-kipon ryü kejü teno whütse lo.

²¹David le anyunki, “Ale tehenyhun kemvu bin hiki hi temi higü hon dihontse ntsen shüla? A-hon thame rühu lo lamvu, ale a-keche keshü chün a-le hihontse pe akethun bin nle!

²²Tsangben kemvu ka ale temi hidan aphu dushvula mvu yatselo Sunggigü no avüshvu lalo!”

²³Abigail le David hyushü ntsin whütse a-gada ge tsen-o kazünyu chetsüla

²⁴David phanyu, tson-o a-ka, “Kedagü, akhwenyü shülo! Kemukhvü tsü pe age shü lalo.

²⁵Nchono-e Nabal thakon thani kemvu gü khwe tsü nyü nyalo! A-zan hontse a-le kemonkenlu nyu le! Ngonyu jule keryü ka ale tsüka hümvu le, kedagü.

²⁶Nno nshwikerüchün nyu ge nkhünzo lo tsüdan dushvula mvuo n ntsenlo kehü gü tsüle Npugü le. Lo ale ntsoka rhün kehü Npugü zan sen-o swe bin nle, nshwikerüchün nyu lo nnthyü nnyü lanyü kehü nyu aphu no Nabal hontse shaja hyulo lo.

²⁷Kedagü, ncheno-e, ale senkeryü jwe hi khilo-o pe ntemi dan tsüshü lo.

²⁸Ncheno-e a kemu jüshü lo, kedagü, ale lihi thyüzü laya tse-e. Npugü le nle lo n tsipwen-e pe raja thyüti, nle a-genyu terithyü bin nyo; lo nle nrhünthen tha gwakemvu nme thyüla loho.

²⁹Ligü higü ndushvula titse nwhe yatse ai temi nme le kenya minketsen rikhun kehü hontse Npugü n Sunggigü le n ntsenlo lati. Tson-e nshwikerüchün nyu we temi nme le tso kezevü ka tsoshwe kela hontse khipe shwe lati.

³⁰Lo Npugü le nka zoshwi shü kenjü thakegwa aphu thyüshüo nno Israel nyu raja thyüshülo,

³¹a-kon kendi ka dushvula nmvue n npvü nkhünzo mvukela genyu rünyumvu nmvue nnyugwamvu lalo hole, kedagü. Lo Npugü le jochü pe ntsü keshü ka a nmhinla nyalo, kedagü.”

³²David le a-ka zoshü, “Nthu nnishüo nno ateno keshügü Npugü, Israel nyu Sunggigü shwe le!

³³N kerüchün kenjü lo ntho genyu ano nthu me dushvu lo a npvü akhünzo mvukelo genyu Sunggigü cheno.

³⁴Npugü le a nntsen lolao nnthyü nnyü mvu laso. Ai nle nshweryü ateno mvuya tse kethyü we ale rhün kehü Israel nyu Sunggigü zan nyu sweo lonyü tsangkeben tsüle Nabal temi aphu sila nrün le!”

³⁵Tson-o David le tsügi le sen keryü khilo njüo a-ka zoshü, “Kaki rani gunla, lo nnyun nkhi nya. Nle nyu lonyü bin yo ale thyüshü ti.”

³⁶Abigail le Nabal ki rani gun ryü, a-le a-ka nyu raja nyu keho hontse hobin. A-le nzeüo a-shekerhün thyübin, tsügenyu tsügi le tsangben kemvuthen thame a-ka zomvu.

³⁷Tson-o a-le ntsenkelo siki tha aphu pe aka zoshü. Tsontsin a-kerüshvu pe thame sha mvula.

³⁸Tson-o jonryü kho siki Npugü le a-vü shüo a-le sila.

³⁹Nabal le sila so tse kethyü David le nyükelo ka, a-le zoshü, “Npugü shwe! Nabal le a nshwe kethyü genyu a-le akhün zoshü lo a-go ahigü ntsenlo-o ano thyüzü mvukelo genyu. Nabal tho gwakemvu genyu Npugü le shaja pe a-tsü laso.” Tsüselo David le Abigail pe a-nu thyü titse me nishü.

⁴⁰A-gonyu jule Karmel kigü tsügi ka zoshü, “David le agun no nzenryü a-nu thyülo tse agun nishü bin nle,” tsonshü.

⁴¹Tsontsin Abigail le nkhün tsügü kazü rün-o, “Ale a-gogi le, a-gonyu dan pha süti tse ndo bin nle.”

⁴²Tson-o a-le whütse a-gada ge külo. Lo a-gogi minpvün zen-o David gonyu ju then gun-o a-nu thyü lola.

⁴³David le Jesreel ka Ahinoam lo, lo Abigail ko tse pe a-nu thyülo.

⁴⁴Saul le a-nyugi Mikal David nu tsüpe Laish nyugü Palti tsüla, tsügü le Gallim rünyi nyu.