Read Southern Rengma Naga 1 SAMUEL 26 Bible Online

1 SAMUEL 26 - Southern Rengma Naga bible

1 SAMUEL 26

¹Ziph nyu temi peha le Gibeah kiryü Saul ka David le Judia tehenyhun kemvu teki Hachilah kazüthun ge kebu bin nle tse zoshü.

²Tsüselo Saul le whütse Israel nyu shüpahü kegwatsin yie shen zen-o Ziph tehenyhun kemvu ki David fü gü,

³tson-o Hachilah kazüthun ge kegü tsonda nyu nsenbin. David le tehenyhun kemvu nyu hüzun, lo Saul le a-füryü kebin a-le shalo,

⁴a-le rüzü nyu nishüo Saul le tsüka bin ketsin kethyü shalo.

⁵A-le whütse gü Saul lo Ner nyugü Abner Saul rihü dan so kedagü au bin sha ntsenla. Saul le kensenbin gü lvunyu lo a-temi dan le a-hun bin.

⁶Tsüselo David le Hitnyu Ahimelech lo Joab sikezen gü Abishai (a-jvü le Zeruiah) tse ka, “Hai digü le a zen-o Saul kensenbin ka gü tila?” Tsontsin Abishai le, “Ale ti.”

⁷Tson-o tsüje David lo Abishai au Saul kensenbin nyu yü laryü Saul le a-mi pe a-pe khoka kazünyu sen lao zhübin. Lo Abner lo a-rihü dan le a-hun pfüo zhübin.

⁸Abishai le David ka zoshü, “Ntsoje Sunggigü le nshwikerüchün nyu pe nben nyu shü laso. Ano gwengwa nti a-npvü a-mi pe a-jen pe kazü nsü lata. Ale gwenhvu ge jen kemvui!”

⁹Ai David le zoshü, “Nle a-nthyü nnyü nya? Npugü le ligü higüe a-le kejükelo raja nthyü nnyü kethyü gü shaja pe tsü tsentsü ti.

¹⁰Rhünkehü Npugü le,” David le zo-o, “Npugü le Saul boshvu lati tse ale shabin nle, me si hontse metse lo terinyu si metse.

¹¹Npugü le ano Npugü le kejü pe raja thyü keshü gü nthyü nnyü titse ndo nya lotse hü nle! Nnyi a-mi lo zükhin khi lo-o tinla tikhun.”

¹²Tson-o David le Saul pe khoka a-mi lo zükhin khilo-o Abishai au tinla. Temi nme-e tsü hyu, nmvue sha, nmvue chon soryü mvu- Npugü le kezhü kentsun pe a-nyugun ge shükela genyu anyu aphu zhüsa tinla.

¹³Tson-o David le ketejon gü pfüthü gü kechazin rinchothun sun ge kenshvu kendi bin ki bin-o,

¹⁴nra sen-o Saul shüpahü dan lo Abner ka, “Abner nle akhwenyü lo bin nmon?” Tsüselo Abner le, “Nra sen-o raja gü kesun kebin tsü le segü la?” tse ketso shü.

¹⁵David le a-jokenio, “Abner, nle Israel nyu kedatsin gü mvu ole? Tsonlo nle nyuthyüo n npugü, raja gü ntsen lomvu hü nla? Ntsoka temi peha le n npugü dushvula titse kensenbin nyu yüryü.

¹⁶Abner, nle ntho nyu gwalomvu laso! Ale rhün kehü Npugü zan nyu swe bin nle, Npugü le pe raja thyü keshü gü hagun npugü ntsenlo kemvu genyu hagun aphu sizü le. Shwishü! Raja gü mi le diki la? A-pe khoka kebin zükhin le diki bin nla?”

¹⁷Saul le David khwesha-o, “David, tsüle nle ole, anyugü? tse ketso shü. David le a-jokenio, “Ele, Raja gü.”

¹⁸A-le zonio, “Kedagü, nle nyuthyüo ntsokhin keti ngogü ahigü hübin nla? Ale nyuthyü lao? Ale nyu kemu thyü lao?

¹⁹Raja gü, ale nyu zobin yo nyü shüta. Npugü le nthu keyhun pe a ntsun bin yatselo kerüshvu nme thyü pe a-tsüo a-nyun thyü kelu lalo, ai temi le hi thyüshü yatselo Npugü shochün no anyugun ge gülo. Anyugun le Npugü kazü nyu ahüshwi pe sinrünyi gü tero dan nti rüshvu lokegwa bin ki shükela genyu.

²⁰Tesin rünyi güki Npugü kepen ki meno a dushvula nyalo. Nyuthyüo Israel nyu raja le temi lihi kemvu ahi hontse kethyü dushvu titse ryü mon? Nyuthyüo a-no tegü kehü hontse ahübin mon?”

²¹Saul le zoshü, “Ale thyüzü laso. Anyugü David, niryü lalo! Nle ntsoje akeyhun nrhoshü kela genyu ale n nthyü nnyü nilo hoso.Ale kemu thothyü laso! A-zümvu sala sele!”

²²David le a-jokenishü, “Raja gü, nmi le hika re. Ntemi dan nme no ryü khilo lo.

²³Npugü le senyu le joketsin zolo njü hüyo tsünyu chün thyü pe tsüti. Nthu a-le nkhipe aben nyu shüla, ai ale nnthyü nnyü mvu, Npugü le nkhipe raja thyü keshü genyu.

²⁴Ale nthu nkeyhun nrho keshü hontse Npugü no age tsü hontse thyüshü lo akenjün kethyü aphu nyu a hoshüla nda!”

²⁵Saul le David ka zoshü, “Anyugü, Sunggigü no jochü pe ntsülo! Nle ntho aphu nyu gwa loti!” Tson-o David le a-tson nyu güla lo Saul le kaki rani ryüla.