Read Southern Rengma Naga 1 SAMUEL 27 Bible Online

1 SAMUEL 27 - Southern Rengma Naga bible

1 SAMUEL 27

¹David le a-npvü a-nthon-o, “Khenyüme mvue khenyüme Saul le adushvu kelai.Ale Filistian nyuki gükela le agenyu gwatsin tiso. Tson yatselo Saul le Israel nyu dan nyu afü sinmvu lao ale rhün loti.”

²Tson-o David lo a-temi tsitsero dan le Gath nyu raja Maoch nyugü Achish ki güla.

³David lo a-temi dan le anyugun kami zen Gath nyu binlo. David le a-nuhvu, Jezreel ka Ahinoam lo Karmel ka Nabal nu Abigail tse le bin.

⁴Saul le David le Gath ki tin kela shalo ntsin a-fü sinmvu la.

⁵David le Achish ka zoshü, “Nle apvü gü yatselo ano rünyi keshe nme thyüo bin ta. Ano nyida gü nyu nzen yhun mvue gwa le.”

⁶Tson-o Achish le Ziklag rünyi pe a-tsüla, tsügerho nyu Ziklag le Juda raja ju hon thyü ryüla.

⁷David le Filistian nyu shye tseryüo tsero yhun.

⁸Tsügwenkho ka David lo a-temi dan le Geshur, Girzi lo Amelek nyu jon kethon lojvü tsünyu yhun kehü dan hü. A-le Ijipt ki kenshe tson nyu tsügü Shur keti anyugun kazü lolo la,

⁹temi peche tenu aphu dushvu lao, tanyü, methu, gada, ut lo phinya-e khi lola. Tson-o a-le Achish ki raniryü

¹⁰laryü, “Nthu gwen nle dikipon nyu hü güla?” tse a-ketso shü, lo David le, ale Judia tesin kipon, nmvue Jerahmeel pfüphun dan lojvü ki nmvue Kenitnyu le yhun kehü lojvü ki güla le tse zola hü.

¹¹David le peche lo tenue aphu dushvu lao temi nme no Gath kigü a-le lo a-temi dan le nyuthyü ketsin thyü layo zokeshü mi ndi la. DAvid le Filistian nyu yhun kehü gwenkho apentha ka hihontse thyü.

¹²Ai Achish le David tenyeo a-npvü a-nthon-o, “A-temi Israel nyu dan le a-nrhiritsin-o a-le a-rhünthen alothyü tiso,” tson bin.