Read Southern Rengma Naga 1 SAMUEL 28 Bible Online

1 SAMUEL 28 - Southern Rengma Naga bible

1 SAMUEL 28

¹Tsontseo tsüsiki Filistian nyu le Israel nyu zen kega titse shüpahü ko kequenlo, lo Achish le David ka zoshü, “Nle lo ntemi dan le adenzin bin-o terithyü titse kethyü nle shabin nyo.”

²“Tson ti le,” tse David le a-jokenishü. “Ale n go, ale nyuthyülo gwayo nle n npvü hyuti.” Achish le zoshü, “Gwa le! Ale n lope arikhun thyüzin tin lati.”

³Tsügwenkho ka Samuel le sila lo Israel nyu aphu a-chechüo pe a-npvü a-nyida gü Ramah nyu sunla. Lo Saul le kapu nthon kehü lo temvünyu aphu no Israel nyu kazünyu bin ya lotse hü küla.

⁴Filistian nyu shüpahü le ryü Shunem rünyi khoka nsenlo; Saul le Israel nyu ko kequen pe Gilboa kazüthun ka nsenlo.

⁵Saul le Filistian nyu rihü dan hyu keshü ka a-kerüshvula,

⁶tsügenyu nyu hontse thyü tiyo tse a-le Npugü ketso. Ai Npugü le a-jokenishü mvu shüla.

⁷Tsüselo Saul le, “Tenunyu temvünyu nme fü pe atsülo lo ale gü tsügi nthon ti,” tse ahza pe a-hensin kedanyu ju tsüshü. Tsontsin anyugun le “Endor ki temi nme le bin nle,” tse a-jokenishü.

⁸Tsüselo Saul le a-joja kecha thyülo; phinya kecha ben nya lo-o a-temi mihvu zen-o kezün ki tenunyu tsügi teno gü. A-le tsügi ka, “Kapu dan zen kenthon shüo dihontse la ma bin nyo pe aka zoshü lo.” “Ale temi nme zan zoshülo tsügü kapu koshü lo.”

⁹Tenugi le zoshü, “Raja gü Saul le dihontse kapu nthon kehünyu lo temvünyu no Israel nyu kazü nyu tin layo a-le thyükeshü tsü nle shabin tsentsü. Tsonlo nle nyuthyüo aseme-o ano sila tiya bin nla?”

¹⁰Tsontsin Saul le kenshün keswe thyü, “Rhünkehü Npugü zan nyu ale zoshwishü bin nle, hi kethyü genyu nno shaja thyü loho,” tse tsügi ka zoshü.

¹¹Tenugi le, “Ano ngenyu segü koshü mon?” tse a-ketsoshü. A-le, “Samuel le,” tse shü.

¹²Tenugi le Samuel hyu shüo, nrao Saul ka zoshü, “Nle nyuthyüo aseme hü nla? Nle raja gü Saul le!”

¹³Tsüselo raja gü le a-kazoshü, “Nshvu nyalo, nle nyu hyu ola?” Tsontsin tsügi le, “Ale kapu nme le kazü nyu chwiryü kejü hyu le.”

¹⁴Tsüka a-le, “A-joja le dihontse la?” tse ketsoshü. Tsügi le a-ka, “Kethenyu nme le ryüjü nle, lo a-le mirün ketseyho nme ben hü nyo.” Tsüselo tsüle Samuel tse kethyü Saul le sha lao nkhün tsügü a-rühvu shü.

¹⁵Samuel le Saul ka zoshü, “Nyuthyüo nle akevü hü nla? Nle nyuthyüo ano raniryü bin nla?” Saul le a-jokenishü, “Ale thyülo shvusa bin nle! Filistian nyu le azen terithyü bin lo Sunggigü le akhe laso. A-le sidyükeshanyu ge nmvue mizhü ki-e thame a jokenishü mvu laso. Tsügenyu ano nyuthyü mvulo shvuyo nno aka zoshü titse ale nkoshü le.”

¹⁶Samuel le zoshü, “Npugü le nkhe lao nshwikerüchün nyu thyüla yatselo nle nyuthyüo akohü nla?

¹⁷Npugü le a ge bin-o nka nyu zoshü layo a-le n ge tsü thyüshü laso; a-le nben nyu rajaphen gütsü khipe nsunka David tsü laso.

¹⁸Nle Npugü le johokeshü zenmvuo Amelek nyu lo anyugun hon dan nkeshüla mvula. Tsügenyu Npugü le ntsoka n ge hithyü bin nle.

¹⁹A-le nle lo Israel nyu pe Filistian nyu ben nyu shü lati. Senduki nle lo nnyu jule azen bin tin lati, lo Npugü le Israel nyu rihü dan ko pe Filistian nyu ben nyu shü lati.”

²⁰Tsonshü nyemhun Saul le Samuel jo genyu a-kerüshvu lao kazü nyu keto tsüla. A-le khensin lo jongwen thame tyütsü kemvu genyu kvu mvula.

²¹Tenugi le a-kiryü a-le a-kerüshvu kela hyulo njüo a-ka zoshü, “Kedagü, ale akeyhun hoshüo nle nyu hishüyo tsü thyüshü.

²²Tsügenyu ntsoka, ncheno-e ale nka kehi gü thyüshülo. Ano ngenyu ketyüketsü peha nda shülo. Nle nkolo-o njwen lo nrün genyu tyütsü lo mvulo shvu le.”

²³Saul le ale thame tyü mvule tse kenila. Ai a-hensin keda nyu juko a-no tyütsü lotse tenge lola. A-le kenkhin ki soryü zhügü ge dunlo.

²⁴Tenugi le whütse gü a-le bin kenjü methu nme dushvulo. Lo tho peha pe kebu shvümvuo tensü tsenlo.

²⁵Tson-o pe Saul lo a-hensin kedanyu ju mhundyü ka shüo anyugun le tyülo. Tson njüo tsüje tinla.