Read Southern Rengma Naga 1 SAMUEL 29 Bible Online

1 SAMUEL 29 - Southern Rengma Naga bible

1 SAMUEL 29

¹Filistian nyu le anyugun rihü dan aphu zenryü Aphek ka kequenlo, Israel nyu le Jezreel ketejon nyu zükepen ka nsenlo.

²Filistian raja pvün jule anyugun temi tsitsi lo yie yie tse tsonchü shü; David lo a-temi dan le raja gü Achish zen-o khi-o tsonshü.

³Tsontsin Filistian nyu kedanyu jule anyugun hyushüo, “Ibrinyu hidan le hika nyuthyü bin nla?” tse ketsoshü. Achish le zoshü, “Hile David, Israel raja gü Saul hensin nyu keda nyu nme le. A-le jon kethon azen bin laso.A-le aki keryü nyü ryü nthu keti ale a-nmulo kegwa thame thyüshü mvu,” tson shü.

⁴Ai Filistian nyu kedanyu jule Achish ge anyugun nyuntao a-ka zoshü, “Temi tsügü ninipe nle pe a-ketsü rünyi ki shüla lo. A-no ngun zen teribin nyu gü nya; terithyü nsen a-le ngun ntsun so-e sha loho. A-le a-npugü kenyü thyüni lo nrün genyu ngun temi no sila mvuti ole?

⁵Tsünyeki, hile David tenunyu dan le dathyüo Saul le yie yie dushvulo ai David we yie tseryü dushvulo le tse lüron kehü güle.”

⁶Achish le David koshüo a-ka zoshü, “Ale rhün kehü Israel nyu Sunggigü zan nyu nle amhundyü ka njü le tse swe bin nle; lo ale nno azen gü terithyü kethyü le akendo le. Nle aki keryü nyü gerho ale nkemu nme hyumvu. Ai raja kecha jule nno gü kethyü anyugun kendo mvu.

⁷Tsügenyu nnyu bwen-o kaki rani lalo, lo anyugun kenyükemvu nme thyü nya.”

⁸David le zoshü, “Ale nyuthyü züla ola, Kedagü? Nle kezo hontse, ale ryü nlothyü keso gerho nle akemu nme hyulo mvu yatselo, nyuthyüo ale nzen gü a npugü, raja shwikerüchün nyu zen kega mvu tila?”

⁹Achish le a-jokenishü, “Ketsin le, a mhundyü nyu nle Sunggigü jolonyu hontse kemu ndi letse rüchün. Ai raja kecha jule nno agun zen-o terinyu gülo nrün ndi letse zo laso.

¹⁰Tsügenyu David lonyü ki hagun Saul kheo aki keryünyu aphu nshwe so-o tsangben shü ntsin tinla tanye.”

¹¹Tson-o David lo a-temi dan le lonyü nshwe ranio Filistian ki ryüla; lo Filistian nyu le Jezreel ki güla.