Read Southern Rengma Naga 1 SAMUEL 3 Bible Online

1 SAMUEL 3 - Southern Rengma Naga bible

1 SAMUEL 3

¹Ponyu gü Samuel le Eli hensin nyu Npugü lothyü kehü gwenkho katsü Npugü ki jolo keryü le rho lo a-ki tsemi kehyu le rhosa.

²Khenyüme Eli a-yhütyü thahyu mvu güzhü kela gü tsüle a-katsen nyu zhübin;

³lo Samuel le Kejozenkelo Khinpha Kenshün gü le kebin kerüshvu ka günyu zhübin. Tsangkeben münki, Makhin nben binzun ketseka,

⁴Npugü le Samuel koshü. Tsontsin a-le, “Whe, kedagü,”

⁵tson-o tin-o Eli ki gü a-ka, “Nle ako keshü, ale hika bin nle.” Ai Eli le, “Ale nkoshü mvule, nzhü ki nigü lalo.” Tson-o Samuel le a-zhü ki nigü la.

⁶Npugü le Samuel ko nishü. Ntsenyu gü le himhundyü Npugü le a-nthon kemvuzun genyu tsüle Npugü tse kethyü shamvu. Tsügenyu a-le so-o Eli kigü a-ka, “Nle ako keshü, ale hika bin nle.” Ai Eli le zoshü, “Anyugü ale nko mvu le; nzhü ki nigü lalo.”

⁸Npugü le gwenshen gü Samuel koshü; a-le so-o gü Eli ka zoshü, “Nle ako keshü ale hika bin nle.” Tsüselo Eli le ntsenyu gü ko kebin tsüle Npugü le tse shalo,

⁹tson-o a-ka zoshü, “Nzhü ki nigü lalo; lo nko nishü lo, `Zoshülo, Npugü ngo gü le nyübin nle,” tson shülo. Tsüselo Samuel le zhü ki nigü la.

¹⁰Npugü le tsüka ryü solo njüo n hüka hontse, “Samuel! Samuel!” tse shü. Samuel le a-jokenio, “Zoshülo, ngo gü le nyübin nle.”

¹¹Npugü le a-ka zoshü, “Khenyüme ale Israel temi ge tha peha thyüshü ti, tsüle ketetsin thyüo tsü rüla shakelo nyu aphu kekerü thyü lati.

¹²Tsügenyu ale Eli kaminyu kentsun rüla zokenjü tsü aphu thyüti, kerika gü kenkhin keti.

¹³Anyuhvu le gwakemvu zo a ntsun kethyü genyu ale kethonthen shaja pe a-kami tsüti ale a-ka zoshü laso. Eli le au le tsüthyü kebin sha, ai au khinla mvu.

¹⁴Ale sweo Eli kaminyu ka zoshwishü laso, kerüshvu nmvue tha hokeshü nme-e kemu kenrin kethyü hidan chün sentinla loho.”

¹⁵Samuel le tsangben kemvuthen zhünyu bin; tson-o so Npugü ka gü kakhin she shü. A-le tsemi kehyu Eli ka zo nshvubin.

¹⁶Eli le a-ko-o, “Anyu, Samuel!” Tsontsin, samuel le, “Whe, kegagü,” tsonshü.

¹⁷“Npugü le nka nyuzo shüla?” tse Eli le a-ketso shü. “Thame a kebu nyalo. A-le nka kezo aphu pe aka zoshü mvulo Sunggigü le shaja kerü pe ntsü ti.”

¹⁸Tsüselo Samuel le aphu pe a-ka zoshü; a-le thame zomvu lamvu. Eli le zoshü, “A-le Npugü; a-mhundyünyu nyu le gwatsin yo a-le tsüthyü ti.”

¹⁹Samuel le min soryü, Npugü le a-zen hüo Samuel le kezo aphu ketsin thyülo.

²⁰Tsügenyu Israel nyu kazü nmezin gü kechazin keti temi aphu Samuel le Npugü Sidyükeshanyu nme tse sha lola.

²¹Npugü le Samuel yhühyu thyüo a-nthon keshü hontse Shiloh nyu a-npvü a-khipe tesha shüzin hü. Lo Samuel le zoshü lo Israel nyu aphu a-khwenyü hü.