Read Southern Rengma Naga 1 SAMUEL 30 Bible Online

1 SAMUEL 30 - Southern Rengma Naga bible

1 SAMUEL 30

¹Jon hvu siki David lo a-temi dan le ryü Ziklag tilo. Lo Amelek nyudan le Judia tesin kipon nyu lo Ziklag tse hüla. Anyugun le rünyi dan rola,

²lo tenunyu dan aphu ten zen tinla, anyugun le temi nme dushvu mvu; ai aphu tenzen tinla.

³David lo a-temi dan le gunryü laryü rünyi gü rola, lo anyugun nunyu, lo anyugun nyenyu peche tenu aphu tenzen tin kela hyulo.

⁴Tson-o David lo a-temi dan le chüo anyugun kekvu ndi shüla kemvuthen khemvula.

⁵David nu Ahinoam lo Abigail au ko tenzen tinla.

⁶David le anyun kenjün thyüsa lola, a-temi dan aphu anyugun nyenyu ndi kela genyu anyugun nyunta sao tso pe a-jon titse lo kela genyu, ai Npugü a-Sunggigü le a-nyun thyü kepeche shü.

⁷Tson-o David le Ahimelek nyugü püshükeda gü Abiathar ka, “Ephod sen aki ryülo,” tse zoshü, lo Abiathar le tsü senryü a-tsüshü.

⁸David le, “Ano hidan hügü le nnya mon? Ale anyugun hülo tile mvula?” tse Npugü ketsoshü. Tsontsin a-le zoshü, “Anyugun then gülo, nle anyugun hü loti lo do tenzen kehü dan kenishwishü loti,” tsonshü.

⁹Tson-o David lo a-temi tsi tsero dan le tsonchü shü. Besor rinyu gü tikelo ka anyugun peha le tsüka bin tinla.

¹⁰David le temi tsizi zen-o tsonchü nishü, tsüka kecha tsi hvu dan le ho ritsin lao rinyu gü nken lohao bin tinla.

¹¹David zen kehü dan le low nyu Ijipt nyu ponyu nme hyulo-o zen David kiryü. Anyugun le tensü, zü,

¹²kherosha kenko lo vainsha kenko chwehvu pe a-tsüshü. A-le tsü tyükelo siki nkolo; a-le jonshen shü thame tyütsü mvukela genyu.

¹³David le, “N npugü le segü lo nle dikipon ryüyo?” tse ketso shü. Tsontsin a-le, “Ale Ijipt nyu lo ale Amelek nyu nme go thyü hü nle.” “Ale holo kela genyu a npugü le akhe kela nthu jonshen thyüla sele tse zoshü.

¹⁴Agun le nshegü Judia tesinzin Chereth nyu lo Kaleb pvüphun lojvü dan hü, lo Ziklag rola le.”

¹⁵David le, “Nle azen gü temi tsüdan ki gü tile nmvula?” tse ketsoshü. A-le zoshü, “Nle a dushvula nmvue akhipe a npugü ben nyu shüla loho tse Sunggigü zan nyu n johoshü laya tse kethyü we ale güti.”

¹⁶Tson-o a-le David zen tsüdan ki gü. Anyugun le Filistian lo Judia ki mehon kechon jünsen keryü genyu shekerhün thyü nrenruo tyütsü bin.

¹⁷Tsüsinyü lonyü nshwe ka David le anyugun wheo kega gü ngwen güti. Selo temi tsizi le ut ge dun-o tinkela tsü nyeki nme no tin lamvu.

¹⁸Tson-o David le Amelek nyu le zentin kela temi aphu lo kanyü pfütin kela aphu hyuni lola, a-nu hvu sin-o;

¹⁹thame-e nmhe lamvu. David le Amelek nyu le a-temi dan nyenyu peche lo tenu zentin kela lo kanyü pfütin kela aphu khini lola.

²⁰A-le tanyü lo senru dan ko aphu hyuni lola; a-temi dan le senru tsü aphu hü anyugun mhundyü rio, “Hile David honle!” tse zoshü.

²¹Tsüselo David le kvumvu shü lao a-zen gü mvuo Besor rünyi ka bin tin kela temi tsihvu dan ki rani gü. Anyugun le David lo a-temi dan teno titse chwiryü, lo David le anyugun ki nsin gü shekerhün thyü anyugun kelushü.

²²Ai David zen gü kethyü temi serikemvu nyu peha le zoshü, “Anyugun le ngun zen gü mvu laso, tsügenyu tha hyukelo dan nme-e pe anyugun tsü loho. Anyugun no anyu nunyu lo anyugun nyenyu zenlo-o tin lalo,” tsonshü.

²³Ai David le zoshü, “Asikezen nyu dan, Npugü le nyu pe ngun tsüshü yo, hagun le pe tsü hontse lo nrün ndi! A-le ngun kenishü lo shwikerüchün nyu sokvukelo pe ngun tsüshü laso.

²⁴Hagun le nyu zobin yo temi nme ai tsüle a-kendo kemvui le! Aphu no kenjün ketun mvulo shvu: ligü higü kanyü khwebin tin kela nyu kono terinyu kegü nyu jün kenme tse hyu loti.”

²⁵David le tejvü higü thyüshü, lo tsü gerho nyu Israel nyu le tsüthen hü nyo.

²⁶David le rani Ziklag nyu ryü kelo ka, terinyu hyukelo peha pe a-pvünyu Judia nyu sharhi ju tsüo, “Hika Npugü shwikerüchün nyu hon sekelo peha nipe ntsüshü bin nle,” tse jolo nishü.

²⁷A-le tsü nipe Bethel nyu temi, Judia tesinzin Ramah nyu temi lo Jattir rünyi dan ka temi dan tsüshü,

²⁸Aroer, Siphmoth, Eshtemoa,

²⁹lo Racal; Jerahmeel pfüphun, Kenitnyu,

³⁰lo Hormah, Borashan, Athach rünyi nyu temi dan,

³¹lo Hebron nyu. A-le tsü nipe a-le lo a-temi dan le ho kehü bin aphu ka shü.