Read Southern Rengma Naga 1 SAMUEL 31 Bible Online

1 SAMUEL 31 - Southern Rengma Naga bible

1 SAMUEL 31

¹Filistian nyu le Gilboa kazüthun ge Israel nyu zen terithyü. Tsüka Israel nyu kechon gala, lo a-sen le raja Saul lo a-nyudan sin-o tinla.

²Ai Filistian nyu le anyugun hü lo njüo Saul nyu mishen, Jonathan, Abinadab lo Malchishua tse gala.

³Teri gü le rüsa tse Saul hun lola, tson-o shwikerüchün nyu tho le a-shwe-o jün sala.

⁴Tsügenyu a-le a-terikanyü pfü kehü selo güka, “A-girü kemvu Filistian nyu noryü ajenshvu lamvu nrün genyu nzhethon thope adushvu lalo,” tse zoshü. Ai selo güle tsüthyü nshvu ritsin la. Tsüselo Saul le a-npvü a-zhethon tholo njüo tsügü tsü ge yhe la.

⁵Selo gü ko Saul le sikela hyushüo tsügü a-npvü a-zhethon ge yhe-o Saul zen-o sila.

⁶Tsü hontseo Saul, a-nyu mishen lo selo gü le sila; Saul temi aphu tsünyü sila.

⁷Jezreel ketejon lizin kebin nyu lo Jordan nphozin kebin Israel nyu dan le Israel nyu rihü le tinla tson_o Saul lo a-nyu dan ga kela nyülo ntsin anyugun le rünyi khe lao tinla. Tson-o Filistian nyu le ryü tsü nkhe lola.

⁸Terithyüo sendu gü Filistian nyu le simin dan ge kanyü yhünlo titse ryüo Saul lo a-nyu mishen le Gilboa kazüthun ge si kebin hyulo.

⁹Anyugun le Saul pe gwenlo, a-terikanyü dan yhünlo njüo shekerhün jolo gü pe Filistian aphu nyu anyugun tero dan lo temi dan ka zoshü lotse lilo nishü.

¹⁰Tson-o anyugun le a-terikanyü pe terogi Ashtarte kerüshvuka nyu shüla lo a-min pe Beth Shan nyida gü chwida ge yhe la.

¹¹Gilead ki Jabesh temi dan le Saul pe dihontse layo nyü kelo ka,

¹²temi kepeche tsin dan le khensin tsonchüo Beth Shan kiryü. Anyugun le chwida ge Saul lo anyu dan khishe lo-o pfüryü Jabesh ki rola.

¹³Tson-o a-ru dan pe rünyi nyu tamarisk bin phaka sun lao jon tsenyü yün.