Read Southern Rengma Naga 1 SAMUEL 4 Bible Online

1 SAMUEL 4 - Southern Rengma Naga bible

1 SAMUEL 4

¹Tsügwenkho ka Filistian nyu le gü Israel nyu zen terithyü titse kequen lola, tsügenyu Israel nyu ko anyugun nren titse chwi. Israel nyu le Ebenezer ka lo Filistian nyu le Aphek ka tse kensenbin thyü lo.

²Filistian nyu le a-nyu whe lo kenren sao Israel nyu so kvulo lao teribin nyu temi yie zi kho dushvu la.

³Rhünkelo dan le rani kensenbin nyu keryü ka, Israel nyu sharhi ju le zoshü, “Nyuthyüo Npugü le nthu Filistian nyu no ngun so kvula yo? A-no ngun zen gü ngun shwikerüchün nyu ben nyu ngun kenishü nrün genyu Shiloh ki gü Kejozenkelo Khinpha gü senryü lo.”

⁴Tson-o lilonyu nipe Shiloh ki shüo Kekvutsin Npugü cherubim hvu jaka rajabin ge kebin Kejozenkelo Khinpha gü senryü. Lo Eli nyu hvu Hophni lo Phinehas au le Kejozenkelo Khinpha gü zenryü.

⁵Kejozenkelo Khinpha gü senryü ntsin, Israel nyu le shekerhün thyü nra sen pe kazüe nnu la.

⁶Filistian nyu le kenrakhwe gü nyü lo-o zoshü, “Ibrinyu kensenbin nyu nrakebin nyüshülo! Tsüle a-kon le nyu la?” Anyugun le Npugü zen Kejozenkelo gü le ryü Ibrinyu kensenbin tilo kela shalo-o,

⁷anyugun le nshvuo zoshü, “Tero nme le anyugun kensenbin ka ryü laso! Ngun we thyülo tiso! Himhundyü ngun ge thame hihontse thyü mvuzun!

⁸Tero tsühontse kethyü ben ka segü le ngun kenishü tila? Tero tsüdan le kazü kesiki Ijipt nyu dushvu la!

⁹Filistian nyu dan, pechelo! Pechenyu hontse kenren lo,nmvulo anyugun le ngun do thyü kehü hontse Ibrinyu do thyü tiso! Tsügenyu pecheo kenren lo!”

¹⁰Filistian nyu le terithyü sao Israel nyu so kvulo la tson-o a-sen le tin anyugun ka ki gunla. Tsünyu temi dushvu sala. Israel nyu shüpahü yie shenryü dushvula.

¹¹Sunggigü zen Kejozenkelo Khinpha khilo la lo Eli nyuhvu Hophni lo Phinehas au ko dushvu la.

¹²Bejamin tsipwen nyu nme le teribin nyu tin sen-o tsünyu ryü Shiloh tilo. Anyu gwamvu kebin tsinshü nrün genyu a-phi sürhen lo nnyo pe a-pe ge shü pfü tse ryü.

¹³Eli le Kejozenkelo Khinpha gü rüchün pe anyunkhi sa-o tson teka khün nme ge dun-o pen ton bin. Temi gü le jolo gü zope kesü thyü shü ntsin aphu nshvuo chü sola.

¹⁴Eli le kechü khwe nyülo njüo, “Hile nyukhwe ola?” tse ketso shü. Temi gü le whütse Eli ki gü tha rüla gü zoshü.

¹⁵(Tsüle Eli le chen henteküo tetse thyüla lo tha hyumvu shü güjü laso.)

¹⁶Temi gü le zoshü, “Ale terinyu tinchwi lo-o nthu ryü bin nle.” Eli le ketso shü, “Dihontsela anyu gü?”

¹⁷Jolo senkeryü güle a-jokenio, “Israel nyu le Filistian nyu mhundyü tinla; ngun nke sa laso! Tsüntimvu le nnyuhvu Hophni lo Phinehas au ko dushvu la lo Sunggigü zen Kejozenkelo Khinpha gü ko khilo laso!”

¹⁸Temi güle Kejozenkelo Khinpha gü zoshü ntsin, Eli le Khinrun khoka a-khün ge dun kebin keli tsüla. A-le püshü sa lao aphu nsu kela genyu chetsügü a-gunda shwese lao sila. A-le chen henzi Israel nyu sharhi thyü.

¹⁹Eli mogü Phinehas nu le nyunphu pfüo nnyugwa gü zhüla. A-le Sunggigü zen Kejozenkelo Khinpha mele khilo kela lo A-min lo a-nyepvü au kesi rüla nyükelo ka, a-gin thyülo njüo nnyu shü.

²⁰Tson-o sigü jü kela ka a-shwikebin tenunyu gü le a-ka zoshü, “Pechelo! Nle Pechenyu nme nnyu lo laso!” Tson shüe, a-le thame rüchün shü nmvue zomvula.

²¹Tenunyu tsügi le ntsenyu gü zan pe Ichabod tholo, a-le zo-o, “Sunggigü zankechwi le Israel nyu dan nyu tin laso.” — Kejozenkelo Khinpha gü khilo kela lo a-min lo a-nyepvü au kesi zo-o,

²²a-le zoshü, “Sunggigü zan Kejozenkelo Khinpha gü khilo kela genyu Sunggigü zankechwi gü le Israel nyu dan nyu ndi laso.”