Read Southern Rengma Naga 1 SAMUEL 6 Bible Online

1 SAMUEL 6 - Southern Rengma Naga bible

1 SAMUEL 6

¹Npugü Kejozenkelo Khinpha gü le shye tsenyü Filistian ki bin kela siki,

²temi dan le püshükeda ju lo jadonyu ju koshüo anyugun ka ketsoshü, “Ngun Npugü Kejozenkelo Khinpha gü pe nyuthyü la mon? Ngun le tsü ninipe a-bin ki shü yatselo, ngun le nyu nipe then shü tila?”

³Anyugun le zoshü, “Hagun le Israel nyu Sunggigü Kejozenkelo Khinpha gü nishü tiya tselo hagun kemu pu ketha jwe pe sin shü mvutse Kejozenkelo Khinpha npvü no rani gü nya. Tson yatselo hagun le pon loti, lo nyu genyu a-le shaja pe hagun tsü bin yo sha loti.”

⁴Tsüka temi dan le ketsoshü, “Agun no nyu jwe nipe a-tsü tila?” Tsontsin anyugun le zoshü, “Suna pe kinthyü pvün lo tepfü pvün tse chalo. nmeme le Filistian raja nme genyu. Keha gü nipe hagun aphu lo raja pvün ju ge shükela genyu.

⁵Hagun le hagun kazü nke kebin kinthyü lo tepfü zansü hidan thyülo, lo hagun le kerühvu pe Israel Sunggigü tsü mvu loshvu. Tsonyatselo a-le shaja pe hagun, lo hagun tero lo hagun kazü tsü mvula ti ado.

⁶Hagun nyuthyüo Ijipt nyu raja gü lo a-temi dan hontse nyunrü bin tila? Israel nyu hoshü kemvuthen anyugun nchündyü yo nmhinla nya.

⁷Tsügenyu kerugari keshün nme chalo lo gunda kekhe pe a-ge shüshwi kemvu methu tsü kenyhun zenryü no kerugari gü sülo lo a-nyuhvu zen gü a-bin ki shüla.

⁸Tson-o Npugü Kejozenkelo Khinpha pe kerugari ge shülo lo hagun kemu pu ketha jwe suna pe cha kelo tsü pe khinpha nme ka shü pe tsü teka shülo, tson shüo no pfü a npvü gunlo.

⁹Tsüle dihontse gü tiyo nribin; Bethshemesh rünyi denzin gü yatselo tsüle Israel nyu Sunggigü le kenke ketetsin higü nipe ngun ge shü bin nyo. Ai nmvu yatselo, keha gü tsüle a-le nishü mvue a-npvü nge keryü gwenzin.”

¹⁰Tsügenyu anyugun ka zokeshü hontse thyüshü: anyugun le methu tsü kenyhun zenryü kerugari ge dyüshü; lo anyu hvu pe a-bin nyu khinla.

¹¹Anyugun le Kejozenkelo Khinpha gü pe kerugari gü ge shülo, lo suna pe tepfü lo kinthyü cha kelo pe keshü khinpha gü ko pe shülo.

¹²Methu hvu le Bethshemesh tson then njü gunla. Filistian raja minpvün jule then gü Bethshemesh terhi ti.

¹³Tsüka Bethshemesh nyu le kazü ketejon ki thoshe lowgvü bin-o nrishü laryü Kejozenkelo Khinpha gü hyushü. Anyugun le tsü hyu pe anyugun sherhün sala.

¹⁴Kerugari gü le Joshua tse kethyü Bethshemesh nyu keyhun nyu nme low ka ryüo tsonye keda nme khoka sun tinla. Temi dan le kerugari sen dukha lo methu tsü hvu dushvulo tson-o rope ker"shvu thyü pe Npugü kishü.

¹⁵Levinyu jule Npugü Kejozenkelo Khinpha gü lo suna pe kecha le a-nyu kebin khinpha gü tse pen pe tsonye keda gü ge shüla. Tson-o Bethshemesh temi dan le rope kerüshvu lo kerüshvu kecha thyü pe Npugü kishü.

¹⁶Filistian raja pvün jule anyugun le hithyü kebin shwishüo tsünyü ranio Ekron ki gunla.

¹⁷Filistian nyu le anyugun kemu pu ketha jwe suna pe kinthyü kecha pvün nyida hidan genyu nmeme nishü, Ashdod, Gaza, Ashkelon, Gath lo Ekron.

¹⁸Lo anyugun le suna pe kecha tepfü ko Filistian raja pvün jule a-so gon kebin chwida khwen pe hun lo chwida kendi nyishwe nyu rünyi nme ka nme khishü. Bethshemesh ka Joshua low nyu tsonye keda, anyugun le Npugü zen Kejozenkelo Khinpha pe a-ge keshü gü tsüle tsüka nyuthyü layo nthu keti tsüka shahu thyü bin.

¹⁹Bethshemesh nyu le Kejozenkelo Khinpha gü nyuzin nri kethyü genyu Npugü le anyugun temi hentsenyü boshvula. Lo Npugü le anyugun dan nyu tsühontse temi kechon boshvu kela genyu temi dan le chechü.

²⁰Tsüselo Bethshemesh temi dan le zoshü, “Segü le kenshün Sunggigü, Npugü higü mhundyü ka sobin lo tila? A-no ngun nrhila nrün geyu a-nipe dikipon shü mon?”

²¹Tson-o anyugun le lilo nipe Kiriath Jearim ki shüo, “Filistian nyu le Npugü Kejozenkelo Khinpha rani shü laso. N shyeryü pen lolo.”