Read Southern Rengma Naga 1 SAMUEL 7 Bible Online

1 SAMUEL 7 - Southern Rengma Naga bible

1 SAMUEL 7

¹Tson-o Kiriath Jearim temi le ryü Npugü Kejozenkelo Khinpha gü sen gü Abinadab, tse kethyü rincho ki yhun kehü nyu nme kanyu shüla. Anyugun le a-nyu gü Eleazar thyükenshün pe tsü kentsen gü thyüshü.

²Npugü Kejozenkelo Khinpha gü le Kiriath Jearim ka bin thon la, chen nki kho. Hi gwenkho ka Israel nyu aphu Npugü ka keche hio chü.

³Samuel le Israel temi dan ka zoshü, “Hagun le hagun nyu aphu sen Npugü kipon ryü tiya tselo, hagun le sinrünyi gü tero aphu lo terogi Asharte men khela mvulo shvu. Hagun npvü hagun khikho shüpe Npugü tsüo a-nti rüshvu yatselo, a-le Filistian nyu ben nyu hagun kenishwi shüti.”

⁴Tson-o Israel nyu lo anyugun tero Baal lo Asharte men dan khe lao Npugü nti rüshvu.

⁵Tsüselo Samuel le me nishüo Israel nyu aphu kope Mizpah ka keteno-o, “Ale tsüka hagun genyu Npugü ka hiti,” tse zoshü.

⁶Tson-o anyugun aphu Mizpah ka kequenlo. Anyugun le zülü pfü ryü tsü ja pe Npugü rüshvuo tsünyü jon gwen yün. Anyugun le zoshü, “Agun le Npugü mhundyü ka mu laso.” (Samuel le Israel nyu kekevü kerapen shü kehü tsü le Mizpah ka.)

⁷Israel nyu le Mizpah ka kequen kebin Filistian nyu le sha lo ntsin, anyugun whe nrün genyu Filistian raja pvün jule anyugun temi zen-o tsonchü shü. Israel nyu le tsü rüla shalo njüo nshvu lao,

⁸Samuel ka zoshü, “Npugü ngun Sunggigü no Filistian nyu ben ngun kenishü nrün genyu hizin binlo.”

⁹Samuel le tanyü nyu nme dushvu lo-o apentha rope kerüshvu thyü pe Npugü tsü. Tson-o a-le Npugü no Israel nyu cheshülo tse kehithyü, lo Npugü le a-kehi kenishü.

¹⁰Samuel le kerüshvu gü thyü kebin ka Filistian nyu le anyugun whe ryü; ai tsü gwenkho ka Npugü le Tsangge tsangsen pe anyugun ntsun shü. Tsontsin anyugun le kevükeben lo nshvuo tinla.

¹¹Lo Israel nyu le Mizpah nyu chwiryü Filistian nyu hüo, tson nenyu anyugun ga gü Bethkar ti kesa la.

¹²Tsüselo Samuel le tso nme pe Mizpah lo Shen au janyu sen-o zoshü, “Tson then Npugü ale ngun cheshü le”— tson-o tsü zan tho pe “Kekeche Tso,” tse kolo.

¹³Tson-o Filistian nyu nyekvulo lo Samuel le yhun kebin then Npugü le anyugun khin lao no Israel nyu kazü hü mvula.

¹⁴Ekron kagü Gath keti janyu Filistian nyu le lolo kela rünyi aphu rani pe Israel nyu tsüla, tson-o Israel nyu le a-kazü aphu rani lola. Lo Israel lope Kanan nyu au janyu ko gwaketho le bin lo.

¹⁵Samuel le a-yhun then Israel nyu sokeda thyü.

¹⁶Chen kechwi a-le ho gun gü Bethel, Gilgal lo Mizpah bin hidan ka kekevü kerapen shü hü.

¹⁷Tson-o ranio Ramah ki a-kanyu gun lahü, a-le tsünyu mejün kekera gü thyü hü. Ramah nyu a-le Npugü kershvubin nme thyü shü.