Read Southern Rengma Naga 1 SAMUEL 8 Bible Online

1 SAMUEL 8 - Southern Rengma Naga bible

1 SAMUEL 8

¹Samuel le püshü kela siki a-le anyuhvu no Israel nyu dan nyu kerathünyu thyü shü.

²Püshü gü zan le Joel lo nche gü zan le Abijah; au le Beersheba ka kerathü thyü hü.

³Ai au le au pvü tsinhi then mvu; au le pisa nti tepen-o meka jvüjwe khilo lo kenjü nyu jopen shü mvula.

⁴Tsontsin Israel nyu sharhi ju aphu kequen lo-o Ramah nyu Samuel kiryüo,

⁵a-ka zoshü, “Hire, nle then bin laso lo nnyu hvu le nle tsinhi keshü then mvu. Tsügenyu senye kecha le sen kehü hontse raja nme kejü shüo no agun sa gon-o raja thyülo.”

⁶Anyugun le raja nme kehi tsü Samuel le a-kenyü mvula; tsü genyu a-le Npugü ka hisihü,

⁷lo Npugü le zoshü, “Temi dan le nka kezo aphu nyü shülo. Anyugun le n npvü nkhe lamvu; anyugun le pe anyugun raja thyü mvuo khe kela gü tsüle Ale le.

⁸Ale Ijipt nyu anyugun zen chwikeryü ka ryü nthu keti anyugun le akhe lao tero kecha rüshvu hü, lo anyugun le a-zintse age thyü kehü ntsoka nge thyü bin nyo.

⁹Tsügenyu anyugun khwenyü shü, ai anyugun no petsü salo lo anyugun raja le anyugun ge dihontse tiyo zokegwa thyü pe anyugun hishü lo.”

¹⁰Samuel le raja hikebin temi dan ka Npugü le a-ka zokeshü aphu pe zoshü.

¹¹“Hagun raja le hagun ge hihontse thyüti,” tse Samuel le zoshü. “A-le hagun nyu peche dan pe shüpahü thyüti; peha le a-teri gari nyu lothyü, peha le kerugekebin shüpahü, lo kechanyu le a-kerugari mhundyü tin gun ti.

¹²Anyugun peha pe yie so keda lo peha pe henpvün so keda thyüti. Hagun nyu peche dan le a-lo tso, a-lo gvü, a-terikanyü dan thyü lo a-kerugari kanyü dan thyüti.

¹³Hagun nyu tenunyu dan le a-genyu tharün kegwa thyü, a-kebonkeni lo a-tensü roti.

¹⁴A-le hagun low, vainlow lo oliv bin kegwa dan khipe a-hensin keda nyu ju tsüti.

¹⁵A-le hagun shye lo vainsha tseryü ka Jünme khipe a-kanyu keda nyu lo keda nyu kecha dan tsüti.

¹⁶A-le hagun gonyu, hagun thu kegwatsin lo hagun gada dan pe a-tho thyüti.

¹⁷A-le hagun senru tseryü ka jünme loti. Lo hagun ko a-go thyüti.

¹⁸Tsügwenkho le ryülo, hagun le hagun npvü kejü kelo hagun raja agenyu hagun kenya sa soti, ai hagun le kenyakebin tsü Npugü le nyüshü loho.”

¹⁹Tson-e temi dan le Samuel khwenyü mvuo, “Nmvu! agun le raja nme lonyü bin nle,” tse zola,

²⁰tson-o agun ko senye keda dan hontse agun raja no agun sa gon, agun tsonrio terinyu lo teribin nyu gü kega tile.”

²¹Samuel le anyugun le kezo jo aphu nyüshüo gü Npugü ka zoshü.

²²Npugü le a-jokenishü, “Anyugun le nyu lonyü bin yo thyüshü lo anyugun raja nme pe tsü shülo.” Tson-o Samuel le Israel nyu aphu no rani kaki gunla lotse zoshü la.