Read Samo, Southern SGK 11 Bible Online

SGK 11 - Samo, Southern bible

SGK 11

¹Kanaa minbuiinin tumaa na á goã boo diɛ ka bɔlɔ goon ne.

²Ǹ bɛ́ ǹ nə́ soo lɛ̀giala-n, ǹ nə́ diə fúlu gole kɔ́n yɛ *Baabilonii gána nɛ, ǹ nə́ giã walan.

³Ǹ nə́ pɛ kɔn nɛ kɛnɛn: «Haya, ka yoo wɔ toopaa bɔ, wɔ tã sɔnbɔraanɛ.» Toopaa lɛ na á ǹ kion dɔ ǹ kɔlɔ baa, tii gondɛnaa dɔ ná a dɔ ǹ tii baa.

⁴Ǹ nə́ tɔ́n pɛ kɔn nɛ doo: «Ka daa wɔ kiwi koa, wɔ sanabolo dɔ a nɛ, yǎa a mìi la doe Lawa ganaa! Ka daa wɔ n dinin tɔ bɔ, màn mɛn bɛ́ toɛ, wɔ baran sasawaa tán la bǎã tumaa nɛ, wɔ n bɔ kɔn ganaa wa.»

⁵Minin lɛn bɛ́ kiwi mɛn laanka sanabolo mɛn doe, Dɛnaa gisĩ á ga a ganaa.

⁶Bɛ kio, Dɛnaa tɔ́n pɛ: «Áh! Ǹ dinin tumaa n tɔrɔ goon, man bɔlɔ goon pii, ǹ nya ǹ dí bibinaa nə ka kɛ-n gɔrɔ. Bɛ̀ masɛ kɛ da ǹ gɔn lɛ-a, ǹ ba re ǹ zɛnaa n sii kɛ kɔ́n kiɛ wa.

⁷Haya! Ka daa wɔ gisĩ, wɔ ǹ bɔlɔ lɔlɔkɔn, màn mɛn bɛ́ toɛ, ǹ baran kɔn a boo giala ma doo wa.»

⁸Dɛnaa nə́ ǹ sasawaa kɔn walan, ǹ nə́ woo kanaa paǹ tumaa nɛ, ǹ nə́ kiwi lɛ a doe lɛ da.

⁹Bɛ lɛ nɛ, ǹ nə́ bɛa kiwi lɛ tɔ kɔ mà Baabeli (bɛ giala mà "Lɔlɔkɔn"), a giala, Dɛnaa na á kanaa minin tumaa bɔlɔ lɔlɔkɔn walan, á ǹ sasawaa kɔn á ǹ bɔ walan, ǹ nə́ woo kanaa paǹ tumaa nɛ.

¹⁰Sɛmu tɔrɔn sɛ́wɔ á ke: Sɛmu a yɛ lɛ̀ paabiɛ nɛ, á Arpaksaadi yɛ, bɔ̀n da ǹ mu gole lɛ a kiɛ̃ kio lɛ̀ paa.

¹¹Arpaksaadi a yɛ kio, Sɛmu wusoo á lɛ biɛsooro (500) zɛnaa kanaa. Á nɛgiĩ kɔsɔn laanka nɛlɔn yɛ.

¹²Arpaksaadi a yɛ lɛ̀ pɔsɔɔwensooro ne, á Selaa yɛ.

¹³Selaa a yɛ kio, Arpaksaadi wusoo á lɛ̀ biɛsii ka sɔɔ (403) zɛnaa kanaa. Á nɛgiĩ kɔsɔn laanka nɛlɔn yɛ.

¹⁴Selaa a yɛ lɛ̀ pɔsɔɔ nɛ, á Ebɛɛrɛ yɛ.

¹⁵Ebɛɛrɛ a yɛ kio, Selaa wusoo á lɛ̀ biɛsii ka sɔɔ (403) zɛnaa kanaa. Á nɛgiĩ kɔsɔn laanka nɛlɔn yɛ.

¹⁶Ebɛɛrɛ a yɛ lɛ̀ pɔsɔɔwensii, á Pelɛɛgi yɛ.

¹⁷Pelɛɛgi a yɛ kio, Ebɛɛrɛ wusoo á lɛ̀ biɛsii ka pɔsɔɔ (430) zɛnaa kanaa. Á nɛgiĩ kɔsɔn laanka nɛlɔn yɛ.

¹⁸Pelɛɛgi a yɛ lɛ̀ pɔsɔɔ, á Rewu yɛ.

¹⁹Rewu a yɛ kio, Pelɛɛgi wusoo á lɛ biɛpaa ka manangɔrɔ (209) zɛnaa kanaa. Á nɛgiĩ kɔsɔn laanka nɛlɔn yɛ.

²⁰Rewu a yɛ lɛ̀ pɔsɔɔwenpaa, á Serugu yɛ.

²¹Serugu a yɛ kio, Rewu wusoo á lɛ̀ biɛpaa ka sɔbaa (207) zɛnaa kanaa. Á nɛgiĩ kɔsɔn laanka nɛlɔn yɛ.

²²Serugu a yɛ lɛ̀ pɔsɔɔ, á Nahɔɔrɔ yɛ.

²³Nahɔɔrɔ a yɛ kio, Serugu wusoo á lɛ̀ biɛpaa (200) zɛnaa kanaa. Á nɛgiĩ kɔsɔn laanka nɛlɔn yɛ.

²⁴Nahɔɔrɔ a yɛ lɛ̀ fuəwenmanangɔrɔ á Teraa yɛ.

²⁵Teraa a yɛ kio, Nahɔɔrɔ wusoo á lɛ̀ paabiɛ ka fulumanangɔrɔ (119) zɛnaa kanaa. Á nɛgiĩ kɔsɔn laanka nɛlɔn yɛ.

²⁶Teraa a yɛ lɛ̀ pɔsɔbaa, á Abramu yɛ, ka Nahɔɔrɔ nɛ ka Aaran nɛ.

²⁷Teraa tɔrɔn sɛ́wɔ á ke: Teraa na á Abramu yɛ, ka Nahɔɔrɔ nɛ, ka Aaran nɛ.

²⁸Aaran na á Lɔti yɛ. Aaran sɛ gã ǹ di Teraa nyɛɛnɛ, ǹ dinin gána nɛ Baabilonii, ǹ dinin kiwi Uuru.

²⁹Abramu laanka Nahɔɔrɔ lɔn wɔ. Abramu a lɔ tɔ mà Sarayii. Nahɔɔrɔ wɔ tɔ mà Milkaa. Aaran a nɛlɔ n ka Milkaa nɛ, Iska dɔ na a nɛ lɛa.

³⁰Nɛ goã Sarayii lon wa, a giala, a na á goã lɔ nɛ-yɛle baãnaa lɛa.

³¹Teraa yoo kun ka a nɛgiĩ Abramu ni, ka a nɔ̀ɔn Lɔti ni, Aaran a nɛ lɛ, ka ǹ manaa Sarayii ni, a nɛgiĩ Abramu lɛ a lɔ n ka bɛ nɛ. Ǹ nə́ soo Uuru kiwi, Baabilonii gána nɛ kunun ǹ ni, mà maǹ woe Kanaan gána nɛ. Ǹ bɛ́ ǹ nə́ dɔ Kaaran, ǹ nə́ giã walan.

³²Teraa a yɛ lɛ̀ biɛpaa ka sooro ne (205), á gã Kaaran.