Read Samo, Southern SGK 13 Bible Online

SGK 13 - Samo, Southern bible

SGK 13

¹Abramu soo Ezipti, á woo Kanaan a gusin a lɛ̀gɔn la, a din laanka a lɔ nɛ, ka ǹ gɔn màn tumaa nɛ. Lɔti dɔ á kun ni.

²Abramu na á goã pàãma gole lɛa: tɔɔn nə́ goã a lon, ka wɔrɔ laanka sana nɛ.

³Á n toa gusin a lɛ̀gɔn la, á woo miɛ̃ boɛboɛ yǎa Betɛli. A na a zìã lɛ dɔ bǎã mɛn nɛ lɛlɛ, Betɛli laanka Ayii bii ni, á woo yǎa walan.

⁴A bɛ́ á *wúlu bɔ ǹ bǎã dɔ maa lɛlɛ, á Dɛnaa nyankɔ walan, a n bíi ka a tɔ nɛ.

⁵Lɔti mɛn dɔ goã zii tɔ we kun ka Abramu ni, tɔɔn nə́ goã a dɔ lon: sèren laanka bòen ne ka diin ni. Zìãn nə́ goã a dinmaa lon.

⁶Minbuiinin lɛn laanka tɔɔn lɛn mɔnaa taman yii, bǎã lɛ nə ǹ bɔ, ǹ tumaa boo la ǹ nə́ giã kɔn li wa.

⁷Bɛa biikoo li Kanaan minin laanka Perɛzi minin nə́ goã gána lɛ nɛ. Ǹ kɔn pinaa, zia yoo Abramu a tɔɔn-lɛduə̃lin laanka Lɔti wɔn, bii.

⁸Abramu tɔ́n pɛ Lɔti ni kɛnɛn: «Zia a siĩni, a wɔ n laanka masɛ bii wa, a siĩni, a wɔ masɛ a tɔɔn-lɛduə̃lin dɔn laanka n wɔn bii wa, a giala, wɔ n kɔn dɔɔ̃nɔn lɛa.

⁹Gána lɛ a bǎã tumaa bie ke n yɔrɔ-a wa ya? Daa wɔ na kɔn. Bɛ̀ ń woo a gɔsɛ a lɛ̀gɔn la, masɛ n woe a gusin a lɛ̀gɔn la. Bɛ̀ n gusin a lɛ̀gɔn la saa, masɛ n woe gɔsɛ a lɛ̀gɔn la.»

¹⁰ Lɔti nə́ n yii saa á ga Zurdɛ̃ bǎã tumaa ganaa. Á yɛ mà mu á bɛa bǎã lɛ boe parsiini, á goã ka Dɛnaa a lɛlɛ a dù gɔrɔ kɛ bɛ́ lɔn, ka Ezipti gána bɛ́ lɔn, bɛ̀ Dɛnaa bɛ́ a tɔn Sodɔmu laanka Gomɔɔrɔ kiwi bɔ̀n baa ǹ mɛn waáraa wa.

¹¹Lɔti Zurdɛ̃ bǎã lɛ tumaa saa a din wɔ lɛa á yoo á woo lɛ̀giala-n. Ǹ nə́ sawaa kɔn miɛ̃.

¹²Abramu giã Kanaan gána nɛ, Lɔti sɛ giã bǎã basiɛ̃ lɛ a kiwin ni, á woo a zìãn doa yǎa Sodɔmu.

¹³Bɛa kiwi lɛ dɔ a minin man nə́ goã we Lawa lon parsiini, ka ǹ zɛnaa ǹ sii babaraan nɛ.

¹⁴Lɔti bɛ́ á n na, á n bɔ Abramu ganaa ǹ mɛn waáraa, Dɛnaa pɛ Abramu-n bɛ kio kɛnɛn: «N bɛ́ bǎã mɛn nɛ ke lɛn, n toa walan, n nə n yii saa n ga gɔsɛ a lɛ̀gɔn laanka gusin a lɛ̀gɔn la ganaa, ka lɛ̀giala laanka lɛ̀nyɛɛn nɛ.

¹⁵ Gána kɛ lɛ n yii tá a ganaa ke, má a tumaa kɔ n la, má kɔ n tɔrɔn la yǎa duduu.

¹⁶Má á re n tɔrɔ mɔnɛɛ ka tán tii bɛ́ lɔn. Tán tii bɛ́ mɔnaa-n lɔn, min ná a boe la á nimii wa, n dɔ tɔrɔ n die mɔnɛɛ miɛ̃, min ná a boe la a nimi wa.

¹⁷Yoo n nə n bibiə̃ gána lɛ nɛ, n wo a sasabaa li, n ga a gɔ́ɔ̃ dɔ a golebaa ganaa. A giala, man koe n la.»

¹⁸Abramu yoo ka a zìãn nɛ, á daa giã Manbre a dan gòã li, kunu Ebrɔn ganaa. Á wúlu bɔ ǹ bǎã dɔ walan Dɛnaa wɔ lɛa.