Read Samo, Southern SGK 15 Bible Online

SGK 15 - Samo, Southern bible

SGK 15

¹Bɛa siin lɛn kiɛ̃ kio, Dɛnaa nə́ n din nyaa Abramu ni, á pɛ nɛ kɛnɛn: «Abramu, masɛ din nə n tamaa wole lɛa, n baran nyɛ́ɛ baa wa. N saraa á die gole koe parsiini.»

²Abramu ná a lɛ si á pɛ: «Dɛnaa Lawa, n màn kɔ masɛ la là n ka wàa nɛ? Masɛ á ke woe giɛ̃ miɛ̃, nɛ ná a ba ma lon wa. N bɛ́ n nɛ kɔ ma la wa, Damaasin Eliezɛrɛ mɛn bɛ́ bɛ̀rɛ lɛa maa kion, bɛ lɛ n die maa kíɛ̃ siɛ.»

⁴Dɛnaa tɔ́n pɛ-n kɛnɛn: «Bɛ bie re n kíɛ̃ siɛ wa dɛ. N din gɔ́ɔ̃gɔ́ɔ̃ ǹ nɛ n die n kíɛ̃ siɛ.»

⁵ Bɛ kio, á Abramu kũ á soo-n kanaa, á pɛ nɛ: «Ga lon, bɛ̀ ń tá boe la n leeren kɛn nimi, n nə ǹ nimi. N dɔ tɔrɔn man die mɔnɛɛ miɛ̃, min ba re boe la, a ǹ nimi a ǹ lɛ yɛ wa.»

⁶ Abramu nə́ n foo doa Dɛnaa Lawa ganaa. Bɛ lɛ na á toa, Dɛnaa Lawa kũ min pepere lɛa.

⁷Á pɛ-n kɛnɛn doo: «Masɛ Dɛnaa din ni má n bíi, má soo n ne, má n bɔ Uuru kiwi *Baabilonii gána nɛ, man die gána kɛ lɛ koe n la, a n wɔ baa.»

⁸Abramu pɛ: «Dɛnaa Lawa, man die n biɛ lɔn ma dɔ̃, má á re maa wɔ biɛ?»

⁹Lawa pɛ nɛ: «Ga lɛ̀ sɔɔ dii luu li, ka lɛ̀ sɔɔ bòe dan nɛ, ka lɛ̀ sɔɔ sère gɔ̀lɔ̀ nɛ, n da ǹ kɔ ma la, ka wuruun ni ka zɛrɛkantoan ten ne.»

¹⁰Abramu daa ka bɛa mànan lɛn tumaa nɛ. Á ǹ yu kɔn papaa, á ǹ tumaa a lɛkara yɔrɔ dia ǹ miã la. A bàanan lɛn sɛn yu kɔn wa.

¹¹Bàanan mɛnɛn bɛ́ siĩ mui, bɛn nə́ daa pã màn geren lɛn ganaa, sɛnɛ, Abramu nə́ ǹ loo.

¹² Wasa bɛ́ re miɛ̃, nyuù gole Abramu saa. Bɛa biikoo li, nyɛ́ɛ babaraa gole kũ.

¹³ Dɛnaa tɔ́n pɛ nɛ: «A dɔ̃ taãnɛ, mà n tɔrɔn tá re giɛ̃ gána kɔ́n nɛ, gána mɛn bɛ́ a ba ǹ wɔ lɛa wa. Min kɔsɔn tá re ǹ biɛ bɛ̀rɛn lɛa, ǹ fuu nyaa ǹ nɛ lɛ̀ biɛsii (400) gɔ́ɔ̃ nɛ.

¹⁴ Sɛnɛ, ǹ bɛ́ re bɛ̀rɛbaa ǹ dí nyɛɛ tɔrɔ mɛn nɛ, ma á re dɔlɔ boe bɛ ganaa. Bɛ kio, ma á re soe ǹ ne walan ka gɔn màn gigiã nɛ.

¹⁵Sɛnɛ, nsɛ Abramu á re zizi koe, n gã ka yii-nyɛɛ nɛ, ǹ nə n gere bĩ.

¹⁶N tɔrɔn yɛ kɔn kio a siibaa ǹ wɔ á re n bɔyɛɛ a da kànaa. A giala, Amɔɔrɔ minin tá bǎã lɛ-n bɔrɔ. Bɛ̀ ǹ baraabaa lɛ lɛ pã ǹ mɛn waáraa, má á re ǹ lui.»

¹⁷Wasa bɛ́ á mɛ, kùsì kɔ́n a tɛsiã goã boe wɔlɔ tì lɛ li, a tɛ buə̃ bɔ siĩ lɛkaran lɛn bii ni.

¹⁸ Bɛ lɛ a pinaa, Dɛnaa lɛ kɔ kɔn la doa kɔn ka Abramu ni, á pɛ-n kɛnɛn: «Man die gána kɛ lɛ koe n din tɔrɔn la, a saa Ezipti a tà ganaa, a wo Efrati tà gole kɛ yaa:

¹⁹Kenii minin kiwi na a nɛ, Kenizi minin wɔ nɛ, Kadimon minin wɔ nɛ,

²⁰Ɛti tɔrɔn wɔ nɛ, Perɛzi minin wɔ nɛ, Refaa minin wɔ nɛ,

²¹Amɔɔrɔ tɔrɔn nɛ, Kanaan minin ni, Girgazi tɔrɔn nɛ, ka Zebuzu tɔrɔn nɛ.»