Read Samo, Southern SGK 20 Bible Online

SGK 20 - Samo, Southern bible

SGK 20

¹Abrahamu yoo walan á woo gusin a lɛ̀gɔn la, á giã Kadɛsi laanka Suuru gána bii ni. Bɛ kio, á woo giã Geraara kiwi bɔrɔ.

² Abrahamu na á goã pii a lɔ Saaraa wɔ paǹ li, mà asɛ miãnɛn nɛ. Bɛ lɛ nɛ, Geraaran kii Abimelɛki minin dia, ǹ nə́ woo Saaraa kũ ǹ nə́ daa nɛ.

³Sɛnɛ, Lawa daa Abimelɛki la ka narɛɛ nɛ, á pɛ nɛ kɛnɛn: «Lɔ ke ń bɔ, n tá re giɛ̃ bɛ lɛ taman yii, a giala, a n zuũ li.»

⁴Bɛ á zɛnɛɛ, bɛ̀ Abimelɛki tɔn nə n mɔrɔ lɔ lɛ-a bɔrɔ wa. Á tɔ́n pɛ kɛnɛn: «E, maa Dɛnaa! Ma n die masɛ laanka maa gána minin dii kooro, a da yaa wɔ sii la wa?

⁵Abrahamu din bie á pɛ ma nɛ, mà ǹ miãnɛn nɛ wa ya? Lɔ lɛ dinmaa dɔ́ pɛ, mà asɛ miãgiĩ n ka Abrahamu ni. Man má zɛnaa ka gɔ́ɔ̃ fubaa nɛ, ma sii kɔ́n la wa.»

⁶Lawa tɔ́n pɛ nɛ a din narɛɛ lɛ nɛ: «Masɛ dɔ á doɛ̃, máa n nə́ n zɛnaa ka gɔ́ɔ̃ fubaa nɛ, ma dinmaa lɛ dɔ n man kurəə wɔ masɛ lon ganaa. Bɛ lɛ nɛ, ma toa ń nə́ n mɔrɔ lɔ lɛ-a wa.

⁷Sisia, giĩ lɛ a lɔ lɛ kɔ la. A giala, Lawa a boo gii-dali ni, á die Lawa nyankoe n lɛa, màn mɛn bɛ́ toɛ n nyin goã. Bɛ̀ n kɔ la wa, a dɔ̃ mà n din laanka n minin tumaa á re giɛ̃, sàabaa ná a ba la wa.»

⁸Abimelɛki yoo baayɛlɛ yiisoone, a ná a dí-nyalin tumaa bíi, á bɛa siin lɛn tumaa laakalaa ǹ nɛ. Nyɛ́ɛ bɛn kũ parsiini.

⁹Bɛ kio, Abimelɛki Abrahamu bíi, á pɛ nɛ: «Wàa mɛn sii n ke, ń zɛnaa wɔsɛn nɛ? Man má wàa sii la n la, sii baraa lɛa, n nə́ yui sii baraa gole kɛ diɛ ma laanka maa gána minin mìi ni? Zɛnaa ǹ sii bie ka kɛ nɛ ń zɛnaa masɛ-n wa dɛ.

¹⁰Wàa mɛn sii na á n da kɛ miã zɛnaa ganaa?»

¹¹Abrahamu ná a lɛ si á pɛ: — Masɛ n taasɛ, máa nyɛ́ɛ baa Lawa-n ba bǎã kɛ lɛ-n wa. Bɛ lɛ a lɛa, máa ǹ tá re ma dii, ǹ maa lɔ lɛ si ma la, a siĩnbaa taman yii.

¹²Bɛ yii nə n tiləə, masɛ miãnɛn nɛ sonbore. Wɔ n di goon, dan na á wɔsɛn sawaa kɔn, a na á masɛ a lɔ baa.

¹³Lawa bɛ́ á masɛ bíi, á ma bɔ wɔ dikion, a masɛ baa bibiə̃ wole lɛa lɔn, má pɛ Saaraa-n kɛnɛn: «Wɔ bɛ́ re woe bǎã woo bǎã nɛ, ma bɛ́ n nyankoe, máa n sii sonbore mɛn zɛnaa ma nɛ, bɛ n ka kɛ nɛ: A pɛ, mà n miãgiĩ n ka masɛ nɛ.»

¹⁴Abimelɛki sèren kũ, ka bòen laanka diin ni, á ǹ kɔ Abrahamu la, á bɛ̀rɛgiĩn laanka bɛ̀rɛlɔn kɔ la, a ná a lɔ Saaraa dɔ kɔ la.

¹⁵Á pɛ nɛ: «Maa gána lɛ á ke n yɔrɔ-a, bǎã mɛn bɛ́ kɔɔ̃nɛ n ganaa, giã walan.»

¹⁶Bɛ kio, á pɛ Saaraa nɛ: «Á ke, man die wɔrɔ we duu goon koe n miãgiĩ lɛ la. Bɛ n die goɛ̃ sii a kɔnboe lɛa, nyɛɛ n tá kun wolen tumaa nɛ, mà n zɛ̀rɛ bie ka sii kɛ lɛ-n wa.»

¹⁷N dɔ̃, lɔ mɛn tumaa bɛ́ á goã Abimelɛki a kion, Lawa na á goã á n tumaa baa lɔ nɛ-yele baãnaan lɛa, Abrahamu a lɔ Saaraa taman yii. Sɛnɛ, Abrahamu Lawa nyankɔ Abimelɛki a lɛa, ka a lɔ nɛ, ka a bɛ̀rɛlɔn nɛ. Bɛ kio, lɔn lɛn nə́ tɔ́n nɛnyaanan yɛ.