Read Samo, Southern SGK 21 Bible Online

SGK 21 - Samo, Southern bible

SGK 21

¹Lawa daa á n dɔ Saaraa lɛ, ka a bɛ́ á pɛ-n lɛlɛ lɔn. A n lɛ kɔ la ka sii mɛn nɛ, á bɛ lɛ zɛnaa.

² Saaraa nɔ̀ si. Lawa pɛ mà á re nɛ yii biikoo mɛn li, á nɛgiĩ yɛ Abrahamu ni bɛa biikoo lɛ li, bɛ á zɛnɛɛ bɛ̀ Abrahamu a zizimaa nɛ.

³Saaraa nɛ mɛn lɛ yɛ nɛ, Abrahamu ná a tɔ kɔ mà Izaaki.

⁴ A nɛgiĩ Izaaki lɛ a yɛ lɛawaa kiwisi, á kuru ka Lawa goã á pɛ, á laa a ganaa lɔn.

⁵Izaaki bɛ́ yii, bɛ̀ Abrahamu lɛ̀ paabiɛ nɛ.

⁶(Izaaki tɔ lɛ giala mà "Yaa-wɔ"). Saaraa tɔ́n pɛ: «Lawa na á toa masɛ á foo kɔɔ̃nbaa ǹ yaa we! Min woo min bɛ́ re kɛ miɛ̃ masɛ wɔ paǹ li, á re yaa diɛ bɛn tumaa ganaa.»

⁷Á pɛ dɔn: «Die n boe la a pɛ Abrahamu ni, mà masɛ Saaraa á die nɛ diɛ ma gòã la doo? Masɛ á ke má nɛgiĩ yɛ nɛ, a zizi kɔ lɛ gɔ́ɔ̃ nɛ.»

⁸Nɛ lɛ gole kɔ. Saaraa bɛ́ a ná a lɛ bɔ nyɔ ganaa ǹ mɛn waáraa, Abrahamu màn-bii gigiã zɛnaa.

⁹Ǹ kɔn pinaa, bɛ̀rɛlɔ lɛ Ezipti min lɛa, bɛ nɛ mɛn yɛ Abrahamu ni, Saaraa bɛa nɛgiĩ lɛ yɛ sàn koe.

¹⁰ Saaraa tɔ́n pɛ Abrahamu ni: «Bɛ̀rɛlɔ lɛ laanka a nɛgiĩ lɛ loo, a giala, bɛ̀rɛlɔ kɛa nɛgiĩ kɛ doamaa bie, a kíɛ̃ gii kɔn ka maa nɛgiĩ Izaaki-n wa.»

¹¹Bɛa boo lɛ busu Abrahamu ganaa parsiini, a giala, mà a din a nɛ n ka Isimayeli dɔ nɛ.

¹² Sɛnɛ, Lawa pɛ nɛ: «N foo baran busu nɛginin kɛ laanka bɛ̀rɛlɔ kɛa sii gɔ́ɔ̃-n wa. Bɛ̀ Saaraa boo mɛn pɛ n nɛ, a tumaa si. A giala, n tɔrɔ giala basa n die boe Izaaki ni.

¹³Sɛnɛ, ma á re bɛ̀rɛlɔ lɛ a nɛgiĩ lɛ dɔ tɔrɔn mɔnɛɛ ǹ gána baa, a giala, n din a nɛ n ka a dɔ nɛ.»

¹⁴Abrahamu yoo baayɛlɛ yiisoone, á màn-bii saa, á mu kaa mu bɔnaa nɛ, á ǹ kɔ Agaara la. Á nɛ lɛ saa á da a dɔ̀ɔ̃ nɛ, á da zii. Agaara woo n penpelen da Bɛɛr-Sebaa don.

¹⁵Mu bɔnaa lɛ a mu bɛ́ á nya, á n gɔn bɔ nɛ lɛ ganaa, á daa da boɛɛn kɔ́n giulun.

¹⁶Bɛ kio, a din kiɛ̃ á woo giã tán tìãlɛa, á n wɔlɔ lui nɛ lɛ ganaa, ka kiɛ zũ a wo mɛnaa tán bɛ́ lɔn. A giala, a na á goã pii a din gɔ́ɔ̃-n kɛnɛn: «He, maa nɛ kɛ baran gã ma yii-n wa!» A bɛ́ giã-n tán tìãlɛa, á n lɛn saa lon á wuu pɛ.

¹⁷Lawa nɛginin lɛ lɛ ma, a dia dí-a wole tɔ́n nə n toa lon, á lɛ dia Agaara la, á pɛ nɛ: «Agaara, wàa nə n ganaa? N baran nyɛ́ɛ baa wa, a giala, Lawa nɛ lɛ lɛ ma bǎã lɛ-n walan.

¹⁸Yoo! N nɛ lɛ saa n bɔ tán, n kũ a gɔn ganaa. A giala, ma á die a tɔrɔn mɔnɛɛ, a n baa gána gole lɛa.»

¹⁹Lawa ná a yii bũ, á tù goon yɛ tán mu ná a nɛ. Á kiɛ̃ á woo mu bɔnaa lɛ pã, á daa mu kɔ nɛ lɛ la.

²⁰Lawa nə́ n dɔ nɛginin lɛ lɛ, yǎa á gole kɔ. Á giã Paaran don, á n baa sa-zũli gole lɛa.

²¹Ǹ dan Ezipti gána nɛ goon wɔ lɔ lɛa, á kɔ la.

²² Bɛa biikoo li, Abimelɛki laanka a sɔraasin goledɛnaa Piikɔlɔ pɛ Abrahamu ni: «Ń bɛ́ sii mɛn tumaa zɛnɛɛ, Lawa tá kunun n ni ka a din tumaa nɛ.

²³Bɛ lɛ taman yii, n liɛ masɛ nɛ ka Lawa nɛ kànaa sisia, mà n ba re masɛ bebele, n nə n bɔ ma li wa. N ba re maa nɛnyaanan dɔn laanka maa nɔ̀ɔnɔn bebele, n nə n bɔ ǹ li wa. Man kũ doɛ̃ lɔn, ń bɛ́ giã-n gána mɛn nɛ, n masɛ laanka bɛ lɛ dɔ kũ doɛ̃ miɛ̃.»

²⁴Abrahamu ná a lɛ si á pɛ: «Má n liɛ.»

²⁵Abrahamu dɔ nə́ n foo pɛ Abimelɛki ni tù goon wɔ paǹ li, Abimelɛki a dí-nyalin nə́ goã ǹ nə́ n paraa a ganaa.

²⁶Abimelɛki tɔ́n pɛ: «Min mɛn bɛ zɛnaa, ma ba ǹ dɛnaa doɛ̃ wa. N bin bɛ́ n tɔn kɛ pɛ masɛ-n dinin wa, ma dinmaa dɔ tɔn ma wa, yǎa pelo.»

²⁷Abrahamu sèren kũ ka bòen laanka diin ni, á ǹ kɔ Abimelɛki la, ǹ dinin min paa tumaa lɛ kɔ kɔn la wɔ.

²⁸Abrahamu sère luu sɔbaa na, á ǹ kaa ǹ gɔrɔn.

²⁹Abimelɛki nɔ̀n da Abrahamu la: «Wàa na á baa, n tá bɛa sère luu sɔbaa lɛ niɛ̃, ǹ kiɛ ǹ gɔrɔn?»

³⁰Abrahamu tɔ́n pɛ: «Ma ǹ li, máa n lɛ kɔ n nə ǹ si ma gɔn, màn mɛn bɛ́ toɛ, ǹ nə n baa maa siére lɛa, ǹ nə n yiri da a nɛ, mà masɛ din nə má tù kɛ fɔ̃.»

³¹Bɛ lɛ na á toa, ǹ nə́ bɛa bǎã lɛ bíi, mà Bɛɛr-Sebaa (bɛ giala mà "Sɔbaa Tù" ka "Liɛwɔ Tù" ni), a giala, mà ǹ dinin min paa tumaa na á n liɛ walan.

³²Ǹ nə́ lɛ kɔ kɔn la wɔ Bɛɛr-Sebaa. Bɛ kio, Abimelɛki yoo, á n bɔyaa á woo Filisiti minin gána nɛ, kun ka a sɔraasin goledɛnaa Piikɔlɔ nɛ.

³³Abrahamu da kɔ́n zumu Bɛɛr-Sebaa, yiri koamanɛ ǹ sii lɛa. Maǹ da lɛ bíi Tamarisi. Lawa mɛn bɛ́ a tan yǎa duduu, á bɛ lɛ nyankɔ walan, bɛ̀ á bíi "Dɛnaa".

³⁴Abrahamu giã Filisiti minin gána lɛ nɛ, á belebɔ walan.