Read Samo, Southern SGK 22 Bible Online

SGK 22 - Samo, Southern bible

SGK 22

¹ Bɛa siin lɛn kio, Izaaki bɛ́ á gole kɔ, Lawa nə́ n da Abrahamu gɔ́ɔ̃ li. Á lɛ dia la, Abrahamu ná a lɛ si: «Ma á ke!»

² Lawa tɔ́n pɛ nɛ: «N nɛgiĩ lɛ kũ, n nɛgiĩ goon toto Izaaki kɛ lɛ, n nə́ narɛ parsiini, n wo Moriya gána nɛ, ma bɛ́ re kelen kɛn mɛn nyɛɛ n nɛ walan, wo wúlu bɔ nɛ bɛ mìi ni, n na a siĩ tã ka lenlen.»

³A lɛawaa, Abrahamu yoo baayɛlɛ yiisoone. Á gɔn kɔ́n yu, á kaa a dundun dɔ̀ɔ̃ nɛ, *wúlu màn lɛ a tã ǹ wɔ lɛa. Lawa bǎã mɛn lɛ boo da nɛ, á yoo á bɛ lɛ a zii saa. Á woo ka a dí-nyali min paa-n kun ni, ka a nɛgiĩ Izaaki ni.

⁴A lɛawaa sɔɔbaa ǹ wɔ pinaa, Abrahamu nə́ n yii saa lon, á bǎã lɛ yɛ sɔsɔɔ.

⁵Abrahamu tɔ́n pɛ tɔntɔraan lɛn nɛ: «Ka giã kànaa ka dundun lɛ nɛ. Masɛ laanka nɛginin lɛ á die woe Lawa nyankoe kɛnɛn li, bɛ kio, wɔ tɔn nə n bɔyaa wɔ da ka li.»

⁶Abrahamu wúlu màn tã ǹ gɔn lɛ saa, á da a nɛgiĩ Izaaki mìi ni. A din tɛ laanka gɔya saa a gɔn. Ǹ dinin min paa tumaa bɛ́ tɔ we kun woe,

⁷Izaaki boo da ǹ di Abrahamu ni á pɛ: «Díi!» Abrahamu ná a lɛ si: «Maa nɛ!» Izaaki tɔ́n pɛ nɛ: «Tɛ laanka gɔn bɛ́ wɔ gɔn, wɔ bɛ́ re wúlu boe ka sère nɛ mɛn nɛ wɔ tã, bɛ á maa?»

⁸Abrahamu ná a lɛ si, á pɛ: «Maa nɛ, Lawa din tá re bɛ yɔrɔ boe, á re wúlu sère nɛ koe.» Ǹ dinin min paa tumaa tɔ wɔ miɛ̃, ǹ nə́ woo kun.

⁹ Lawa bǎã mɛn lɛ nyaa nɛ, ǹ bɛ́ ǹ nə́ dɔ walan, Abrahamu *wúlu bɔ ǹ bǎã dɔ, á gɔn lɛ kaa la. A ná a nɛgiĩ Izaaki lɛ yii, á da gɔn lɛ lalan wúlu bɔ ǹ bǎã lɛ nɛ.

¹⁰Bɛ kio, Abrahamu nə́ n gɔn dia, á gɔya saa mà a na a nɛgiĩ lɛ bɔlɔ kuri.

¹¹Sɛnɛ, Dɛnaa a dia dí-a wole lɛ nə́ n toa lon, á lɛ dia la ka koee, á pɛ: «Abrahamu! Abrahamu!» Abrahamu ná a lɛ si: «Ma á ke!»

¹²Dɛnaa tɔ́n pɛ nɛ: «N baran n gɔn da nɛginin lɛ ganaa wa. N baran sii kɔ́n zɛnaa-n wa. Ma á doɛ̃ sisia, máa n tá nyɛ́ɛbiɛ masɛ Lawa nɛ. A giala, n nə n piã ka n nɛgiĩ goon toto lɛ a kɔ masɛ la-n wa.»

¹³Abrahamu nə́ n yii saa á ga, bɛ̀ sère gɔ̀lɔ̀ goon bɛ́ daã gòã li, gagasa kũ a bɛnɛn ganaa, a n golee ne. Abrahamu kiɛ̃ á woo bɛ lɛ bɔ, á wúlu bɔ nɛ a nɛgiĩ Izaaki bǎã nɛ, a ná a siĩ tã ka lenlen.

¹⁴Abrahamu bɛa bǎã lɛ bíi mà "Dɛnaa din tá re bɛ yɔrɔ boe". Bɛ lɛ na á toa, ǹ nə́ tɔn pii pelo mà "Dɛnaa din tá re bɛ yɔrɔ boe kele la".

¹⁵Dɛnaa a dia dí-a wole lɛ nə́ n toa lon, á Abrahamu bíi ka a paabaa ǹ wɔ nɛ,

¹⁶ á pɛ: — N nə n piã ka n nɛgiĩ goon toto lɛ a kɔ masɛ la-n wa. N bɛ mɛn zɛnaa, masɛ nə n liɛ ka ma din a Lawabaa nɛ,

¹⁷ ma á re barka we n ne, ma n tɔrɔn mɔnaa, ka lon a leeren laanka kɔ̀ mu lɛ-a ǹ nyɔɔsɔ̃ bɛ́ lɔn. N tɔrɔn tá re ǹ zɔ́ɔn giã ǹ bǎã sii ǹ la.

¹⁸ Kanaa a tɔrɔn dinin tumaa á die lɛn bǐɛ̃ bíi kɔn li ǹ pɛ: «Lawa barka wɔ n nɛ ka Abrahamu tɔrɔn wɔ bɛ́ lɔn.» A giala, ń masɛ bɔlɔ si.

¹⁹Abrahamu nə́ n bɔyaa á daa tɔntɔraan lɛn li, ǹ nə́ yoo ǹ nə́ woo Bɛɛr-Sebaa kun. Abrahamu giã Bɛɛr-Sebaa.

²⁰Bɛa siin lɛn kiɛ̃ kio, ǹ nə́ daa pɛ Abrahamu ni, mà Milkaa dɔ́ nɛgininin yɛ ǹ dɔɔ̃ngiĩ Nahɔɔrɔ nɛ.

²¹Usu na á yɛ bibinaanɛ, bɛ kio ǹ diɛ̃ Buuzu, bɛ kio Aramu ǹ di Kemoeli,

²²Kezɛdi ni, Aazoo ne, ka Pildaasi ni, ka Yidilafu laanka Betoeli ni.

²³Betoeli na á Rebeka yɛ. Milkaa na á bɛa nɛ kiwisi lɛ yɛ Abrahamu ǹ dɔɔ̃ngiĩ Nahɔɔrɔ nɛ.

²⁴A bɛ́ kun ka lɔ kɔsɔ mɛn nɛ, a tɔ n Rewumaa, bɛ dɔ́ nɛnyaanan yɛ: Tebaa nɛ, Gahamu ni, ka Taasi laanka Maakaa nɛ.