Read Samo, Southern SGK 23 Bible Online

SGK 23 - Samo, Southern bible

SGK 23

¹Saaraa na á lɛ̀ paabiɛ ka fuəwensɔbaa (127) zɛnaa kanaa.

²Saaraa na á gã Kiriyati-Arabaa kiwi, ǹ bɛ́ ǹ mɛn bíi Ebrɔn, Kanaan gána nɛ. Abrahamu daa Saaraa a gɛ̀ koa, a ná a gɛ̀ wuu pɛ.

³Bɛ kio, á yoo á n bɔ a lɔ lɛ gere li, á woo boo da Ɛti tɔrɔn nɛ, á pɛ ǹ nɛ:

⁴ «Man ka li ka gùli bɛ́ lɔn, tii lɛa kun ka nɛ. Ka gere bĩ ǹ bǎã kɔ masɛ la, bɛ maa wɔ baa, màn mɛn bɛ́ toɛ, ma maa lɔ lɛ gere bĩ a nɛ.»

⁵Ɛti tɔrɔn lɛn nə́ tɔ́n pɛ Abrahamu ni:

⁶«Giĩ lɛ, n too kɔ wɔ lon! Lawa na á n baa kii lɛa wɔsɛn bii. Wɔsɛn bǎã lɛ mɛn a gere yala bɛ́ siĩni, n lɔ lɛ gere bĩ walan. Wɔa min kɔ́n ba re boe la a n piã, mà a ba a yala koe n la, n nə n lɔ gere bĩ a-n wa.»

⁷Ɛti tɔrɔn mɛnɛn bɛ́ bɛa bǎã lɛ nɛ, gána lɛ a minin lɛa, Abrahamu yoo, á kaa tán ǹ giulun, á barka da ǹ nɛ.

⁸Á pɛ ǹ nɛ kɛnɛn: «Bɛ̀ ka á lɛ koe, masɛ maa lɔ lɛ gere bĩ ka li sonbore, ma ǹ ka nyankoe, ka wo gòã-kũ da Sohara a nɛgiĩ Efrɔn ganaa maa lɛa.

⁹Ka pɛ nɛ, mà Makpelaa bǎã a kele kolo ganaa ǹ yala ke a wɔ lɛa, a wuru lɛkoro-a, mà a bɛ kɔ masɛ la. Mà a kɔ ma la a giɔ̀mɔ taãn ganaa ǹ dinin yɔrɔ-a, a n baa maa geren bĩ ǹ bǎã lɛa.»

¹⁰Efrɔn na á goã giã-n Ɛti tɔrɔn bii. Ɛti tɔrɔ Efrɔn lɛ tɔ́n pɛ Abrahamu ni ǹ dɔɔ̃nɔn yɔrɔ-a, min mɛn tumaa da lɛsɔkɔn bǎã nɛ kiwi lɛ a kiɛnlɛ-a á pɛ:

¹¹«Haayii, giĩ lɛ! Ń too kɔ ma lon. Má n gɔ ka wuru lɛ nɛ! Kele kolo ganaa ǹ yala kɛ lɛ dɔ a nɛ, má n gɔ ka bɛ dɔ nɛ! Man koe n la ma tɔrɔ minin tumaa yii ni, máa n wo n gere lɛ bĩ a nɛ.»

¹²Abrahamu wusoo á kaa tán gána lɛ a minin giulun,

¹³á pɛ Efrɔn nɛ ǹ yii ni: «N dɔ sabara baa, n nə n too kɔ ma lon! A toa ma wuru lɛ a wɔrɔ kɔ n la, lɛ kɔ n si, man die maa lɔ lɛ gere bĩ walan.»

¹⁴Efrɔn tɔ́n Abrahamu lɛ si, á pɛ:

¹⁵«Giĩ lɛ, n too kɔ ma lon. Wɔrɔ we biɛsii (400) tán giɔ̀mɔ lɛa, bɛ dɔ n wàa lɛa wɔsɛn bii ni? N gere lɛ bĩ a-n doo!»

¹⁶Abrahamu kɔn ma ka Efrɔn nɛ. A wɔrɔ lɛ mɛn pɛ, Ɛti tɔrɔn lɛn nə́ ma a lɛ-n, á bɛ lɛ nimi á kɔ Efrɔn la: ǹ dinin bɛ́ wɔrɔ tɔrɔ mɛn bii, bɛa biɛsii.

¹⁷A kũ bɛ lɛ ganaa, Efrɔn a wuru lɛ Makpelaa, Manbre bǎã a lɛ̀giala gɔn la, kele yaladɛnaa mɛn bɛ́ a nɛ, da mɛn tumaa bɛ́ a gɔ́ɔ̃ nɛ, a din tumaa

¹⁸Abrahamu wɔ baa foaãnɛ, Ɛti tɔrɔn lɛn yii ni, min mɛn tumaa goã woe n lɛ soekɔn kiwi lɛ a kiɛnlɛ-a.

¹⁹Bɛ kio, Abrahamu ná a lɔ Saaraa gere bĩ kele kolo ganaa ǹ yala lɛ nɛ, wuru lɛ-n Makpelaa, kunu Manbre ganaa. Bɛa bǎã lɛ nɛ ǹ tá bíi Ebrɔn, Kanaan gána nɛ.

²⁰Ɛti tɔrɔn nə́ n sii bɔ wuru lɛ laanka kele yala lɛ nɛ, ǹ nə́ a dɛnaabaa toa Abrahamu gɔn, a geren bĩ ǹ bǎã lɛa.