Read Samo, Southern SGK 25 Bible Online

SGK 25 - Samo, Southern bible

SGK 25

¹Abrahamu wusoo á lɔ kɔsɔ saa, a tɔ n Keturaa.

²A nɛgiĩn mɛnɛn yɛ Abrahamu ni, bɛn man ka Zimrana nɛ, Yoksan nɛ, Medan nɛ, Madiã nɛ, Yiisibaki laanka Suwa nɛ.

³Yoksan na á Sabaa laanka Dedan yɛ. Dedan tɔrɔn man ka Asuuru minin ni, Letuusu minin ni ka Lewumu minin ni.

⁴Madiã a nɛnyaanan man ka Ɛfaa nɛ, Ɛfɛɛrɛ nɛ, Anɔɔki ni, Abidaa laanka Eldaa nɛ. Bɛn lɛn tumaa n Keturaa tɔrɔn lɛa.

⁵Abrahamu ná a gɔn màn tumaa kɔ Izaaki la.

⁶Sɛnɛ, Abrahamu yii bɛ́ tɔn koo ǹ mɛn waáraa, a ná a bɛ̀rɛlɔn nɛgiĩn lɛn dɔn gɔ ka màn nɛ, bɛ kio, á tɔn nə ǹ na, á ǹ bɔ a nɛgiĩ Izaaki ganaa, á ǹ dia gána kɔ́n nɛ lɛ̀giala-n.

⁷Abrahamu na á lɛ̀ paabiɛ ka pɔsɔbaawensooro (175) zɛnaa kanaa,

⁸bɛ kio, á tɔ́n gã. Á zizi kɔ parsiini, á gã bɛ̀ a yii n nyɛɛ nɛ a zizi kɔ lɛ gɔ́ɔ̃ nɛ. Ǹ ná a gere bĩ ǹ minin geren bĩ ǹ bǎã nɛ.

⁹A nɛgiĩ Izaaki laanka Isimayeli ná a gere bĩ kele kolo yala lɛ-n Makpelaa, Ɛti tɔrɔ Sohara a nɛgiĩ Efrɔn a wuru lɛ nɛ, Manbre yɔrɔ-a.

¹⁰ Abrahamu na á goã á bɛa wuru lɛ pii Ɛti tɔrɔn lon. Maǹ nə́ Abrahamu din laanka a lɔ Saaraa bĩ walan.

¹¹Abrahamu a gɛ̀ kio, Lawa barka wɔ a nɛgiĩ Izaaki lɛ nɛ. Izaaki na á goã giã-n Lahayi-Royi Tù lɛ-a.

¹²Saaraa a bɛ̀rɛlɔ Agaara, Ezipti min lɛ, a nɛgiĩ mɛn yɛ Abrahamu ni, a tɔ n Isimayeli, bɛ tɔrɔn man ka kɛn nɛ.

¹³Isimayeli a nɛnyaanan nə yɛ kɔn kio lɔn, bɛn man ka kɛn nɛ: a nɛ goledɛnaa n ka Nebayɔti ni. Bɛ kio, Kedaara, Adebeeli, Mibusaamu,

¹⁴Miisima, Duumaa, Masa,

¹⁵Adaadi, Temaa, Yetuuru, Nafisi ni ka Kedeemaa nɛ.

¹⁶Isimayeli a nɛgiĩn man ka bɛn nɛ, min fulupaa. Ǹ tumaa sɔmɔdɛnaa baa. Ǹ nə́ ǹ dinin tɔ kɔ ǹ kiwin ganaa ka ǹ giã ǹ bǎã nɛ.

¹⁷Isimayeli lɛ̀ paabiɛ ka pɔsɔɔwensɔbaa (137) nɛ, á tɔ́n gã, ǹ ná a gere bĩ ǹ minin geren bĩ ǹ bǎã nɛ.

¹⁸Isimayeli tɔrɔn lɛn nə́ giã Avilaa laanka Suuru bii ni, kunu Ezipti li foɛɛ̃nɛ, dia-n woe Assiirii gána la. Ǹ zia tàan bɛ́ a ba laɛ wa, ǹ nə́ giã ǹ gɔrɔn, ǹ nə́ n yɔrɔ dia Abrahamu tɔrɔ gialakunun lɛn la.

¹⁹Abrahamu a nɛgiĩ Izaaki tɔrɔ giala basa á ke. Abrahamu na á Izaaki yɛ.

²⁰Izaaki a yɛ lɛ̀ pusi, á Rebeka saa lɔ lɛa. Rebeka n Laban ǹ miãnɛn lɛa, Betoeli mɛn bɛ́ Aramu min lɛa boe Mezopotamii gána nɛ, bɛa nɛlɔ nɛ.

²¹Rebeka goã nɛ yii wa, Izaaki Dɛnaa nyankɔ a lɛa. Dɛnaa makara bɔ Izaaki ganaa, a lɔ Rebeka lɛ daa á nɔ̀ si bɛlɛmanan lɛa a gɔ́ɔ̃ nɛ.

²²Nɛnyaanan lɛn man nə́ goã kɔn nyɛnyɛnɛɛ a gɔ́ɔ̃ nɛ. Rebeka tɔ́n pɛ: «Bɛ̀ kɛ nə́ n zɛnaa miɛ̃ á woo nyɛɛnɛ, á re baraa koe ma ganaa!» Á nɔ̀n da Dɛnaa la.

²³ Dɛnaa tɔ́n pɛ nɛ: Gána paa a minin manə n gɔ́ɔ̃ nɛ. Tɔrɔ tɔtɔ paa n die boe n gɔ́ɔ̃ nɛ. Goon tá re pàã yii a la ǹ miã nɛ. Goledɛnaa lɛ á die dí nyɛɛ kiɛɛrɛdɛnaa lɛ nɛ.

²⁴Rebeka a gisiĩ biikoo bɛ́ á dɔ, á bɛlɛmanan yɛ.

²⁵Ǹ mɛn soo bibinaanɛ, bɛ gɔ̀nɔn nə tã kəwu ni, a tumaa n ka lɛa ka tɔɔ ki bɛ́ lɔn. Ǹ nə́ bɛ bíi Ezawu (bɛ giala mà "Kadɛnaa").

²⁶Bɛ kio, ǹ miã lɛ soo, a gɔn nə́ paraa-n Ezawu gòãtoro ganaa. Ǹ nə́ bíi Zakɔba (bɛ giala mà "Gòãtoro"). Ǹ bɛ́ yii ǹ mɛn waáraa, bɛ̀ Izaaki lɛ̀ pɔsɔrɔ nɛ.

²⁷Nɛgininin lɛn nə́ gole kɔ. Ezawu na á goã don-baali gole lɛa, n bibiĩ don parsiini. Zakɔba na á goã nɛnyaan tɛrɛɛn lɛa, giã zìã-n goã kɔɔ̃n a ganaa.

²⁸Ezawu sii na á goã kɔɔ̃n Izaaki ganaa, a giala, Izaaki goã don siĩ narɛ. Zakɔba dɔ sii na á goã kɔɔ̃n Rebeka ganaa.

²⁹Ǹ kɔn pinaa, Zakɔba zii tɔrɔ kɔ́n kɔrɛ. Ezawu bɔ donbaa ǹ bǎã nɛ á daa. Á goã nɔmaa-n parsiini.

³⁰Á tɔ́n pɛ Zakɔba nɛ: «Toa ma zii tã kɛ kɔ́n bɔ ma da ma lɛ-n, a giala, bòo n die ma dii. Bɛ lɛ nɛ, ǹ nə́ tɔ́n Ezawu bíi Edɔmu, bɛ giala mà "Tã".»

³¹Zakɔba tɔ́n pɛ nɛ: «N kiãbaa lɛ kɔ ma la bɔrɔ.»

³²Ezawu pɛ nɛ: «Ma bɛ́ re giɛ̃, maa kiãbaa lɛ là n ka wàa nɛ?»

³³ Zakɔba tɔ́n pɛ nɛ: «N liɛ ma-n bɔrɔ.» Ezawu nə́ n liɛ Zakɔba nɛ, a ná a kiãbaa lɛ sã la.

³⁴Zakɔba buuru laanka zii kɔ Ezawu la. Á màn bii, á yoo á kiɛ̃. Ezawu sàn kɔ ka a kiãbaa lɛ nɛ.