Read Samo, Southern SGK 26 Bible Online

SGK 26 - Samo, Southern bible

SGK 26

¹Bòo daa á wɔ gána lɛ nɛ, bɛ ná a goon ka Abrahamu a biikoo wɔ kɛ-n wa. Izaaki soo á woo Filisitin kii Abimelɛki li Geraara kiwi.

²Dɛnaa nə́ n din nyaa-n walan, á pɛ nɛ: — N nyan wo Ezipti wa, sɛnɛ, ma din bɛ́ re gána mɛn nyɛɛ n nɛ, wo giã walan.

³ Giã bɛa bǎã lɛ nɛ, ma á die goɛ̃ kunun n ni, ma barka wɔ n nɛ. Ma á die bɛa bǎã lɛ koe n din laanka n tɔrɔn la. Man liɛ n di Abrahamu-n ka sii mɛn nɛ, man die bɛ zɛnɛɛ nɛ.

⁴Ma á die a tɔrɔn mɔnɛɛ, ka lon a leeren bɛ́ lɔn, ma bǎãn kɛn lɛn tumaa kɔ ǹ la. Kanaa a tɔrɔn tumaa á die lɛn bǐɛ̃ bíi kɔn li, ǹ pɛ: «Lawa die a barka wɔ n nɛ, ka Abrahamu tɔrɔn wɔ bɛ́ lɔn.»

⁵A giala, Abrahamu masɛ bɔlɔ si, á kɔ maa boo lɛ, á maa dí-pɛn tamaa, a kiɛ̃ maa boo la wa.

⁶Izaaki giã Geraara kiwi.

⁷ Bǎã lɛ a minin nə́ nɔ̀n da la, a lɔ wɔ paǹ li. Izaaki pɛ ǹ nɛ, mà asɛ miãnɛn nɛ. A n pii mà bǎã lɛ a minin tá re asɛ dii Rebeka a lɛa, a giala, Rebeka goã siĩn parsiini. Bɛ lɛ a nyɛ́ɛ na á kũ, a lɛ kɔ á pɛ, mà Rebeka na asɛ a lɔ lɛa wa.

⁸Izaaki giã walan á belebɔ. Ǹ kɔn pinaa, Filisitin kii Abimelɛki nə́ n toa a kion, á n yii kɔ kanaa, á Izaaki laanka a lɔ Rebeka yɛ sàn koe kɔn lɛ.

⁹Abimelɛki Izaaki bíi, á pɛ nɛ: «N din a lɔ n ka lɔ lɛ nɛ! Wàa na á baa ń pɛ, mà nsɛ miãnɛn nɛ?» Izaaki ná a lɛ si kɛnɛn: «Man má pɛ miɛ̃, màn mɛn bɛ́ toɛ, ǹ baran ma dɛ a lɛa wa.»

¹⁰Abimelɛki tɔ́n pɛ: «Wàa-n sii n ke ń zɛnaa wɔsɛn nɛ? Bɛ̀ a na á kiɛ̃ kɛ la boɛɛnɛ, yǎa wɔa gána minin kɛn goon lɔ lɛ kũ á ga li, bɛ̀ ma n die sii siɛ n da wɔsɛn mìi ni.»

¹¹Bɛ kio, Abimelɛki nə́ n gɔn waa a gána minin tumaa nɛ kɛnɛn: «Min woo min bɛ́ re n gɔn diɛ giĩ kɛ laanka a lɔ ganaa, ka bɛa dɛnaa dɛ a gã.»

¹²Izaaki wuru bɔ bɛa gána lɛ-n bɛa lɛ̀ lɛ ganaa. A màn tɔrɔ mɛn da a nɛ, á bɛa laman paabiɛ bɔ a nɛ. Dɛnaa barka wɔ a nɛ,

¹³a tɔ bɔ. Màn mɛ a gɔn màn li miɛ̃, yǎa á n baa pàãma gole lɛa.

¹⁴Á tɔɔ gigiãdɛnaa baa, sèren ne ka diin ni, bɛ̀rɛ gigiã dɔ́ goã a lon. Bɛ lɛ taman yii, Filisiti minin foo wuu pɛ Izaaki li.

¹⁵Bɛ lɛ na á toa, ǹ di Abrahamu a bɛ̀rɛgiĩn nə tùn mɛnɛn fɔ̃ a tá kanaa biikoo li, ǹ nə́ bɛn tumaa tã ka tii ni.

¹⁶Abimelɛki tɔ́n pɛ Izaaki ni: «Wo sɔsɔɔ n nə n bɔ wɔsɛn li, a giala, n pàã gole kɔ, á la wɔsɛn manɛ.»

¹⁷Izaaki yoo á n bɔ walan, á woo a zìã doa Geraara a nyankɔrɔ basa kɛ nɛ, á giã walan.

¹⁸Ǹ tùn mɛnɛn fɔ̃ ǹ di Abrahamu a biikoo li, Filisiti minin nə́ ǹ tã ǹ di a gɛ̀ lɛ kio, Izaaki wusoo á bɛn bũ. Ǹ di lɛ tɔn mɛnɛn kɔ ǹ ganaa, á wusoo á bɛn lɛn kɔ ǹ ganaa.

¹⁹Ǹ kɔn pinaa, Izaaki a bɛ̀rɛn maǹ tù foɛ̃ nyankɔrɔ basa lɛ nɛ, ǹ nə́ woo n mìi na mu zii ganaa.

²⁰Geraara kiwi a tɔɔn-lɛduə̃lin kɔnɔn nə́ kaa kɔn bii, ka Izaaki wɔn nɛ. Ǹsɛn mà mu lɛ nə ǹsɛn wɔ lɛa. Izaaki bɛa tù lɛ bíi mà Ezɛki (bɛ giala mà "Zia"), a giala, minin lɛn man nə́ ga Izaaki lɛ li.

²¹A bɛ̀rɛgiĩn lɛn nə́ tù kɔsɔ fɔ̃, ǹ nə́ liere kɔ bɛ dɔ ganaa. Izaaki bɛ bíi Sitna (bɛ giala mà "Liere").

²²Á n zɔ̃ á n bɔ walan, á tù kɔsɔ fɔ̃, liere nə n kɔ bɛ ganaa wa. Á bɛ bíi Rehobɔti (bɛ giala mà "Màn-dali"), a giala, a na á goã pii: «Kanna, Dɛnaa màn da wɔsɛn bǎã li, màn mɛn bɛ́ toɛ, wɔ màn yɛ gána lɛ nɛ.»

²³Izaaki yoo walan, á woo Bɛɛr-Sebaa kiwi.

²⁴Dɛnaa nə́ n din nyaa nɛ, bɛ lɛ a pinaa tèlò-n, á pɛ nɛ: «Masɛ nə n di Abrahamu a Lawa lɛa. N baran nyɛ́ɛ baa wa, ma tá kunun n ni. Ma á re barka we n ne, ma n tɔrɔn mɔnaa. Man die bɛ zɛnɛɛ maa bɛ̀rɛgiĩ Abrahamu taman yii.»

²⁵Izaaki *wúlu bɔ ǹ bǎã dɔ walan, á Lawa nyankɔ, bɛ̀ á bíi «Dɛnaa.» A ná a zìã doa walan, a bɛ̀rɛgiĩn lɛn nə́ tù fɔ̃.

²⁶ Abimelɛki nə́ n toa Geraara, á daa bɔ a li, kun ka a yiri kɔmala wole Awuzati ni, a sɔraasin goledɛnaa Piikɔlɔ nɛ.

²⁷Izaaki tɔ́n pɛ ǹ nɛ: «Ka n ka daa wàa pɛ masɛ li? Ma tìĩ bɛ́ á bɔ ka nyin ni, ka ma loo, ka ma bɔ ka li.»

²⁸Ǹ nə́ Izaaki lɛ si kɛnɛn: «Wɔ́ gɔsɛ wɔ yɛ, Dɛnaa tá kunun n ni. Bɛ lɛ nɛ, wɔ pɛ, wɔa yǎa wɔsɛn nə n liɛ kɔn nɛ, wɔ lɛ kɔ kɔn la we.

²⁹N liɛ, mà n ba re sii baraa zɛnɛɛ wɔsɛn man wa, a giala, wɔsɛn nə sii baraa zɛnaa n dɔ-n wa. Wɔ n wɔ́ bǐɛ̃ dinsɔɔ̃ zɛnaa n nɛ, wɔ toa ń woo ka là nyantoro ne. Dɛnaa á ke á barka wɔ n nɛ sisia.»

³⁰Izaaki màn-bii gigiã zɛnaa á kɔ ǹ la. Ǹ nə́ màn bii, ǹ nə́ kã.

³¹A lɛawaa baayɛlɛ yiisoone, ǹ nə́ yoo, didie nə́ n liɛ ǹ miã nɛ. Bɛ kio, Izaaki nə́ ǹ da zii, ǹ nə́ sawaa kɔn ka bǐɛ̃ nɛ.

³²Izaaki a bɛ̀rɛgiĩn nə goã tù mɛn foɛ̃, ǹ nə́ daa bɛ lɛ boo da Izaaki ni a din pinaa lɛ nɛ. Ǹ nə́ pɛ nɛ: «Wɔ dɔ mu ganaa.»

³³Izaaki bɛa tù lɛ bíi Siibaa (bɛ giala, mà "Liɛ"). Bɛ lɛ na á toa, ǹ tá kiwi lɛ bíi Bɛɛr-Sebaa haalɛ tɔn pelo, bɛ giala, mà "Liɛwɔ Tù".

³⁴Ezawu bɛ́ á dɔ lɛ̀ pusi ǹ mɛn waáraa, á Ɛti tɔrɔ min paa goa lɔ lɛa: Beeri a nɛlɔ Yuditi laanka Elɔn a nɛlɔ Basimaati ni.

³⁵Ǹ sii yɔrɔ kɔsiɛ baa Izaaki laanka Rebeka ganaa parsiini.