Read Samo, Southern SGK 29 Bible Online

SGK 29 - Samo, Southern bible

SGK 29

¹Zakɔba yoo á mɛ zii la, á woo gána goon ne lɛ̀giala-n.

²Ǹ kɔn pinaa, á tù goon yɛ lalaa lɛ-a. Sère kuru sɔɔ goã walan, waa-n tán tù lɛ lɛ-a, a giala, maǹ nɛn bɛ̀ ǹ mu mi walan. Sɛnɛ, maǹ nə́ goã tù lɛ lɛ tiɛ̃ ka kɔlɔ kaaraa kɔ́n nɛ.

³Bɛ̀ tɔɔn lɛn tumaa daa, ǹ nə́ kaa kɔn li ǹ mɛn waáraa, maǹ kɔlɔ lɛ birikəĩ, ǹ bɔ tù lɛ lɛ, ǹ mu baã ǹ kɔ tɔɔn lɛn la ǹ mi, ǹ tɔn wusoo ǹ kɔlɔ lɛ birikəə̃, ǹ tù lɛ lɛ tã nɛ.

⁴Zakɔba nɔ̀n da tɔɔn-lɛduə̃lin lɛn la kɛnɛn: «Ma diɛ̃n lɛn, ka n boe maa?» Ǹ ná a lɛ si: «Wɔsɛn man boe Kaaran kiwi.»

⁵Á tɔ́n nɔ̀n da ǹ la: «Kaa Nahɔɔrɔ a nɔ̀ɔn Laban kɛ doɛ̃?» Ǹ ná a lɛ si: «Hiĩ, wɔ á doɛ̃.»

⁶Á nɔ̀n da ǹ la doo: «Á siĩni?» Ǹ ná a lɛ si: «Á siĩni. A nɛlɔ Raseli din nə́ ke sèren lui die ǹ ne.»

⁷Zakɔba wusoo á pɛ ǹ nɛ: «Ka ga, wasa á tɔn gole bɔrɔ. Tɔɔn lɛn lɛ sɔkɔn biikoo tɔn dɔ wa. Ka ǹ gɔ mu ni, ka ǹ loo ka wo ǹ kaa buu ganaa.»

⁸Ǹ nə́ Zakɔba lɛ si kɛnɛn: «Bɛ̀ tɔɔn lɛn tumaa bie ǹ daa ǹ kaa kɔn li wa, wɔ a boe la wa. Bɛ̀ ǹ tumaa daa ǹ nə́ kaa kɔn li ǹ mɛn waáraa, wɔ n kɔlɔ lɛ birikəĩ wɔ bɔ tù lɛ lɛ, wɔ tɔn mu baã, wɔ kɔ ǹ la.»

⁹Zakɔba bɛ́ tɔn boo diɛ ǹ nɛ, Raseli daa á dɔ, ka ǹ di a sèren ne, a giala, Raseli na á goã tɔɔn-lɛduə̃li lɛa.

¹⁰Zakɔba yii bɛ́ á mɛ ǹ diãgiĩ Laban a nɛlɔ Raseli ganaa lɔn, ka ǹ diãgiĩ lɛ a sèren lɛn nɛ, á n zɔ̃ á dɔ, á kɔlɔ lɛ birikəə̃, á bɔ tù lɛ lɛ, á mu kɔ ǹ diãgiĩ Laban a sèren lɛn la.

¹¹Zakɔba nə́ n sɔɔ Raseli ni, á n lɛn saa lon, á wuu pɛ.

¹²Zakɔba pɛ Raseli ni, mà ǹ di lɛ a min nə ka asɛ nɛ, mà ǹ miãnɛn Rebeka a nɛ n ka asɛ nɛ. Raseli baa si á woo pɛ ǹ di ni.

¹³Laban bɛ́ á ǹ miãnɛn a nɛgiĩ Zakɔba boo ma lɔn gɔrɔ, á baa si á woo n da lɛ. A bɛ́ á dɔ a li, á n sɔɔ a nɛ, á kũ á woo-n kion. Zakɔba siin lɛn tumaa laakalaa nɛ.

¹⁴Laban tɔ́n pɛ nɛ: «Ma din a min taãn-taãn nə n nɛ, n laanka masɛ n goon toto.» Zakɔba giã Laban li yǎa mui goon.

¹⁵Ǹ kɔn pinaa, Laban pɛ Zakɔba nɛ: «N nə n masɛ a min lɛa sonbore. Sɛnɛ, ma a boe la ma da bɛ mìi ni, ma pɛ mà n dí nya masɛ-n kooro wa. N saraa bɛ́ goɛ̃ lɛ mɛn ganaa, bɛ pɛ masɛ nɛ.»

¹⁶Bɛ á zɛnɛɛ, bɛ̀ nɛlɔ paa tá Laban lon. A goledɛnaa tɔ mà Leyaa, a kiɛɛrɛdɛnaa tɔ mà Raseli.

¹⁷Leyaa yiin man nə goã nuùnaa nɛ, Raseli na á goã siĩn yɔrɔ-a, a gama-a n kɔɔ̃nɛ.

¹⁸Raseli sii goã kɔɔ̃n Zakɔba ganaa. Bɛ lɛ nɛ, á pɛ Laban nɛ: «Ma á re dí nyɛɛ n nɛ lɛ̀ sɔbaa gɔ́ɔ̃ nɛ, n nə n nɛlɔ kiɛɛrɛdɛnaa Raseli lɛ kɔ ma la.»

¹⁹Laban tɔ́n pɛ: «Masɛ a lɛa, bɛ̀ má kɔ n la, bɛ á soɛ a kɔ min kɔsɔ la nɛ. Giã ma li.»

²⁰Zakɔba dí nya Laban nɛ lɛ̀ sɔbaa gɔ́ɔ̃ nɛ, Raseli a lɛa. Sɛnɛ, bɛa lɛ̀ sɔbaa lɛ nə́ n baa laan paa dinsɔɔ̃ lɛa Zakɔba yii li. A giala, á goã Raseli narɛ parsiini.

²¹Bɛ kio, Zakɔba tɔ́n pɛ Laban nɛ: «Maa lɔ lɛ kɔ ma la, man mɔrɔ a ganaa. A giala, maa dí biikoo lɛ pã.»

²²Laban màn-bii gigiã zɛnaa, á bǎã lɛ a minin tumaa bíi.

²³Wasa bɛ́ á mɛ, Laban ná a nɛlɔ Leyaa kũ, á woo kɔ Zakɔba la, á tèlò zɛnaa kun ni.

²⁴Laban ná a bɛ̀rɛlɔ Zilpaa kɔ a nɛlɔ Leyaa la, á n baa a bɛ̀rɛlɔ lɛa.

²⁵Lɛ̀ bɛ́ á waa ǹ mɛn waáraa, Zakɔba yɛ mà Leyaa nɛ. Á tɔ́n pɛ Laban nɛ: «Wàa-n sii n ka kɛ nɛ, ń zɛnaa ma nɛ? Ma bie má dí nya n nɛ Raseli a lɛa wa ya? Wàa na á baa ń ma bebele?»

²⁶Laban ná a lɛ si: «Diɛ̃lɔ kɔ giĩ la gololɔ nyɛɛnɛ, bɛa n zɛnɛɛ wɔsɛn piɛ wa.

²⁷Kɛ lɛ a kɔn wɔ ǹ zɔ́n piizii lɛ lɛ pã bɔrɔ. Bɛ kio, lɛ̀ sɔbaa dí nya ma-n doo, ma á re nɛlɔ kiɛɛrɛdɛnaa lɛ dɔ koe n la.»

²⁸Zakɔba na á bɛ lɛ zɛnaa. Á Leyaa a kɔn wɔ ǹ piizii lɛ lɛ pã, bɛ kio, Laban ná a nɛlɔ Raseli kɔ la lɔ lɛa.

²⁹Laban ná a bɛ̀rɛlɔ Biilaa kɔ a nɛlɔ Raseli la, á n baa a bɛ̀rɛlɔ lɛa.

³⁰Zakɔba tèlò zɛnaa kun ka Raseli dɔ nɛ, á bɛ narɛ parsiini, á la Leyaa nɛ. Á wusoo á lɛ̀ sɔbaa dí nya Laban nɛ doo, Raseli taman yii.

³¹Dɛnaa bɛ́ á yɛ, mà Zakɔba a Leyaa narɛ taãn wa, á gɛrɛsiɛ kɔ Leyaa la, Raseli goã lɔ nɛ-yɛle baãnaa lɛa.

³²Leyaa nɔ̀ si, á nɛgiĩ yɛ, a ná a tɔ kɔ Urubɛn (bɛ giala mà "Ga min a sii Walan"). A giala, a na á pɛ: «Dɛnaa ga maa nɔmaa ganaa, ma zuũ lɛ á die ma narɛ kanna.»

³³Bɛ kio, á nɔ̀ si doo, á nɛgiĩ yɛ. Á tɔ́n pɛ: «Lawa ma mà ǹ ba ma narɛ wa, bɛ lɛ nɛ, á kɛ dɔ kɔ ma la.» Á bɛ bíi Simiɔn (bɛ giala mà "Boo ma").

³⁴Á wusoo doo á nɔ̀ si, á nɛgiĩ yɛ. Á pɛ ka bɛ nɛ: «Sisia kəni, ma zuũ lɛ á die damaɛ ma ganaa, a giala, má nɛgiĩ sɔɔ yɛ nɛ.» Bɛ lɛ nɛ, á bɛa nɛgiĩ lɛ bíi Levii (bɛ giala mà "Damakɔn").

³⁵Bɛ kio doo, á nɔ̀ si á nɛgiĩ yɛ. Á tɔ́n pɛ: «Sisia, man die Dɛnaa tɔ boe.» Bɛ lɛ nɛ, á nɛ lɛ bíi Zudaa (bɛ giala mà "Tɔbɔ"). Bɛ kio, a nɛ-yɛ nə́ n lɛ kũ.