Read Samo, Southern SGK 30 Bible Online

SGK 30 - Samo, Southern bible

SGK 30

¹Raseli bɛ́ á yɛ, mà asɛ a nɛ yii Zakɔba-n wa, á foo wuu pɛ ǹ gololɔ lɛ li. Á pɛ Zakɔba nɛ: «Nɛnyaanan kɔ ma la, bɛ bie wa, man giɛ̃ dɛ!»

²Zakɔba foo yoo Raseli li, á pɛ: «Lawa n ka masɛ-n ya? Lawa din na a lɛ kɔ, mà n nɔ̀ si wa!»

³Raseli tɔ́n pɛ. «Maa bɛ̀rɛlɔ Biilaa á ke. N mɔrɔ a ganaa, màn mɛn bɛ́ toɛ, a nɛnyaanan yɛ. Masɛ dɔ á re nɛnyaanan yii bɛ ganaa, ma ǹ kũ ma din wɔn lɛa.»

⁴A ná a bɛ̀rɛlɔ Biilaa kɔ Zakɔba la lɔ lɛa, á n mɔrɔ a ganaa.

⁵Biilaa nɔ̀ si, á nɛgiĩ yɛ Zakɔba nɛ.

⁶Raseli tɔ́n pɛ: «Lawa sonbore kɔ ma la. Á ma lɛ si dɔn, á nɛgiĩ kɔ ma la.» Bɛ lɛ nɛ, á bíi Dan (bɛ giala mà "Sonbore kɔ min la").

⁷Raseli a bɛ̀rɛlɔ Biilaa lɛ nɔ̀ si doo, á nɛgiĩ paabaa ǹ wɔ yɛ Zakɔba nɛ.

⁸Raseli tɔ́n pɛ: «Ma yɔ gole bɔ ma gololɔ lɛ ganaa, ma gɔ̀lɔ̀baa yɛ.» Á bɛa nɛgiĩ lɛ tɔ kɔ Nɛfutalii (bɛ giala mà "Yɔbɔkɔn").

⁹Leyaa bɛ́ á yɛ, mà a nɛ-yɛ nə́ n lɛ kũ, a ná a bɛ̀rɛlɔ Zilpaa kũ, á kɔ Zakɔba la lɔ lɛa.

¹⁰Leyaa a bɛ̀rɛlɔ Zilpaa nɛgiĩ goon yɛ Zakɔba nɛ.

¹¹Leyaa tɔ́n pɛ: «Ma gɛrɛsiɛ bɔ koɛ!» Á nɛ lɛ bíi Gaadi (bɛ giala mà "Gɛrɛsiɛ").

¹²Bɛ kio doo, Zilpaa nɛgiĩ paabaa ǹ wɔ yɛ Zakɔba nɛ.

¹³Leyaa tɔ́n pɛ: «Maa wɔ bǐɛ̃ kɔ dɛ! A giala, lɔn nə́ ma bíi bǐɛ̃lɔ.» Á bɛa nɛ lɛ bíi Asɛɛrɛ (bɛ giala mà "Bǐɛ̃kɔmaa").

¹⁴*Belee kurii waáraa, Urubɛn woo ga lɔn gɛrɛsiɛ yɛ ǹ da nɛ li don. Á bɛa da nɛ lɛ yɛ, á daa kɔ ǹ dan Leyaa la. Raseli tɔ́n pɛ Leyaa nɛ: «Ma gɔ ka n nɛgiĩ lɛ a da nɛ lɛ kɔ́n nɛ.»

¹⁵Leyaa ná a lɛ si: «Ń ma zuũ si ma la, bɛa doe n yii li wa, yǎa n maa nɛgiĩ dɔ a lɔn gɛrɛsiɛ yɛ ǹ da nɛ sii?» Raseli tɔ́n pɛ: «A bɛ́ miɛ̃, Zakɔba die a giã kunun n ni pelo tèlò-n, n nɛgiĩ lɛ a da nɛ lɛ doo.»

¹⁶Wasamiɛ̃nɛ, Zakɔba bɛ́ boe don die, Leyaa soo á woo n da lɛ, á pɛ nɛ: «N doamaa nɛ n tèlò zɛnaa kun ka masɛ nɛ. A giala, má maa nɛ a lɔn gɛrɛsiɛ yɛ ǹ da nɛ kɔ Raseli la, màn mɛn bɛ́ toɛ, ma Zakɔba si.» Á bɛa tèlò lɛ zɛnaa kun ka Leyaa nɛ.

¹⁷Lawa Leyaa lɛ si, á daa á nɔ̀ si, á nɛgiĩ soorobaa ǹ wɔ yɛ Zakɔba nɛ.

¹⁸Leyaa tɔ́n pɛ: «Lawa ma saraa, maa bɛ̀rɛlɔ kɔ ma zuũ la lɛ taman yii.» A ná a nɛgiĩ lɛ bíi Isakaara (bɛ giala mà "Saraa").

¹⁹Leyaa wusoo doo á nɔ̀ si, á nɛgiĩ sɔrɔbaa ǹ wɔ yɛ Zakɔba nɛ.

²⁰Á pɛ ka bɛ nɛ: «Lawa màn siĩn kɔ masɛ la dɛ! Sisia kəni, ma zuũ lɛ á die ma là doɛ̃, a giala, má nɛgiĩ sɔrɔ yɛ nɛ.» Á nɛgiĩ sɔrɔbaa ǹ wɔ lɛ bíi Zabulɔn (bɛ giala mà "Là").

²¹Bɛ kio, á nɛlɔ goon yɛ, á bɛ bíi Diinaa.

²²Lawa nə́ n yiri koa Raseli dɔ li, a ná a nyankɔ lɛ si, á gɛrɛsiɛ kɔ la.

²³Á daa á nɔ̀ si, á nɛgiĩ yɛ. Á pɛ ka bɛ nɛ: «Lawa sìi saa á bɔ ma la kəni!»

²⁴Á bɛ bíi Zozɛfu (bɛ giala mà "Màn da màn Li"), a giala mà a na á goã pii kɛnɛn: «Dɛnaa die a nɛgiĩ kɔsɔ da li ma lon!»

²⁵Raseli bɛ́ á Zozɛfu yɛ lɔn, Zakɔba pɛ Laban nɛ: «Ma toa walan, ma wo piɛ, maa gána nɛ.

²⁶Ma dí nya n nɛ lɔn mɛnɛn taman yii, bɛn kɔ ma la ka ǹ nɛnyaanan nɛ, man die woe. Ma dí mɛn nya n nɛ, n din tá bɛ doɛ̃ parsiini.»

²⁷Laban tɔ́n pɛ nɛ: «Bɛ̀ ma sii tá kɔɔ̃nɛ n ganaa, n nə n too kɔ ma lon. Maa mànan nə́ nyaa ma nɛ, mà n din a lɛa nɛ, Dɛnaa barka wɔ ma nɛ.

²⁸N bɛ́ li ma n saraa lɛ mɛn ganaa, bɛ pɛ, ma á re bɛ koe n la.»

²⁹Zakɔba ná a lɛ si: «Ma dí nya n nɛ lɔn, n tɔɔn lɛn nə́ bulubɔ kun ka ma nɛ, n dinmaa á bɛ doɛ̃.

³⁰Ma bɛ́ ma tɔn da ǹ mɛn waáraa wa, màn taãn bɛ́ a goã n lon wa. Sɛnɛ, maa daa kɛ lɛ gɔ́ɔ̃ nɛ, Dɛnaa barka wɔ n nɛ, n gɔn màn mɔnaa parsiini. Masɛ n die ma din a kion dí nyɛɛ biĩ kəni?»

³¹Laban tɔ́n pɛ: «Man die n sarɛɛ ka wàa nɛ?» Zakɔba ná a lɛ si: «N baran masɛ saraa ka màn kɔ́n nɛ wa. Ma bɛ́ re màn mɛn boo diɛ n nɛ, bɛ̀ ń lɛ kɔ ń bɛ kɔ ma la, ma á re wusii ma da n tɔɔn lɛn lɛduə̃, ma ga ǹ walan.

³²Ma á re n bibiĩ n sèren laanka n bòen lɛn tumaa bii pelo. Sère nɛ mɛn tumaa bɛ́ tì sɛsia, hinlaa kɛkɛrɛ ná a dɔ̀ɔ̃ nɛ, bòe mɛn tumaa dɔ bɛ́ tì sɛsia, hinlaa kɛkɛrɛ ná a dɔ̀ɔ̃ nɛ, ma á die bɛn tumaa boe, ma ǹ bɔ n tɔɔn lɛn li. Bɛ dinsɔɔ̃ n die goɛ̃ masɛ a saraa lɛa.

³³Bɛ̀ ń daa ga masɛ a saraa lɛ ganaa ǹ mɛn pinaa, ń tá re maa min peperebaa doɛ̃ bɛa pinaa. Bɛ̀ ń bòe mɛn tumaa yɛ bòen lɛn bii, a ná a ba sɛsia wa, bɛ̀ ń sère mɛn dɔ yɛ sèren lɛn bii, tì ná a ba a ganaa wa, a dɔ̃ mà man má n wurumu baa.»

³⁴Laban tɔ́n pɛ: «Á siĩni. N pɛ lɔn, a zɛnaa miɛ̃.»

³⁵A din pinaa lɛ nɛ, Laban butumu sɛsia tumaa waa, ka bòe dan sɛsia tumaa nɛ, bòe dan fufun laanka sère tìtìn ni, á ǹ kaa a nɛnyaanan nyɛɛnɛ.

³⁶Á toa Zakɔba nə́ n gòã bɔ a nyɛɛn lɛawaa sɔɔ, a dɔ tɔ́n yoo á kɔ a kio lɛ. Zakɔba na á goã Laban a tɔɔ gialakunun lɛn lɛduĩ.

³⁷Zakɔba ga dan kɔnɔn gùrù buruun li: da lɛ a goon tɔ n puplie, goon tɔ n amandie, goon tɔ n platane. Á bɛa bàlà burunun lɛn bǎã tɛnɛn fɔrɔ bɔ, á ǹ nyaǹ kɔ fufu.

³⁸Á bɛa bàlà nyaǹdɛnan lɛn kaa tɔɔn lɛn mu mi ǹ màn nɛ ǹ yɔrɔ-a. Bɛ̀ ǹ nə́ die mu mii ǹ mɛn waáraa, manə n nanaɛ taãn-taãnɛ.

³⁹Tɔɔn lɛn nə́ goã dii kɔn la bàbàlan lɛn yɔrɔ-a. Ǹ daanan lɛn nə́ nɔ̀ si, ǹ nə́ nɛnyaanan yɛ sɛsia, kɛkɛrɛ nə́ n tɛn dɔ̀ɔ̃ nɛ, ǹ tɛn nə́ sɛsia wakaka nɛ.

⁴⁰Zakɔba sèren mɛnɛn na á ǹ kaa ǹ gɔrɔn, á bɛn lɛn loo, á ǹ yɔrɔ dia Laban wɔn lɛn la, ǹ mɛnɛn tumaa bɛ́ sɛsia, hinlaa tì a tɔɔn lɛn bii. Á tɔɔ kurun yɛ miɛ̃, á ǹ na, á ǹ bɔ kɔn ka Laban wɔn nɛ.

⁴¹Bɛ̀ tɔɔn lɛn kasiɛ̃ wolen tá dii kɔn la lɔn, Zakɔba n bàbàlan lɛn kiɛ tán-a ǹ yɔrɔ-a, ǹ mu mi ǹ goo lɛ nɛ, màn mɛn bɛ́ toɛ, ǹ dii kɔn la bɛn lɛn yɔrɔ-a.

⁴²Bɛ̀ tɔɔ pɛrɛɛ wolen manɛ, a bàbàlan lɛn kiɛ tán bɛn yɔrɔ-a wa. Tɔɔ pɛrɛɛ wolen lɛn man nə́ goã Laban wɔn lɛa, a kasiɛ̃ wolen lɛn man nə́ goã Zakɔba wɔn lɛa.

⁴³Zakɔba màndɛnaa baa parsiini, tɔɔ kuru gigiã goã a lon: sèren ne, bòen ne, nyɔɔmaan nɛ ka dundunun ni. Bɛ̀rɛlɔn dɔn laanka bɛ̀rɛgiĩn nə́ goã a lon.