Read Samo, Southern SGK 33 Bible Online

SGK 33 - Samo, Southern bible

SGK 33

¹Zakɔba nə́ n yii saa á ga, á Ezawu yɛ die ka giĩ biɛsii-n (400) kun ni. Á nɛnyaanan lɛn gii Leyaa laanka Raseli bii, ka bɛ̀rɛlɔ min paa lɛ nɛ.

²Á bɛ̀rɛlɔ min paa lɛ laanka ǹ nɛnyaanan kaa nyɛɛnɛ, bɛ kio, Leyaa laanka a nɛnyaanan nə́ kɔ bɛn lɛ, á tɔ́n Raseli laanka a nɛ Zozɛfu kaa bɛn kio.

³A dinmaa kiɛ̃ ǹ nyɛɛnɛ, á tɔ wɔ bɛ̀ a kaa tán gunyin sɔbaa, yǎa á woo á dɔ ǹ golo lɛ li.

⁴Ezawu baa si á woo n da lɛ, á n sɔɔ a nɛ ka parasa. Ǹ dinin paanan nə́ n lɛ da wuu-n kun.

⁵Bɛ kio, Ezawu nə́ n yii saa, á lɔn lɛn laanka nɛnyaanan lɛn yɛ. Á tɔ́n nɔ̀n da Zakɔba la: «Dien man ka kɛn nɛ kunun n ni?» Zakɔba ná a lɛ si: «Lawa ma gɔ ka nɛnyaanan mɛnɛn nɛ, bɛn lɛn manɛ.»

⁶Bɛ̀rɛlɔn lɛn laanka ǹ nɛnyaanan nə́ n zɔ̃, ǹ nə́ n mɔrɔ, ǹ nə́ kaa tán-a a giulun.

⁷Leyaa dɔ laanka a nɛnyaanan nə́ n zɔ̃, ǹ nə́ n mɔrɔ, ǹ nə́ kaa tán-a a giulun. Bɛ kio, Zozɛfu dɔ laanka Raseli nə́ n zɔ̃, ǹ nə́ n mɔrɔ, ǹ nə́ kaa tán-a a giulun.

⁸Ezawu nɔ̀n da: «Ma kaa tɔɔn mɛnɛn lɛ, n nə n die wàa zɛnɛɛ ka bɛn tumaa nɛ?» Zakɔba tɔ́n pɛ: «Man má daa n mɛ bɔ n nɛ, ka bɛn nɛ.»

⁹Ezawu tɔ́n pɛ: «Diɛ̃giĩ, màn mɛn bɛ́ ma lon, bɛ tá ma boe. Màn mɛn bɛ́ n gɔn, bɛ toa n gɔn.»

¹⁰Zakɔba pɛ nɛ: «Haayii, ma nə n nyankoe. Bɛ̀ sii ba n gɔ́ɔ̃-n doo masɛ wɔ paǹ li wa, ma bɛ́ n goe ka màn mɛn nɛ, lɛ kɔ n si. A giala, ma yii bɛ́ á mɛ n ganaa lɔn, a n ka min bɛ́ Lawa yii lɔn. N bɛ́ ń lɛ kɔ masɛ ganaa,

¹¹ma da bǐɛ̃baa ǹ màn mɛn kɔ n la, lɛ kɔ n bɛ dɔ si. A giala, Lawa na á ma gɔ. Ma laadoo bɛ́ màn mɛn tumaa ganaa, a tumaa tá ma lon.» Zakɔba nə́ n laa Ezawu ganaa, yǎa á lɛ kɔ á mànan lɛn si.

¹²Ezawu tɔ́n pɛ. «Yoo wɔ n ta. Ma á re tɔ we kunun n ni.»

¹³Zakɔba ná a lɛ si kɛnɛn: «Gologiĩ, ń doɛ̃, nɛnyaanan lɛn pàã á kiɛɛrɛ. Ka bɛ dɔ nɛ, sère daanan laanka dii daanan tá ma lon, nɛnyaan bɔnboɛɛnɛn manə ǹ kio. Bɛ̀ wɔ tɔ wɔ ǹ nɛ, á re kiɛ̃ ǹ tɔ-wɔ lɛ dan la, ta pinin goon tɔ din ni, ǹ tumaa n giɛ̃.

¹⁴Bǐɛ̃ kɔ, n wo wɔ nyɛɛnɛ. Ma din tá re tɔ we tɔɔn lɛn kio boɛboɛ, kun ka nɛnyaanan lɛn nɛ, yǎa ma doe n li Seyiri gána nɛ.»

¹⁵Ezawu tɔ́n pɛ: «Minin mɛnɛn bɛ́ ǹ nə́ daa ma da zii, ma á die bɛn kɔnɔn toɛ kunun n ni.» Zakɔba ná a lɛ si: «Ma bɛn baa lɔn? Yǎa n bǐɛ̃ kɔ, n masɛ kũ doɛ̃!»

¹⁶A din pinaa, Ezawu nə́ n bɔyaa, á woo Seyiri gána nɛ,

¹⁷Zakɔba sɛ́ woo Sukɔti kiwi. Á kion dɔ walan a din wɔ lɛa, á zìã pɛnɛ a tɔɔn dɔn wɔ lɛa. Bɛ lɛ na á toa, ǹ tá bɛa bǎã lɛ bíi Sukɔti bɛ giala mà "Zìãn".

¹⁸Zakɔba bɛ́ á soo Mezopotamii gána nɛ, á daa á dɔ Sisɛmu kiwi, Kanaan gána-n ka bǐɛ̃ nɛ. Á giã á n wɔlɔ kunu kɔ kiwi lɛ ganaa.

¹⁹ A bɛ́ a ná a zìã dɔ bǎã mɛn nɛ, a na á bɛa bǎã lɛ pii Sisɛmu ǹ di Amɔɔrɔ tɔrɔn lon, wɔrɔ we paabiɛ.

²⁰Á *wúlu bɔ ǹ bǎã dɔ walan, á bíi mà "Lawa n Izirayeli a Lawa lɛa".