Read Samo, Southern SGK 35 Bible Online

SGK 35 - Samo, Southern bible

SGK 35

¹ Bɛ kio, Lawa pɛ Zakɔba nɛ: «Yoo n wo Betɛli, n giã walan. N *wúlu bɔ ǹ bǎã dɔ masɛ Lawa-n walan, man din nyaa n nɛ bǎã mɛn nɛ, bɛ̀ n bɛ́ baa sii n gologiĩ Ezawu nyɛɛnɛ.»

²Zakɔba tɔ́n pɛ a kion minin manɛ, min mɛnɛn bɛ́ kun ni ka bɛn dɔn nɛ: «Tɔrɔ kɔsɔn bɛ́ mànan mɛnɛn guguru koe lawan lɛa, ka bɛn waa, ka ǹ bɔ ka bii. Ka ka dinin *yoreen kɔ, ka mɔnaa kɔsɔn wɔ.

³Ka yoo wɔ n ta Betɛli. Lawa mɛn bɛ́, á maa nyankɔ lɛ si, maa nɔmaa biikoo li, man die wúlu bɔ ǹ bǎã doe bɛ-n walan. Ma bɛ́ woe bǎã woo bǎã nɛ, a din Lawa lɛ n kun ka ma nɛ.»

⁴Dìn mɛnɛn bɛ́ ǹ gɔn, tɔrɔ kɔsɔn nə́ ǹ guguru koe lawan lɛa, ǹ nə́ bɛn goa, ǹ nə́ woo ǹ kɔ Zakɔba la, ka ǹ too ganaa ǹ kaaranan nɛ. Da gole mɛn bɛ́ kunu Sisɛmu ganaa, Zakɔba nə́ ǹ bĩ bɛ giulun.

⁵Ǹ bɛ́ ǹ nə́ soo, ǹ nə́ n bɔ bǎã lɛ nɛ, Lawa nyɛ́ɛ tɔrɔ kɔ́n da lɛkoro lɛ-a kiwi minin ganaa. Min kɔ́n yii wɔ, á Zakɔba a nɛnyaanan lɛn kio loo wa.

⁶Zakɔba laanka a tá kun wolen lɛn tumaa dɔ Luuzu kiwi. A din lɛ nɛ ǹ tá bíi Betɛli, Kanaan gána nɛ.

⁷Á wúlu bɔ ǹ bǎã dɔ walan, á bíi "Betɛli a Lawa", a giala, Lawa na á goã á n din nyaa-n walan lɛn, bɛ̀ a bɛ́ baa sii ǹ gologiĩ lɛ nyɛɛnɛ.

⁸Rebeka too lɔ mɛn gɔn, a tɔ n Deboraa, bɛ́ gã, ǹ ná a gere bĩ da kɔ́n giulun, kunu Betɛli ganaa. Zakɔba bɛa da lɛ bíi "Wuu Pɛ ǹ Da".

⁹ Zakɔba bɛ́ boe Mezopotamii gána-n die, Lawa wusoo á n din nyaa-n doo, á barka wɔ a nɛ.

¹⁰Lawa pɛ nɛ: «Ń tɔ na á goã Zakɔba. Sɛnɛ, ǹ ba re n bíi Zakɔba doo wa, n tɔ n Izirayeli sisia.» Bɛ lɛ nɛ, Lawa ná a tɔ kɔ Izirayeli.

¹¹ Lawa pɛ-n doo: «Man Lawa Pàãyiidɛnaa lɛa. Ma á die toɛ n nɛ gigiã yɛ, n tɔrɔ mɔnaa ǹ gána baa. Ń tá re tɔrɔ gigiã a díi biɛ. Kiin tá re boe n tɔrɔn bii.

¹²Ma gána mɛn kɔ Abrahamu laanka Izaaki la, man die bɛ koe n la. N tɔrɔn mɛnɛn bɛ́ re yii n kio, ma á re koe bɛn dɔn la.»

¹³Lawa boo da-n bǎã mɛn nɛ, á yoo walan á dii lon.

¹⁴ Lawa boo da-n bǎã mɛn nɛ, Zakɔba kɔlɔ doa walan, á yɔ laanka nyɔɔ zuməə a ganaa.

¹⁵Lawa boo da-n bǎã mɛn nɛ, á bɛa bǎã lɛ bíi Betɛli (bɛ giala mà "Lawa a Kion").

¹⁶Zakɔba laanka a kion minin nə́ soo ǹ nə́ n bɔ Betɛli. Ǹ bɛ́ zii la woe, Raseli nɛ yɛ, bɛ̀ ǹ wɔlɔ bɛ́ tɔn lui-n Efrataa ganaa boɛɛnɛ. A nɛ yɛ ǹ gɔn kaka kɔ.

¹⁷A bɛ́ nɔmaa-n nɔɔrɔ lɛ gɔn biikoo mɛn li, nɛ-yoe wole tɔ́n pɛ nɛ: «N baran nyɛ́ɛ baa wa, a giala, n nɛginin kɔsɔ yɛ doo.»

¹⁸Raseli dɔ gɛ̀ gɔn la. A fɔfoã bɛ́ re nyɛɛ ǹ mɛn waáraa, á nɛ lɛ tɔ kɔ Bɛn-Onii, bɛ giala mà "Là Paparɛ ǹ Nɛ". Sɛnɛ ǹ di ná a tɔ kɔ Bɛnzamɛn bɛ giala mà "Ma gusin gialaa ǹ nɛ".

¹⁹Raseli gã, ǹ ná a gere bĩ Efrataa zii la. Efrataa kiwi lɛ nɛ, ǹ tá bíi Bɛtlehɛmu.

²⁰Zakɔba kɔlɔ doa a yala la. A din lɛ nɛ, ǹ nə́ bíi haalɛ tɔn pelo, "Raseli a Yala Kɔlɔ".

²¹Izirayeli nə́ n bɔ bɛa bǎã lɛ nɛ, á woo a zìã doa Migdala-Edɛɛrɛ kiwi kio.

²² Izirayeli bɛ́ bɛa bǎã lɛ nɛ, a nɛgiĩ Urubɛn giã kun ka a bɛ̀rɛlɔ Biilaa nɛ ǹ kɔ́n pinaa. Izirayeli ma, á busu a ganaa parsiini. Zakɔba na á nɛgiĩ fulupaa yɛ.

²³A lɔ Leyaa nə́ ǹ mɛnɛn yɛ nɛ: Urubɛn ná a nɛgiĩ bibinaa lɛa. Bɛ kio Simiɔn, Levii, Zudaa, Isakaara ka Zabulɔn nɛ.

²⁴Raseli a nɛnyaanan man ka Zozɛfu laanka Bɛnzamɛn nɛ.

²⁵Raseli a bɛ̀rɛlɔ Biilaa nə ǹ mɛnɛn yɛ, bɛn man ka Dan laanka Nɛfutalii ni.

²⁶Leyaa a bɛ̀rɛlɔ Zilpaa nə ǹ mɛnɛn yɛ, bɛn man ka Gaadi laanka Asɛɛrɛ nɛ. Zakɔba nɛnyaanan mɛnɛn yɛ Mezopotamii gána nɛ, ǹ dinin lɛn man ka bɛn nɛ.

²⁷ Zakɔba woo ǹ di Izaaki li Manbre kunu Kiriyati-Arabaa kiwi ganaa, ǹ nə́ bíi Ebrɔn sisia. Abrahamu laanka Izaaki giã walan lɛlɛ.

²⁸Izaaki bɛ́ giɛ̃, bɛ̀ a lɛ̀ paabiɛ ka pɔkiwisi (180) ni.

²⁹Á zizi kɔ parsiini á tɔ́n gã. A nɛgiĩ Ezawu laanka a nɛgiĩ Zakɔba ná a gere bĩ.