Read Samo, Southern SGK 4 Bible Online

SGK 4 - Samo, Southern bible

SGK 4

¹Aadã laanka a lɔ Ɛvu lɛ kɔn dɔ̃. Ɛvu nɔ̀ si á nɛ yɛ, ǹ nə́ bíi Kanyɛ (bɛ giala mà "Lawa pàã"). Á tɔ́n kɛ pɛ bɛa biikoo li: «Má giĩ yɛ ma da kanaa, ka Lawa pàã nɛ.»

²Bɛ kio á ǹ diɛ̃ yɛ, ǹ nə́ bíi Abeli. Abeli na á goã tɔɔn-lɛduə̃li lɛa, Kanyɛ na á goã buu-kɔsɔli lɛa.

³Biikoo kɔ́n bɛ́ á dɔ, Kanyɛ ná a buu kɔsɔ ǹ màn lɛ kɔ́n bɔ á kɔ Dɛnaa Lawa la, *wúlu màn lɛa.

⁴ Abeli dɔ ná a tɔɔn gɔ́ɔ̃ binaa nɛn kɔnɔn waa, á ǹ baa wúlu màn lɛa, a ná a siĩ bǎã taãnan kɔ Dɛnaa la. Dɛnaa Lawa nə́ n yɔrɔ bǐɛ̃ da Abeli laanka a wúlu màn la,

⁵sɛnɛ, a n yɔrɔ bǐɛ̃ da Kanyɛ laanka a wúlu màn la wa. Bɛ́ Kanyɛ foo yoo, a yɔrɔ yii ziziɛ̃.

⁶Dɛnaa tɔ́n pɛ nɛ kɛnɛn: «Wàa na á baa n foo á yui, n nə́ n yɔrɔ kɔsɛ?

⁷Bɛ̀ ń zɛnaa doɛ̃, n tá re n mìi siɛ lon. Sɛnɛ, bɛ̀ n zɛnaa doɛ̃ wa, sii baraa tá n kiɛnlɛ-a, kɔɔ̃naa we n ganaa, á n giɛ li mà a n kũ a giã n mìi la. Sɛnɛ, n doa n nə n si sii baraa lɛ la.»

⁸ Ǹ kɔn pinaa, Kanyɛ nə́ ǹ diɛ̃ Abeli lɛ bíi á pɛ nɛ mà a daa ǹ nə n ta don. Ǹ bɛ́ ǹ nə́ dɔ don, Kanyɛ yoo á mɛ ǹ diɛ̃ Abeli la, á dɛ á da tán.

⁹Dɛnaa tɔ́n nɔ̀n da Kanyɛ la kɛnɛn: «N diɛ̃ Abeli lɛ á maa?» Kanyɛ ná a lɛ si á pɛ: «Maa doɛ̃ wa. Masɛ n ma diɛ̃ lɛduə̃li lɛa ya?»

¹⁰ Lawa tɔ́n pɛ nɛ: «Wàa mɛn sii n ke ń zɛnaa? N diɛ̃ lɛ mà tá n toɛ tán, n lɛ dii ma ganaa, mà ma asɛ a gɛ̀ dòo bɔ.

¹¹A kũ sisia ganaa, n diɛ̃ kɛ lɛ ń dɛ, tán mɛn nə n lɛ bũ a ná a mà mi, masɛ n lɛn pipiã bíi n li bɛa tán lɛ la.

¹²Ta n din kɔsɔ lɔn, n ba re màn kɔ́n yii a-n doo wa. N tá re goɛ̃ bibiə̃ wole lɛa, gùli lɛa, biikoo tumaa li kanaa gɔ́ɔ̃ nɛ.»

¹³Kanyɛ tɔ́n pɛ Dɛnaa-n kɛnɛn: «N guĩ mɛn da ma mìi ni, á guguru ma ganaa.

¹⁴Bɛ̀ ń ma loo pelo, ń ma bɔ tán kɛ la, ma á re goɛ̃ durii ni n la. Ma n die goɛ̃ bibiə̃ wole lɛa, gùli lɛa, kanaa kɛ gɔ́ɔ̃ nɛ biikoo tumaa li. Bɛ̀ min woo min n ma yɛ, á die ma dii.»

¹⁵Lawa tɔn pɛ kɛnɛn: «Haayii! Bɛ̀ min nə́ nsɛ Kanyɛ dɛ, yǎa gere sɔbaa boe n gɛ̀ dòo lɛa.» Dɛnaa sii a kɔnboe da Kanyɛ ganaa, màn mɛn bɛ́ toɛ, bɛ̀ min kaa lɛ, a baran dɛ wa.

¹⁶Kanyɛ ná a din wɔlɔ lui Dɛnaa ganaa, á woo gána kɔ́n nɛ Edɛn a lɛ̀giala gɔn la, ǹ nə́ bíi Nɔdi (bɛ giala mà "Gùli kɔ ǹ bǎã").

¹⁷Kanyɛ laanka a lɔ kɔn dɔ̃. Lɔ lɛ nɔ̀ si, á nɛ yɛ, ǹ nə́ bíi Enɔɔki. Kanyɛ yoo á kiwi goon koa, a ná a nɛgiĩ Enɔɔki lɛ tɔ kɔ a ganaa.

¹⁸Enɔɔki na á Iradi yɛ, Iradi na á Mewuzayeli yɛ, Mewuzayeli na á Metukayeli yɛ, Metukayeli na á Lemɛki yɛ.

¹⁹Lemɛki lɔ paa goa: goon tɔ mà Adaa, goon kɛ dɔ tɔ mà Siilaa.

²⁰Adaa na á Yabaali yɛ: min mɛnɛn tumaa bɛ́ zìã doe, bɛ̀ ǹ giã a nɛ ka ǹ tɔɔn nɛ, bɛn lɛn digolo n ka bɛ nɛ.

²¹Ǹ diɛ̃ goã, bɛ tɔ n Yubaali: min mɛnɛn tumaa bɛ́ tùtu dii, ǹ nə́ pìi pii, bɛn digolo n ka bɛ nɛ.

²²Siilaa dɔ́ nɛgiĩ yɛ, a tɔ n Tubaali-Kanyɛ. Bɛ na á goã fuũ lɛa, á goã zan màn lɛbɔlen laanka fɔlɔ màn lɛbɔlen zɛnɛɛ. Tubaali-Kanyɛ ǹ miãnɛn na á goã ka Naamaa nɛ.

²³Lemɛki pɛ a lɔn lɛn manɛ kɛnɛn: Adaa laanka Siilaa, ka n too kɔ ma lon. Lemɛki a lɔn lɛn, ka n too kɔ doɛ̃. Giĩ bɛ́ á n gɔn da ma ganaa, má dɛ á gã. Nɛ lɛ bɛ́ á màn toɛ̃ ma ganaa, má dɛ á gã.

²⁴Bɛ̀ giĩ sɔbaa nə n dii a Kanyɛ a gɛ̀ dòo bɔ, yǎa giĩ pɔsɔbaawensɔbaa nə n dii, bɛ tɔn masɛ a gɛ̀ dòo boe.

²⁵Aadã laanka a lɔ lɛ kɔn dɔ̃ doo, ǹ nə́ nɛgiĩ yɛ. Ɛvu ná a tɔ kɔ Sɛɛti (bɛ giala mà "Lawakɔ"). A giala a na á goã pii mà: «Kanyɛ na asɛ a nɛgiĩ Abeli mɛn dɛ, mà Lawa na á nɛgiĩ kɔsɔ kɔ asɛ la bɛ dòo.»

²⁶Bɛ kio, Sɛɛti dɔ nɛgiĩ yɛ, a ná a tɔ kɔ Enɔɔsi. A saa bɛa waáraa ganaa, minbuiinin ná a giala kɔ ǹ nə́ Lawa nyankoe, bɛ̀ ǹ tá bíi «Dɛnaa.»