Read Samo, Southern SGK 42 Bible Online

SGK 42 - Samo, Southern bible

SGK 42

¹Zakɔba bɛ́ á ma, mà *belee tá Ezipti gána nɛ, á pɛ a nɛgiĩn manɛ: «Ka ǹ tán giɛ kɔn ganaa?

² Haya! Má ma mà belee tá Ezipti gána nɛ. Ka yoo ka wo walan, ka belee pii ka da kɔ wɔ la, wɔ bii, màn mɛn bɛ́ toɛ, wɔ la.»

³Zozɛfu ǹ golon lɛn min fù yoo, ǹ nə́ woo Ezipti gána nɛ, mà maǹ woe belee pii.

⁴Sɛnɛ, Zakɔba Bɛnzamɛn dia kun ka ǹ golon lɛn nɛ wa, a giala, a na á goã pii, mà sii tɔ́n bɛ dɔ yɛ walan.

⁵Zakɔba a nɛnyaanan lɛn nə́ dɔ Ezipti gána nɛ, kun ka belee-piili kɔsɔn dɔn nɛ, a giala bòo lɛ goã wɛ̃-n Kanaan gána nɛ.

⁶Zozɛfu giã gána lɛ mìi la, a din na á goã belee siɛ̃ a minin tumaa la. Ǹ golon lɛn nə́ dɔ, ǹ nə́ kaa tán a giulun, ǹ nə́ n mìi kuməə tán.

⁷Zozɛfu nə́ ǹ golon lɛn yɛ, á ǹ dɔ̃. Sɛnɛ, á n din duru ǹ ganaa, á kakaarɛ kɔ ǹ ganaa. Á pɛ ǹ nɛ: «Ka ǹ boe maa?» Ǹ ná a lɛ si: «Wɔ ǹ boe Kanaan gána nɛ. Wɔ n wɔ́ daa belee pii.»

⁸Zozɛfu nə́ ǹ golon lɛn dɔ̃, sɛnɛ, ǹsɛn na asɛ dɔ̃ wa.

⁹ Zozɛfu bɛ́ á goã á narɛɛn mɛnɛn wɔ ǹ wɔ paǹ li, a yiri gisĩ ka bɛn nɛ. Á tɔ́n pɛ ǹ nɛ: «Táa ka n ka n duru, ka daa ga gána lɛ a pàã wɛɛnaabaa ǹ bǎãn ganaa.»

¹⁰Ǹ nə́ Zozɛfu lɛ si kɛnɛn: «Haayii dɛ! Wɔa dɛnaagiĩ, wɔ ǹ wɔ́ daa belee pii.

¹¹Wɔsɛn man giĩ goon a nɛnyaanan lɛa, min taãnan man ka wɔ nɛ, wɔ bie duru a da ga gána ganaa wolen lɛa wa.»

¹²Zozɛfu wusoo á pɛ ǹ nɛ: «Haayii dɛ! Ka ǹ ka daa ga gána lɛ a pàã wɛɛnaabaa ǹ bǎãn ganaa.»

¹³Ǹ nə́ tɔ́n pɛ: «Wɔ n wɔ́ goã min fulupaa wɔ di la. Wɔ ǹ Kanaan minin lɛa. Min mɛn bɛ́ wɔ diɛ̃ boɛɛn lɛa, bɛ tá wɔ di li piɛ pelo pelo. Goon ke, bɛ banban.»

¹⁴Zozɛfu nə́ n lɛn saa lon á pɛ: «Ma màn mɛn lɛ pɛ, a din ni. Ka ka n duru, ka daa ga gána lɛ ganaa.

¹⁵Ma bɛ́ re sii mɛn diɛ ka mìi ni, bɛ ǹ ka kɛ nɛ: A kii kɛ yii toa koo, ka a re soe ka n bɔ kànaa, bɛ̀ ka diɛ̃ boɛɛn kɛ ná a daa wa.

¹⁶Ka kaa min goon dia, bɛ wo ka diɛ̃ lɛ kũ, a da nɛ. Gialakunun kɛn nə giã kòso-n kànaa. Bɛ̀ kaa boo lɛ n taãn lɛa, ma á re giɛ a ganaa. Bɛ̀ taãn dɔ bie wa, a kii yii toa koo, ka n ka n duru, ka daa ga gána lɛ ganaa sonbore!»

¹⁷Zozɛfu nə́ ǹ tumaa kaa kòso-n yǎa lɛawaa sɔɔ.

¹⁸A lɛawaa sɔɔbaa ǹ wɔ pinaa, Zozɛfu tɔ́n pɛ ǹ nɛ: «Ka bɛ́ re sii mɛn zɛnɛɛ ka tɔn la, bɛ ǹ ka kɛ nɛ. Ma á nyɛ́ɛ biɛ Lawa nɛ.

¹⁹Bɛ̀ ka tá li, min waa kaa min taãnbaa la, ka bɛ́ kòso kion mɛn nɛ, ka goon giã walan. Ka gialakunun kɛn nə wo belee lɛ kɔ bòonaan lɛn la piɛ.

²⁰Bɛ̀ ka á die, ka ka diɛ̃ boɛɛn lɛ kũ ka da nɛ. Ma á die kaa boo lɛ a taãnbaa doɛ̃ ka bɛ nɛ, ka a re gɛ̀ we wa.» Ǹ nə́ lɛ kɔ, ǹ nə́ zɛnaa miɛ̃.

²¹Sɛnɛ, maǹ nə́ goã pii kɔn nɛ: «Ebe! Wɔ́ sii la wɔ diɛ̃ kɛ la lɛlɛ dɛ. A bɛ́ a foo-ziziɛ̃ lɛ gɔ́ɔ̃ nɛ ǹ mɛn waáraa, wɔ́ yɛ. Sɛnɛ, á wɔ nyankɔ á fɔ̃ li, wɔ n too kɔ a lon wa. Bɛ lɛ na á toa, bɛ miã foo-ziziɛ̃ kɛ tá wɔ dɔn yii pelo.»

²² Urubɛn tɔ́n pɛ ǹ nɛ: «Táa má pɛ ka-n lɛlɛ lɛn máa ka baran sii la nɛ lɛ la wa! Ka bɛ́ ka n too kɔ ma lon wa, Lawa n bɛ lɛ a gɛ̀ dòo boe wɔ ganaa pelo.»

²³Ǹ goã doɛ̃ mà Zozɛfu tá ǹsɛn boo lɛ miɛ wa, a giala, min kɔsɔ na á goã Zozɛfu a boo lɛ bɔyɛɛ, á pii ǹ ni.

²⁴Zozɛfu nə́ n zɔ̃ á n bɔ ǹ ganaa, á wuu pɛ. Bɛ kio, á n bɔyaa á daa ǹ li, á boo da ǹ nɛ. Á Simiɔn kũ ǹ bii, á yii ǹ dinin yii ni.

²⁵Bɛ kio, á tɔ́n pɛ, mà ǹ belee kaa ǹ mànan nɛ ǹ pã, ǹ wusoo ǹ didie a wɔrɔ da a boroo gɔ́ɔ̃ nɛ, ǹ màn-bii kɔ ǹ la, ǹ die ǹ bii zii gialaa. A na á zɛnaa ǹ nɛ miɛ̃.

²⁶Ǹ dɔɔ̃nɔn lɛn nə́ ǹ belee boroon lɛn kaa ǹ dundunun la, ǹ nə́ woo.

²⁷Wɔlɔ bɛ́ á tii ǹ ganaa bǎã mɛn nɛ, ǹ nə́ golee. Ǹ min goon ná a boroo lɛ bũ, mà a n die màn-bii koe a dundun la, a ná a wɔrɔ yɛ a nɛ. A ná a lɛ bũ kɛnɛn, bɛ̀ wɔrɔ lɛ bɛ́ tán a nɛ!

²⁸Á tɔ́n pɛ ǹ dɔɔ̃nɔn nɛ: «Ǹ nə́ wusoo ǹ nə́ maa wɔrɔ we kɔ ma la le! Á ke maa belee boroo ne!» Ǹ foo biɛ na, nyɛ́ɛ nə́ ǹ kũ parsiini, ǹ nə́ tɔ́n pɛ kɔn nɛ: «Kɛ n wàa sii lɛa Lawa zɛnaa wɔ nɛ!»

²⁹Ǹ bɛ́ ǹ nə́ dɔ ǹ di Zakɔba li Kanaan gána nɛ, sii mɛn tumaa nə n zɛnaa ǹ nɛ, ǹ ná a tumaa pɛ nɛ.

³⁰Ǹ nə́ pɛ nɛ: — Giĩ mɛn bɛ́ gána lɛ mìi la, á kakaarɛ kɔ wɔsɛn ganaa. A na a yiri ni, ka wɔsɛn man wɔ daa ga gána lɛ ganaa ka gɔ́ɔ̃ nɛ.

³¹Wɔ́ á lɛ si kɛnɛn: «Min taãnan man ka wɔsɛn nɛ, wɔ bie wɔ daa ga gána ganaa ka gɔ́ɔ̃-n wa.»

³²Wɔ́ pɛ nɛ: «Giĩ goon a nɛnyaanan man ka wɔsɛn nɛ, wɔ n wɔ́ goã nɛgiĩ fulupaa. Wɔa min goon na a banban, wɔ diɛ̃ boɛɛn kɛ tá wɔa díi li Kanaan gána-n pelo pelo.»

³³Giĩ lɛ pɛ wɔ nɛ: «Bɛ̀ ka tá li ma waa kaa min taãnbaa la, ka ka dɔɔ̃n lɛ goon toa ma li. Màn mɛn bɛ́ re kaa kion minin boe, ka gialakunun lɛn nə bɛ goa, ka wo kɔ bòonaan lɛn la piɛ.

³⁴Ka da ka ka diɛ̃ boɛɛn lɛ dɔ nɛ. Ma á re doɛ̃ ka bɛ nɛ, máa ka bie ka daa ga gána lɛ ganaa ka gɔ́ɔ̃-n wa, máa min taãnan man ka nɛ. Ma á re wusii, ma ka dɔɔ̃n kɛ lɛ kɔ ka la, ka á re boe la, ka n foo sii zɛnaa gána lɛ nɛ.»

³⁵Bɛ kio, ǹ nə́ ǹ boroon binyəə. Ǹ nə́ wɔrɔ boroonən yɛ boroo lɛ tumaa gɔ́ɔ̃ nɛ, didie a wɔrɔ ná a wɔ nɛ. Ǹ bɛ́ ǹ nə́ wɔrɔ boroonən lɛn yɛ ǹ mɛn waáraa, ka ǹ wɔrɔ ná a nɛ, nyɛ́ɛ nə́ ǹ laanka ǹ díi lɛ kũ.

³⁶Zakɔba tɔ́n pɛ ǹ nɛ: «Táa ka n giɛ li, ka masɛ gɔn kooro toa! Zozɛfu bie a tan doo wa, Simiɔn banban, ka ǹ giɛ li, ka Bɛnzamɛn dɔ si ma la! Sii tumaa n masɛ mìi-n dɛ!»

³⁷Urubɛn tɔ́n pɛ ǹ díi lɛ nɛ: «Bɛ̀ man bɔyaa ka Bɛnzamɛn nɛ, má daa kɔ n la wa, n maa nɛgiĩ min paa kɛ dɛ a dòo. N sii bɔ a nɛ, ma á die n bɔyɛɛ nɛ, ma da kɔ n la.»

³⁸Zakɔba nə́ ǹ lɛ si: «Maa nɛ a woe kun ka n walan wa. Ǹ dannɛ gã, a dinsɔɔ̃ na a tan. Bɛ̀ sii mɛn wɔ lɛ zii la, maa zizimaa n die giɛ̃ ka foo-busii ni, ka dinin zɛnaa ǹ sii taman yii.»