Read Samo, Southern SGK 45 Bible Online

SGK 45 - Samo, Southern bible

SGK 45

¹ Zozɛfu bɛ́ á n din kũ á fɔ̃, a dí-nyalin mɛnɛn tumaa bɛ́ a li, á pɛ ǹ nɛ mà ǹ soo kanaa. A minin lɛn kɔ́n bɛ́ a banban, á tɔn nə n din pɛ ǹ dɔɔ̃nɔn lɛn nɛ.

²Á n lɛn saa lon á wuu pɛ, yǎa Ezipti minin ná a lɛ ma, *Faarahɔn a kion minin dinin ná a boo ma.

³Bɛ kio, á tɔ́n pɛ ǹ dɔɔ̃nɔn lɛn nɛ kɛnɛn: «Ma din Zozɛfu ni. Ma di lɛ yii á tɔn koo?» Sɛnɛ, ǹ dɔɔ̃nɔn lɛn nə boo la, ǹ ná a lɛ si gɔ̀nɔn bìn diɛ gɔn wa.

⁴Zozɛfu tɔ́n pɛ ǹ nɛ: «Ka n zɔ̃ ka dɔ ma li.» Ǹ nə́ n zɔ̃ ǹ nə́ dɔ a li. Zozɛfu tɔ́n pɛ ǹ nɛ kɛnɛn: — Ka ka diɛ̃ Zozɛfu mɛn sã minin la, ǹ nə́ woo-n Ezipti gána nɛ, ma din lɛ-n ke.

⁵Sɛnɛ, sisia, ka baran n yɔrɔ kɔsɛ, ka foo busu ka dinin li, ka maa sã sii kɛ laanka maa tá kànaa kɛ-n wa. A giala, Lawa na á ma dia ka nyɛɛn kànaa, màn mɛn bɛ́ toɛ, ka kirisibaa.

⁶Bòo lɛ lɛ̀ paa n ke gána lɛ gɔ́ɔ̃ nɛ. Lɛ̀ sooro gɔ́ɔ̃-n doo, min kɔ́n ba re tán kɔsɛ wa, min ba re màn kɔ́n kuri wuru-n wa.

⁷Lawa na á masɛ dia ka nyɛɛnɛ gána lɛ nɛ, mà ma da ga màn-bii li ma koa ka nɛ, màn mɛn bɛ́ toɛ ka la, ka tɔrɔ goã bòo kɛ kio, ka kanbaa ǹ sii ni.

⁸Kasɛn bie ká ma dia kànaa wa, Lawa nɛ. A din na á masɛ koa gole kii kio, á ma koa kii lɛ a kion minin tumaa mìi la, á ma koa Ezipti gána tumaa mìi la.

⁹ Sisia, ka n nanaa, ka wo piɛ ka wo pɛ maa díi ni mà a nɛgiĩ Zozɛfu mà kɛnɛn: «Lawa na á ma koa Ezipti minin tumaa a gánadɛnaa lɛa. N nanaa, n da ma li.

¹⁰Ń ta re giɛ̃ Gosɛnɛ gána nɛ, n wɔlɔ n kunu ma din ganaa, n din laanka n nɛnyaanan nɛ, n nɔ̀ɔnɔn nɛ, n sèren laanka n bòen ne, ka n diin ni, ka n gɔn màn tumaa nɛ.

¹¹Ma á die màn-bii koe n la kànaa, màn mɛn bɛ́ toɛ n la, n din laanka n kion minin ni, ka n tɔɔn tumaa nɛ. A giala, bòo lɛ á tɔn koe yǎa lɛ̀ sooro doo.»

¹²Zozɛfu pɛ kɛnɛn dɔn: «Ka dininmaan yii bɛ́ a ganaa, ma diɛ̃ Bɛnzamɛn dɔ din yii bɛ́ a ganaa, mà ma din Zozɛfu lɛ n boo diɛ ka nɛ.

¹³Gugurubaa mɛn tumaa bɛ́ ma la Ezipti gána nɛ, ka bɛ pɛ ma di ni. Ka sii mɛn tumaa yɛ, ka bɛ dɔ laakalaa nɛ. Ka n nanaa, ka maa díi kũ ka da-n kànaa.»

¹⁴Bɛ kio, Zozɛfu nə́ n sɔɔ ǹ diɛ̃ Bɛnzamɛn nɛ, ǹ dinin min paa nə n toa kɔn-a, ǹ nə́ wuu pɛ.

¹⁵Zozɛfu nə́ n sɔɔ ǹ dɔɔ̃n gialakunun lɛn dɔn nɛ, bɛ̀ á wuu pii. Bɛ kio, ǹ yii tɔ́n wɔ ǹ nə́ boo da nɛ.

¹⁶Minin nə́ ma Faarahɔn a kion, mà Zozɛfu ǹ dɔɔ̃nɔn nə́ daa Ezipti. Ǹ daa lɛ kɔɔ̃n kɔ Faarahɔn laanka a kialandɛnaa gialakunun ganaa parsiini.

¹⁷Á tɔ́n pɛ Zozɛfu ni: «A pɛ n dɔɔ̃nɔn lɛn nɛ, mà ǹ *belee boroon kaa ǹ tɔɔn lɛn la, ǹ wusoo ǹ wo Kanaan gána nɛ,

¹⁸ǹ nə ǹ di laanka ǹ minin tumaa goa, ǹ nə́ n bɔyaa ǹ da ma li kànaa. Ma á re gána lɛ a bǎã sonbore koe ǹ la, màn mɛn bɛ́ toɛ, ǹ gána lɛ a kɔɔ̃nbaa yɛ.

¹⁹Zozɛfu, a pɛ ǹ dɔɔ̃nɔn lɛn nɛ, mà ǹ wotoron goa Ezipti gána-n kànaa, ǹ wo ǹ lɔn laanka ǹ nɛnyaanan goa nɛ, ǹ nə n díi lɛ dɔ saa, ǹ nə n bɔyaa ǹ daa.

²⁰Ǹ bɛ́ ǹ ba re boe la, ǹ nə ǹ mànan mɛnɛn goa wa, ǹ baran n taasɛ ka bɛn sii-n wa. A giala, ma á re gána lɛ a bǎã sonbore koe ǹ la.»

²¹Faarahɔn boo mɛn pɛ, Zakɔba a nɛnyaanan lɛn nə́ zɛnaa miɛ̃. A kɔnpɛ ka a da ǹ boo ne, Zozɛfu wotoron kɔ ǹ la, á màn-bii dɔ kɔ ǹ la, zii tɔ wɔ lɛ taman yii.

²²Á zɔ́n mɔnaa goon kɔ didie la, sɛnɛ, Bɛnzamɛn wɔ n sooro, ka ǹ dinin wɔrɔ we biɛsɔɔ (300) nɛ.

²³Á Ezipti gána lɛ a màn sonboren kaa dundun fù la, á ǹ dia ǹ di dɔ la. Á belee kaa màn nɛ, á kaa dundun dan fù la, á dia la. Á buuru laanka màn-bii tɔrɔn kɔsɔn dɔn dia la, zii tɔ wɔ lɛ taman yii.

²⁴Bɛ kio, á zii kɔ ǹ dɔɔ̃nɔn lɛn la. Sɛnɛ, á pɛ ǹ nɛ, bɛ̀ ǹ bɛ́ re woe, mà ǹ baran zia da zii la wa.

²⁵Ǹ nə́ soo Ezipti gána nɛ, ǹ nə́ woo ǹ nə́ dɔ ǹ di Zakɔba li Kanaan gána nɛ.

²⁶Ǹ nə́ pɛ-n kɛnɛn: «Zozɛfu yii á tɔn koo dɛ! A din nə Ezipti minin tumaa mìi la dinin.» Sɛnɛ, ǹ boo lɛ bìn da Zakɔba foo ganaa wa, a giala, a waa ǹ la wa.

²⁷Zozɛfu boon mɛnɛn pɛ ǹ nɛ, ǹ nə́ bɛn tumaa laakalaa ǹ di lɛ nɛ. Bɛ kio, Zozɛfu wotoron mɛnɛn dia, mà ǹ da saa nɛ, ǹ nə́ bɛn nyaa Zakɔba nɛ. A bɛ́ á bɛn yɛ, a nyín daa a din li.

²⁸Á tɔ́n pɛ: «Masɛ din bie nɔ̀n diɛ ka sii kɔsɔ-n wa. Zozɛfu yii á tɔn koo! Man giɛ li ma woo, ma yii yɛ, ma tɔn gã.»