Read Samo, Southern SGK 46 Bible Online

SGK 46 - Samo, Southern bible

SGK 46

¹Zakɔba ná a mànan tumaa goa, á yoo á zii kũ. A bɛ́ á dɔ Bɛɛr-Sebaa kiwi, á wúlu bɔ ǹ di Izaaki a Lawa-n walan.

²Lawa daa Zakɔba la ka narɛɛ-n tèlò-n, á pɛ nɛ: «Zakɔba! Zakɔba!» Zakɔba nə́ n nyəə mà asɛ á ke.

³Lawa tɔ́n pɛ nɛ: «Masɛ n Lawa lɛa, n di bɛ́ á goã Lawa mɛn guguru koe. Ezipti gána a woo baran nyɛ́ɛ da n ganaa wa, a giala, ma á re n tɔrɔn mɔnɛɛ walan.

⁴Ma á re woe kunun n ni Ezipti, ma din dɔ n die n boe Ezipti, ma soo n ne. Bɛ̀ ń gã, Zozɛfu n die n gere biĩ.»

⁵Zakɔba yoo á n bɔ Bɛɛr-Sebaa. Eziptin kii wotoron mɛnɛn dia, mà ǹ da ǹ goa nɛ, Zakɔba a nɛnyaanan nə́ Zakɔba saa, ǹ nə́ da bɛ kɔ́n nɛ, ǹ nə́ ǹ lɔn dɔn laanka ǹ nɛnyaanan kaa ǹ nɛ.

⁶ Ǹ nə́ ǹ tɔɔn loo, ǹ gɔn màn mɛn tumaa yɛ Kanaan gána nɛ, ǹ nə́ bɛ tumaa goa, ǹ nə́ woo Ezipti gána nɛ, kun ka a tɔrɔ tumaa nɛ.

⁷Á woo ka a minin tumaa-n Ezipti gána nɛ: A nɛgiĩn laanka a nɛlɔn nɛ, ka a nɔ̀ɔn giĩdɛnan laanka ǹ lɔdɛnan nɛ.

⁸Zakɔba tɔrɔn mɛnɛn nə da Ezipti gána nɛ, bɛn tɔn man ka kɛn nɛ: Zakɔba din laanka a nɛnyaanan nɛ, ka a nɔ̀ɔnɔn nɛ. Zakɔba a nɛ bibinaa nə ka Urubɛn nɛ.

⁹Urubɛn a nɛnyaanan tɔn nə́ ke: Anɔɔki, Paluu, Ɛsirɔn, Karmii.

¹⁰Bɛ kio, Simiɔn laanka a nɛnyaanan: Yemoeli, Yamin, Ohadi, Yakini, Sohara, Sawulu. A Kanaan lɔ mɛn saa, bɛa nɛ n ka Sawulu ni.

¹¹Levii laanka a nɛnyaanan: Gɛrsɔn, Keyati, Merarii.

¹²Zudaa laanka a nɛnyaanan: Ɛrɛ, Onan, Selaa, Perɛzi, Zeraa. Ɛrɛ laanka Onan lɛ sɛ gã Kanaan gána nɛ. Perɛzi a nɛnyaanan man ka Ɛsirɔn laanka Amulu ni.

¹³Isakaara laanka a nɛnyaanan: Tolaa, Puwa, Yɔɔbu, Simɔrɔn.

¹⁴Zabulɔn laanka a nɛnyaanan: Sorɛdi, Elɔn, Yaleeli.

¹⁵Zakɔba a lɔ Leyaa nɛnyaanan mɛnɛn yɛ Mezopotamii gána nɛ, bɛn lɛn tɔn man ka bɛn nɛ, a nɛlɔ Diinaa nə n ti ǹ ganaa. Ǹ tumaa a tɔkɔnlɛ ka ǹ yɛ ǹ nɛnyaanan nɛ, maǹ min pɔsɔɔ ka sɔɔ.

¹⁶Gaadi laanka a nɛnyaanan: Sifiɔn, Hagi, Sunu, Esibɔn, Erii, Arɔdii, Arelii.

¹⁷Asɛɛrɛ laanka a nɛnyaanan: Imnaa, Isiwaa, Isiwii, Beriyaa, ka Seraa nɛ. Bɛ nə ǹ miãnɛn lɛa. Beriyaa a nɛnyaanan man ka Hebɛɛrɛ laanka Malkili ni.

¹⁸Zakɔba tɔrɔn man ka bɛn nɛ, á ǹ yɛ Zilpaa ganaa, Laban bɛ̀rɛlɔ mɛn kɔ a nɛlɔ Leyaa la. Ǹ kaa kun nə min fulusɔrɔ.

¹⁹Zakɔba a lɔ Raseli na á nɛgiĩ paa yɛ: Zozɛfu laanka Bɛnzamɛn nɛ.

²⁰ Zozɛfu nɛgiĩ paa yɛ a lɔ Azenati la Ezipti gána nɛ: Manaasee laanka Efrayimu ni. Onə kiwi a wúlu-bɔle Potifeeraa a nɛ n ka a lɔ lɛ nɛ.

²¹Bɛnzamɛn laanka a nɛnyaanan: Belaa, Bekɛri, Asibeli, Geraa, Naaman, Ehii, Rɔsi, Mupimu, Hupimu, Arde.

²²Zakɔba tɔrɔn man ka bɛn nɛ, min fulusii, á ǹ yɛ Raseli la.

²³Dan a nɛ n ka Husimu ni.

²⁴Nɛfutalii laanka a nɛnyaanan: Yaseeli, Gunii, Yesɛɛrɛ, Silɛmu.

²⁵Zakɔba tɔrɔn man ka bɛn nɛ, á ǹ yɛ Biilaa la, Laban bɛ̀rɛlɔ mɛn kɔ a nɛlɔ Raseli la. Ǹ kaa kun nə min sɔbaa.

²⁶Zakɔba din a kion minin mɛnɛn nə da Ezipti gána nɛ, ǹ manaan nə́ ǹ ba a-n wa, ǹ kaa kun nə min pɔsɔrɔwensɔrɔ.

²⁷ Zozɛfu na á nɛgiĩ paa yɛ Ezipti gána nɛ. Zakɔba a kion minin mɛnɛn nə da Ezipti, ǹ tumaa a kaa kun nə min pɔsɔbaa.

²⁸Zakɔba Zudaa dia a nyɛɛnɛ, mà a wo pɛ Zozɛfu ni, mà a da n da asɛ lɛ Gosɛnɛ gána nɛ. Ǹ bɛ́ ǹ nə́ dɔ Gosɛnɛ,

²⁹Zozɛfu ná a wotoro yii, á woo n da ǹ di Zakɔba lɛ walan. Zozɛfu bɛ́ á yɛ lɔn gɔrɔ, á n sɔɔ a nɛ, á wuu pɛ, á pɛ, bɛ̀ a gɔn ná a ganaa miɛ̃.

³⁰Zakɔba tɔ́n pɛ-n kɛnɛn: «Ma yii bɛ́ á wusoo á n yɛ, n yii n tɔn koo, ta ma n giɛ̃ sisia kəni, bɛa kaka ma ganaa wa.»

³¹Zozɛfu tɔ́n pɛ ǹ dɔɔ̃nɔn lɛn laanka ǹ di a kion minin ni: — Man die woe *Faarahɔn li ma pɛ-n kɛnɛn: «Ma dɔɔ̃nɔn laanka ma di a kion minin mɛnɛn nə goã Kanaan gána nɛ, ǹ nə́ daa ma li.»

³²Man die pii-n doo: «Maǹ tɔɔ-lɛduə̃lin lɛa, maǹ tɔɔn toe, maǹ nə́ daa ka ǹ tɔɔ bisinin laanka ǹ tɔɔ dadaran nɛ, ka ǹ gɔn màn tumaa nɛ.»

³³Bɛ̀ Faarahɔn n ka bíi, á nɔ̀n da ka la ka kaa nya ǹ dí ni,

³⁴ka pɛ nɛ kɛnɛn: «Wɔ n tɔɔ-lɛduə̃lin lɛa haalɛ wɔa nɛgininbaa waáraa a da sisia yaa, ka wɔ digolon nə goã a lɛa lɔn.» Bɛ̀ ka pɛ miɛ̃, á re Gosɛnɛ gána kɛ koe ka la ka giã a nɛ, a giala, Ezipti minin ba lɛ koe tɔɔ-lɛduə̃li ganaa wa.