Read Samo, Southern SGK 6 Bible Online

SGK 6 - Samo, Southern bible

SGK 6

¹ Minbuiinin bɛ́ ǹ ná a giala kɔ, ǹ nə́ mɔnɛɛ tán la ǹ mɛn waáraa, ǹ nə́ nɛlɔn yɛ.

²Lawa a nɛnyaanan nə́ yɛ, mà ǹ nɛlɔn lɛn tá siĩni. Ǹ nə ǹ mɛnɛn bɔ, ǹ nə́ bɛn goa lɔn lɛa.

³Dɛnaa tɔ́n pɛ kɛnɛn: «Ma fɔfoã mɛn kɔ minbuiin nɛ la, ma a re lɛ koe, bɛ goã a nɛ yǎa duduu wa. A bɛ́ gɔ̀nɔn siĩ gɛ̀-wɔle lɛa, a die kiɛ̃ lɛ̀ paabiɛ ka fuə (120) la kanaa doo wa.»

⁴ Bɛa waáraa, haalɛ bɛ dɔ din kio, min sasa gegeren nə́ goã kanaa lɛ nɛ. Lawa a nɛnyaanan nə minbuiinin nɛlɔn mɛnɛn bɔ, ǹ nə́ nɛnyaanan yɛ ǹ la, bɛn lɛn tɔrɔn manɛ. Ǹ dinin lɛn man nə́ goã min gegere pàãdɛnan lɛa lɛlɛ, ǹ tɔ bɔ parsiini.

⁵ Dɛnaa yɛ mà màn nə tɔ́n miɛ̃ minbuiinin baraabaa li tán. Biikoo tumaa li, sii baraa zɛnaa dinsɔɔ̃ a taasiɛ nə ǹ foo ne.

⁶Bɛ lɛ nɛ, Dɛnaa wusoo á n gɔ́ɔ̃ bii, ka wàa na á baa asɛ minbuiin nɛ zɛnaa, á da tán. A foo ziziɛ̃ bɛ gɔ́ɔ̃ nɛ,

⁷á tɔ́n pɛ kɛnɛn: «Ma minbuiin nɛ mɛn zɛnaa, man die papaɛ̃ ma bɔ tán la, a saa minbuiinin ganaa, a wo màn yiikoonaa tumaa yaa, a dadaran nɛ ka a bisinin ni, ka bàanan nɛ. A giala, man má n gɔ́ɔ̃ bii ka wàa na á baa má zɛnaa.»

⁸Sɛnɛ, Nowee sii kɔɔ̃n kɔ Lawa ganaa.

⁹ Nowee boo á ke: Nowee na á goã min pepere lɛa. A goã kanaa kun ka min mɛnɛn nɛ, a dinsɔɔ̃ a sii lɛ na á goã piɛ̃-n bɛn bii, Lawa wɔ paǹ li. Á goã koe Lawa a zii lɛ.

¹⁰Nowee nɛgiĩ sɔɔ yɛ: Sɛmu ni, ka Kaamu laanka Zafɛti ni.

¹¹Sɛnɛ Lawa yɔrɔ-a, kanaa minbuiinin gialakunun kɛn tumaa ziziɛ̃, kanaa gɔ́ɔ̃ pã ka kakaarɛbaa ǹ siin ni.

¹²Dɛnaa ga kanaa ganaa, á yɛ mà á ziziɛ̃, a giala, minbuiinin tumaa a tɔ wɔ ǹ gɔn baraa kɔ.

¹³Lawa tɔ́n pɛ Nowee-n kɛnɛn: «Masɛ a lɛa, minbuiinin tumaa a nyin nya biikoo dɔ kəni! Ǹ dinin lɛn man nə́ toa kanaa pã ka kakaarɛbaa ǹ siin ni. Bɛ lɛ nɛ, man die a laanka a gɔ́ɔ̃gɔ́ɔ̃ ǹ mànan yii bɔ̀n biɛ kun.

¹⁴Nowee, nsɛ mu la ǹ goo zɛnaa n din wɔ lɛa ka gɔn sonbore ne, n na a gɔ́ɔ̃ kukuru kɔn kionən lɛa. N na a gɔ́ɔ̃ laanka a kanaa lɔ ka tii góndɛnaa nɛ.

¹⁵A zɛnaa, a sasabaa dɔ guru yii biɛsɔɔ (300), a gɔ́ɔ̃ goã guru yii posooro, a là a wo lon gùrù yii pɔsɔɔ.

¹⁶Lɛpii zɛnaa n kɔ lɛ. Gùrù yii goon koa goo lɛ laanka a lɛpii lɛ bii lon. Kiɛnlɛ bɔ a paǹ li, n goo lɛ gɔ́ɔ̃ baa sɔɔ kɔn lalan: goon goã tán, goon nə́ bii, goon nə́ ǹ lalan.

¹⁷Man die die ka bɔ̀n da ǹ mu gole-n tán, ma màn yiikoonaa tumaa bɔ̀n baa nɛ. Màn woo màn tán la, ǹ tumaa á re giɛ̃.

¹⁸Sɛnɛ, man die lɛ kɔ kɔn la we n ni. Wɔ goo lɛ nɛ, n din laanka n nɛnyaanan nɛ, ka n lɔ nɛ, ka n manaan nɛ.

¹⁹Màn yiikoonaa tɔrɔ tumaa a papaa kũ, a sà laanka ǹ dan nɛ, n kaa kun ni goo lɛ nɛ, màn mɛn bɛ́ toɛ, bɛn nə la kunun n ni.

²⁰Màn tɔrɔ tumaa á re die n li, màn mɛn bɛ́ toɛ, ǹ la: bàanan tá re die, màn yiikoonaa tɔrɔ tumaa nɛ, a dadaran nɛ ka a bɔnboɛɛnɛn nɛ.

²¹Ga màn-bii tɔrɔ tumaa li, n koa n gɔn li. Bɛ á die n laanka màn yiikoonaa gialakunun lɛn màn-bii biɛ.»

²² Nowee na á bɛ lɛ zɛnaa. A ná a tumaa zɛnaa ka Lawa bɛ́ á pɛ-n lɔn.