Read Samo, Southern SGK 7 Bible Online

SGK 7 - Samo, Southern bible

SGK 7

¹Dɛnaa tɔ́n pɛ Nowee ne kɛnɛn: «Wɔ goo lɛ nɛ, n din laanka n kion minin tumaa. A giala, n bɛ́ kanaa kun ka min mɛnɛn nɛ, n dinsɔɔ̃ n pepere, bɛa minin kɛn lɛn bii.

²Siĩ gòã siinaa tɔrɔ mɛn tumaa bɛ́ n soɛ̃, n bɛ tumaa a papaa sɔbaa kũ, a sà laanka ǹ dan nɛ. A tɔrɔ mɛn tumaa bɛ́ a ba n soɛ̃ wa, a sà goon laanka ǹ dan goon kũ bɛn bii.

³N bàan tɔrɔ tumaa a papaa sɔbaa kũ, sà laanka ǹ dan. N bɛn tumaa kaa kunun n ni goo lɛ nɛ, màn mɛn bɛ́ toɛ, n nə ǹ tɔrɔ koa tán la bǎã tumaa nɛ.

⁴A giala, kànaa ka lɛawaa sɔbaa, ma á re la kiɛ, yǎa lɛawaa pusi ka tèlò pusi ni. Ma màn yiikoonaa mɛn tumaa zɛnaa má da tán, ma á re bɛn tumaa papaɛ̃, ma bɔ kanaa.»

⁵Dɛnaa dí mɛn tumaa pɛ Nowee ne, Nowee ná a tumaa nya ka a pɛ-n lɔn.

⁶Bɔ̀n da ǹ mu gole lɛ bɛ́ die kanaa ǹ mɛn waáraa, bɛ̀ Nowee lɛ̀ biɛsɔrɔ (600) nɛ.

⁷Nowee laanka a nɛnyaanan nə́ kaa goo lɛ nɛ, ka a lɔ nɛ, ka ǹ manaan nɛ.

⁸Tɔɔ gòã siinaan mɛnɛn bɛ́ n soɛ̃, ǹ mɛnɛn bɛ́ ǹ ba n soɛ̃ wa, bàanan laanka màn yiikoonaa bɔnboɛɛnɛn tumaa nɛ,

⁹ǹ tumaa a papaa daa Nowee li, a sà laanka ǹ dan nɛ, ǹ nə́ wɔ goo lɛ nɛ, ka Lawa bɛ́ á pɛ Nowee-n lɔn.

¹⁰Lɛawaa sɔbaa bɛ kio, bɔ̀n da ǹ mu gole lɛ tán mui.

¹¹ Nowee a yɛ lɛ̀ biɛsɔrɔ, mui paabaa ǹ wɔ a lɛawaa fulusɔbaabaa ǹ wɔ pinaa, tán giulun mu gole nə́ n da wɔlɔ la, lon a mu dɔǹɔn nə́ n bũ dadara bɛ lɛ a pinaa.

¹²La nə́ n tɔ tán, yǎa lɛawaa pusi ka tèlò pusi.

¹³A din pinaa nɛ, Nowee laanka a lɔ wɔ goo lɛ nɛ, ka a nɛ Sɛmu ni, Kaamu laanka Zafɛti ni, ka ǹ manaan nɛ.

¹⁴Don màn tɔrɔ tumaa dɔ́ wɔ kunun ǹ ni, ka tɔɔ màn tɔrɔ tumaa nɛ, a dadaran laanka a bɔnboɛɛnɛn nɛ, ka bàan tɔrɔ tumaa nɛ, màn nyàa kadɛnaa tumaa.

¹⁵Màn yiikoonaa tɔrɔ tumaa daa Nowee li goo lɛ nɛ.

¹⁶A tɔrɔ tumaa, a sà laanka ǹ dan na á goã we, ka Lawa bɛ́ á goã á pɛ Nowee-n lɔn. Bɛ kio, Lawa goo lɛ a kiɛnlɛ tã Nowee lɛ.

¹⁷Bɔ̀n da ǹ mu lɛ a la na á kaa yǎa lɛawaa pusi. Mu lɛ gole kɔ á goo lɛ saa lon.

¹⁸Mu lɛ dii lon, goo lɛ goã n lelen diɛ a lalan woe.

¹⁹Mu lɛ a dii lɛ gole kɔ tán á la yii ni. Kelen mɛnɛn dinin bɛ́ sasa parsiini, mu lɛ bɛn tumaa mui bǎã tumaa nɛ,

²⁰á dii ǹ lalan ka guru yii fulusooro ne. Mu lɛ dii miɛ̃ á kelen papaã.

²¹Bɛ na á toa màn yiikoonaa mɛn tumaa bɛ́ tɔ we tán, ǹ tumaa gã: bàanan nɛ, tɔɔ mànan laanka don mànan nɛ, a dadaran laanka a bɔnboɛɛnɛn nɛ, ka minbuiinin dɔn nɛ.

²²Màn woo màn tá tán la á n fɔfoã sii, bɛn tumaa gã.

²³Dɛnaa na á zɛnaa miɛ̃, á màn yiikoonaa tumaa papaã á bɔ tán la: minbuiinin ni, màn yiikoonaan nɛ, a dadaran nɛ ka a bɔnboɛɛnɛn nɛ, ka bàanan dinin ni. Lawa nə́ ǹ tumaa papaã, á ǹ bɔ tán la. Nowee dinsɔɔ̃ na á la, kun ka a minin ni, ka màn mɛn tumaa bɛ́ goo lɛ-n kunun ǹ ni.

²⁴Mu lɛ na á goã dii-n lon miɛ̃, á lɛawaa paabiɛ ka posooro (150) dɔ tán.