Read Samo, Southern SGK 9 Bible Online

SGK 9 - Samo, Southern bible

SGK 9

¹ Lawa barka wɔ Nowee laanka a nɛnyaanan nɛ, á pɛ ǹ nɛ kɛnɛn: «Ka nɛnyaanan yɛ, ka mɔnaa, ka tán pã.

²Tán màn yiikoonaa tumaa laanka bàanan tumaa á re nyɛ́ɛbiɛ ka nɛ parsiini, ka zɔ̀nɔn nɛ. Bɛn tumaa tá ka gɔn.

³Màn yiikoonaa mɛn tumaa bɛ́ fɔfoã sii, bɛ tumaa á re kaa màn-bii biɛ. Masɛ bɛ́ má luu buruu kɔ ka la lɛlɛ lɔn, man kɛ tumaa dɔ koe ka la miɛ̃.

⁴ Sɛnɛ, ka baran siĩ sɔ̃, ka a mà ná a-n wa. A giala, yiikoonaabaa lɛ n mà nɛ.

⁵Bɛ̀ tɔɔ min dɛ, ma á re dɔlɔ boe a ganaa. Bɛ̀ min nə́ ǹ miã dɛ, ma á re dɔlɔ boe bɛa dɛnaa ganaa.

⁶ Bɛ̀ min min nyin bɔ, min kɔsɔ á die bɛa dɛnaa dɔ nyin boe. A giala, Lawa na á minbuiin nɛ zɛnaa a din a kɔnboe lɛa.

⁷ Kasɛn nə nɛ gigiã yɛ, ka mɔnaa tán la.»

⁸Lawa tɔ́n pɛ Nowee laanka a nɛnyaanan man kɛnɛn:

⁹«Ma dinmaa n die lɛ kɔ kɔn la we kɔn ka nɛ, ma doa kɔn ka ka tɔrɔn dɔn nɛ ka kio,

¹⁰ka màn yiikoonaa tumaa dɔ nɛ: bàanan nɛ, piɛ mànan nɛ, don mànan nɛ, mànan mɛnɛn dinin tumaa bɛ́, ǹ nə́ soo goo lɛ-n kun ka nɛ.

¹¹Ma bɛ́ lɛ kɔ kɔn la mɛn we ka ka nɛ, bɛ á ke: Màn yiikoonaa kɔ́n ba re bɔ̀n biɛ ka bɔ̀n da ǹ mu gole-n doo wa, bɔ̀n da ǹ mu gole a re yii doo a kanaa ziziɛ̃ wa.

¹²Maa lɛ kɔ kɔn la lɛ a sii nyaa ǹ sii n ka kɛ nɛ, ma á re koɛ ma din laanka ka bii ni, ka màn yiikoonaa tumaa nɛ. A n biikoo tumaa a minbuiinin wɔ lɛa.

¹³Man má lamɛn da labara gɔ̀nɔn ganaa, má a n baa lɛ kɔ kɔn la ǹ sii nyaa ǹ sii lɛa, masɛ laanka kanaa bii ni.

¹⁴Bɛ̀ ma labara sɔkɔn lon lɔn, ka lamɛn lɛ yɛ, ma lɛ kɔ kɔn la mɛn wɔ kɔn ka nɛ, ka laanka màn yiikoonaa tumaa nɛ,

¹⁵ma á re n yiri koɛ bɛ nɛ. Mu ba re yii miɛ̃ doo, a gole kɔ, a màn yiikoonaa kɔ́n bɔ̀n baa wa, haalɛ tà a mànan dan din nə lɔn.

¹⁶Lamɛn lɛ bɛ́ re boe lon, bɛ̀ masɛ Lawa ga a ganaa, ma lɛ kɔ kɔn la mɛn wɔ ka màn yiikoonaa tumaa nɛ duduu wɔ lɛa, lɛ bɔ ná a ba a-n wa, ma á re n yiri koɛ bɛ nɛ.»

¹⁷Lawa tɔ́n pɛ Nowee ne: «Màn yiikoonaa mɛn tumaa bɛ́ tán la, masɛ lɛ kɔ kɔn la mɛn doa kɔn-a ǹ nɛ, lamɛn lɛ n bɛa sii nyaa ǹ sii lɛa.»

¹⁸Nowee a nɛgiĩn mɛnɛn nə soo goo lɛ nɛ, Sɛmu laanka Kaamu ni ka Zafɛti ni. Kaamu n Kanaan a díi lɛa.

¹⁹Nowee a nɛgiĩ sɔɔ lɛ n ka bɛn nɛ. Minbuiinin wusoo a mɔnaa tán la giala na á n kɔ ǹsɛn lɛn ganaa.

²⁰Nowee na á n baa tán-kɔsɔli bibinaa lɛa, á *rezɛ̃ da wuru bɔ.

²¹Á da nɛ lɛ a mu baa yɔ lɛa, á mi yǎa á wɔ a yii ni, á n tontoro da tán a kion gɔ́ɔ̃ nɛ.

²²Kanaan di Kaamu nə́ ǹ di lɛ tontoro yɛ, á woo pɛ ǹ dɔɔ̃n min paa lɛ-n kanaa.

²³Sɛmu laanka Zafɛti dɔnkɛ gole saa, didie kũ a lɛ koro ganaa a nyàa kóo la, ǹ nə́ tɔ wɔ ka ǹ kio ne, ǹ nə́ woo ǹ di lɛ a sìi duru. Ǹ bɛ́ ǹ nə́ n dɔ̀ɔ̃ wɔ ǹ di lɛ nɛ, ǹ nə́ n yɔrɔ dia bǎã kɔsɔ nɛ, ǹ na a sìi yɛ wa.

²⁴Nowee a yɔ lɛ bɛ́ á toɛ̃, á n bɔ a yii ganaa ǹ mɛn waáraa, a nɛgiĩ boɛɛn lɛ sii mɛn zɛnaa, á bɔ a siére-a.

²⁵Á tɔ́n pɛ: «Koe die a bɔ Kanaan ganaa. A die a n baa ǹ dɔɔ̃nɔn lɛn bɛ̀rɛn bɛ̀rɛ lɛa!»

²⁶Bɛ kio á pɛ: «Gugurubaa nə n kɔ Dɛnaa, Sɛmu a Lawa la. Kanaan die a n baa Sɛmu a bɛ̀rɛ lɛa!

²⁷Lawa die a n gɔn pã a da Zafɛti lon. Lawa die a giã Sɛmu a zàã nɛ. Kanaan die a n baa a bɛ̀rɛ lɛa.»

²⁸Nowee na á lɛ̀ biɛsɔɔ ka posooro (350) zɛnaa kanaa, bɔ̀n da ǹ mu gole lɛ a kiɛ̃ kio.

²⁹A na á lɛ̀ biɛmanangɔrɔ ka posooro (950) zɛnaa kanaa, á tɔ́n gã.