Read Samo, Southern Sam2 10 Bible Online

Sam2 10 - Samo, Southern bible

Sam2 10

¹Bɛa sii lɛ kio, Amɔn tɔrɔn kɛn kii gã. A nɛgiĩ Anuuni giã a bǎã nɛ kii lɛa.

²Davida tɔ́n pɛ: «Masɛ n die bǐɛ̃ zɛnɛɛ Nakasi a nɛgiĩ Anuuni ni taãn-taãnɛ ka ǹ di Nakasi bɛ́ á goã zɛnɛɛ ma-n lɔn.» Davida tɔ́n na a dí-nyalin dia, mà ǹ wo ǹ di lɛ a gɛ̀ fòo da. Davida a dí-nyalin lɛn nə́ woo ǹ nə́ dɔ Amɔn tɔrɔn gána nɛ.

³Sɛnɛ, Amɔn tɔrɔn lɛn goledɛnan nə́ pɛ ǹ dɛnaagiĩ Anuuni ni: «Davida bɛ́ á minin dia ke mà ǹ da gú wɔ n la, ma n taasɛ mà Davida n giɛ li a n di lɛ guguru kɔ? A bɛ́ a ná a dí-nyalin kɛn dia ke, a bie giɛ li ǹ nə n bibiə̃ ǹ ga gána lɛ ganaa ka durii ni, màn mɛn bɛ́ toɛ, a da yu ǹ kɔn pinaa wa le?»

⁴Anuuni Davida a dí-nyalin lɛn kũ, á ǹ lɛtoro ka talɛɛ kɔɔ̃, á ǹ dɔnkɛn kuru a bii ganaa, á ǹ giala piri da bii-a, á ǹ kaa mà ǹ woo.

⁵Minin ná a boo da Davida nɛ. Davida tɔ́n minin dia ǹ nə́ woo n da ǹ lɛ. A giala, sìi na á goã ǹ ganaa taãn-taãnɛ. Kii lɛ mà ǹ pɛ ǹ nɛ mà ǹ giã Zerikoo bɔrɔ, yǎa ǹ lɛtoro ka lɛ wusii a piɛ̃. Bɛ kio, ǹ tɔn daa.

⁶Amɔn tɔrɔn lɛn nə́ yɛ, mà ǹsɛn nə́ n dinin tìĩ bɔ Davida nyin ni. Bɛ lɛ nɛ, ǹ nə́ wɔrɔ bɔ, ǹ nə́ minin dia woe Siirii minin kɛn zia-baalin goɛ Bɛti-Rehɔbu laanka Soobaa kiwi. Maǹ nə́ Siirii minin lɛn min duu fuə (20 000) goa, ǹ mɛnɛn bɛ́ tɔ we ka ǹ gòã nɛ bɛ̀ ǹ wo zia baa. Ǹ nə́ Min duu goon (1 000) goa Maakaan kii kɛa bǎã nɛ, ǹ nə́ min duu fulupaa (12 000) goa Tɔbu kiwi.

⁷Davida bɛ́ á bɛ ma, á Zoabu dia woe ǹ gialaa, kun ka zia-baalin ni, ǹ mɛnɛn tumaa bɛ́, zia-baa lɛ nə́ ǹ dí baa.

⁸Amɔn tɔrɔn lɛn nə́ soo ǹ nə́ golee kiwi lɛ a kiɛnlɛ-a. Ǹ nə́ n yɔrɔ bɔ zia-baa taman yii. Siirii minin mɛnɛn bɛ́ boe Soobaa laanka Rehɔbu kiwi, Tɔbu minin kɛn laanka Maakaa minin ni, bɛn man nə́ goã ǹ gɔrɔn don.

⁹Zoabu yɛ, mà zia lɛ na asɛ nyɛɛn ganaa, a na asɛ kio dɔ ganaa. Izirayeli minin lɛn mɛnɛn tumaa tɔ bɛ́ á bɔ zia la, á minin bɔ bɛn bii, á ǹ dia woe Siirii minin lɛn gialaa.

¹⁰Á zia-baali gialakunun kɛn sii toa ǹ dɔɔ̃ngiĩ Abisayii gɔn, á bɛn dia woe Amɔn tɔrɔn lɛn gialaa.

¹¹Á tɔ́n pɛ ǹ dɔɔ̃ngiĩ lɛ nɛ: «Bɛ̀ Siirii minin lɛn pàã la ma nɛ, n die n da n dɔ ma lɛ. Bɛ̀ Amɔn tɔrɔn lɛn pàã la n dɔ nɛ, ma dɔ á die n doe n lɛ.

¹²N gù we yii. Daa wɔ n gù we yii wɔ tɔrɔ minin lɛn laanka wɔa Lawa a kiwin kɛn lɛa. Sii mɛn bɛ́ siĩn Dɛnaa Lawa yii li, Dɛnaa Lawa din bɛ zɛnaa.»

¹³Zoabu laanka a zia-baalin nə́ n zɔ̃ ǹ nə́ dɔ, mà maǹ zia biɛ Siirii minin lɛn ganaa. Sɛnɛ, bɛn nə́ baa si ǹ nyɛɛnɛ.

¹⁴Amɔn tɔrɔn lɛn bɛ́ ǹ nə́ Siirii minin lɛn yɛ baa sii, ǹ dɔn nə́ baa si Abisayii nyɛɛnɛ, ǹ nə́ woo kaa kiwi gɔ́ɔ̃ nɛ. Zoabu wusoo á n bɔ Amɔn tɔrɔn lɛn kio á daa Zeruzalɛmu.

¹⁵Siirii minin lɛn bɛ́ ǹ nə́ yɛ mà Izirayeli minin lɛn nə́ boo ǹsɛn la, ǹ tumaa nə́ n sɔkɔn bǎã goon ne.

¹⁶Siirii minin mɛnɛn bɛ́ Efrati tà kɛ kio, Adadezɛɛrɛ minin dia woe bɛn dɔn bii. Bɛn nə́ woo ǹ nə́ dɔ Elamu kiwi. Sobaki mɛn bɛ́ Adadezɛɛrɛ a zia-baalin goledɛnaa lɛa, bɛ na á goã ǹ mìi la.

¹⁷Ǹ ná a boo da Davida nɛ. A bɛ́ á ná a boo ma, á Izirayeli minin lɛn zia-baali tumaa sɔkɔn, á Zurdɛ̃ tà kuru, á daa Elamu kiwi. Siirii minin lɛn nə́ n tele Davida li, ǹ nə́ zia baa a ganaa.

¹⁸Sɛnɛ, ǹ nə́ baa si Izirayeli minin lɛn nyɛɛnɛ. Davida Siirii minin lɛn ziabaa ǹ wotoron dabaali biɛsɔbaa (700) dɛ, ka sùi-dabaali duu pusi (40 000) ni. Sobaki mɛn bɛ́ Siirii a zia-baalin lɛn gole dɛnaa lɛa, á bɛ dɛ, á gã a din bǎã nɛ.

¹⁹Kiin mɛnɛn tumaa bɛ́ á goã Adadezɛɛrɛ a pàã giulun, bɛn nə́ yɛ mà Izirayeli minin lɛn nə́ boo ǹsɛn la. Bɛ lɛ nɛ, ǹ nə́ ga là nyantoro li ǹ laanka Izirayeli minin lɛn biin ni, ǹ nə́ dí nya Izirayeli minin lɛn manɛ. A bɔ bɛ-n lɔn, nyɛ́ɛ toa Siirii minin lɛn yii wɔ ǹ nə́ daa n dɔ Amɔn tɔrɔn lɛn lɛ doo wa.