Read Samo, Southern Sam2 12 Bible Online

Sam2 12 - Samo, Southern bible

Sam2 12

¹ Dɛnaa Lawa Natan dia Davida li. Natan woo dɔ a li á pɛ nɛ: «Giĩ min paa kɔn na á goã kiwi goon ne, goon nə pàãma lɛa goon kɛ n doobaa lɛa.

²Sèren laanka dii gigiã goã pàãma lɛ sɛ lon.

³Màn kɔn goã doobaa lɛ gɔn duduu wa, bɛ̀ á n bɔ sère luun boɛɛn goon toto dinsɔɔ̃ nɛ, á goã á pii. A na á goã bɛ lɛ toe. Sère luun lɛ na á goã gole koe a gɔn, kun ka a din a nɛnyaanan dɔn nɛ. Doobaa lɛ goã màn mɛn bii, a din ni a dɔ́ goã bii. A goã màn mɛn mii, a din ni a dɔ́ goã mii. A na á goã wɛɛ tán a kolo-n, a na á goã ka a nɛlɔ din bɛ́ lɔn.

⁴Ǹ kɔn pinaa, tii goon daa n yu pàãma lɛ la. Bɛa zii tɔ-wɔle kɛ lɛ á daa a piɛ, pàãma lɛ lɛ kɔ a ná a din a sère hinlaa dii kɛ kɔn kũ á dɛ, á màn-bii zɛnaa á kɔ la wa. A na á woo doobaa lɛ a sère luun lɛ kũ, á dɛ á kɔ a tii lɛ la.»

⁵Davida foo yoo bɛa giĩ lɛ li parsiini, á pɛ Natan nɛ: «Ka Dɛnaa Lawa Yiikoonaa kɛ tɔ nɛ, giĩ mɛn bɛa sii lɛ zɛnaa, a doamaa-n ka gɛ̀ nɛ.

⁶A doamaa nɛ a sère luun lɛ dɔ miã màn sii saraa, sii kɛ lɛ a zɛnaa taman yii ka a din a makara-doɛ̃baã taman yii.»

⁷Natan tɔ́n pɛ Davida nɛ: — Giĩ mɛn bɛa sii lɛ zɛnaa, n din ni. Dɛnaa Lawa mɛn bɛ́ Izirayeli minin Lawa lɛa, bɛa da ǹ boo n ka kɛ nɛ: «Ma din ni má n bɔ má n koa Izirayeli minin kii lɛa, ma din ni má n si kii Sayulu la.

⁸Má n dɛnaagiĩ Sayulu a kion kɔ n la, má a lɔn kɛn wɔ n gɔn. Má n koa Izirayeli minin kɛn laanka Zudaa minin kɛn mìi la. Bɛ̀ bɛ n kiɛrɛ, bɛ̀ má wusoo má bɛ miã kɔsɔ da li.

⁹Wàa na á baa, n tá sàn koe ka Dɛnaa Lawa a boo ne, ń sii zɛnɛɛ, sii mɛn nə́ ke a kɔɔ̃n Lawa ganaa wa? Ń Ɛti tɔrɔ Urii dɛ zia la. N din nə n toa Amɔn tɔrɔn nə́ Urii dɛ. Bɛ kio, ń Urii a lɔ saa ń baa n din wɔ lɛa.

¹⁰Bɛ lɛ taman yii, zia ba re nyɛɛ n kion duduu wa. A giala, ma nə n masɛ puusə kɔ, ń Ɛti tɔrɔ Urii a lɔ saa ń baa n lɔ lɛa.

¹¹ Dɛnaa Lawa n kɛ pii: Á ke, man die toɛ n nɔmaa bɔ n din a kion kɛ lɛ nɛ. Masɛ n die n lɔn kɛn kuĩ n din yii ni, ma ǹ kɔ min kɔsɔ la. Bɛ á re giɛ̃ kun ka n lɔn lɛn nɛ wɔlɔ fúlu-a.

¹²A giala, ma nə ń sii lɛ zɛnaa ka durii ni. Sɛnɛ, masɛ n die toɛ a n zɛnaa wɔlɔ fúlu-a, Izirayeli minin lɛn tumaa yɔrɔ-a.»

¹³Bɛ kio, Davida pɛ Natan nɛ: «Má sii babaraa la Dɛnaa Lawa la.» Natan tɔ́n pɛ Davida nɛ: «A bɛ́ miɛ̃, Dɛnaa Lawa nə́ n sii baraa lɛ toa n nɛ. N ba re giɛ̃ wa.»

¹⁴Sɛnɛ, sii kɛ lɛ gɔ́ɔ̃ nɛ, ń Dɛnaa Lawa puusə kɔ parsiini, ń kɔ a zɔ́ɔn la. Bɛ lɛ taman yii, nɛgiĩ mɛn yɛ n wɔ lɛa ke, bɛ á re giɛ̃ sɛn.

¹⁵Bɛ kio, Natan kiɛ̃ á woo piɛ. Urii a lɔ lɛ nɛ mɛn yɛ Davida wɔ lɛa, Dɛnaa Lawa busu babaraa da bɛa nɛ lɛ ganaa.

¹⁶Davida gòã-kũ da Lawa ganaa, nɛ boɛɛn lɛ a lɛa. Davida ná a giala kɔ á goã n lɛ soɛ. Bɛ̀ á wɔ kion tèlò-n mà a n wɛɛ tán, a na á goã wɛɛ tán furu-n.

¹⁷A kion a min golen nə́ woo n doa a mìi la, mà a yoo. Sɛnɛ, á n piã, a màn-bii kɔn si ǹ gɔn wa.

¹⁸A lɛawaa sɔbaabaa ǹ wɔ pinaa, nɛ lɛ gã. Nyɛ́ɛ na á goã Davida a dí-nyalin lɛn ganaa ǹ pɛ Davida nɛ, mà nɛ lɛ gã. A giala maǹ nə́ goã pii ǹ dinin gɔ́ɔ̃-n kɛnɛn: «Nɛ lɛ yii bɛ́ koo ǹ mɛn waáraa, wɔ́ boo da nɛ, a n too kɔ wɔ lon wa. Wɔ n die siɛ lɔn wɔ pɛ-n sisia mà nɛ lɛ gã? Á ka a basaã kɔ a din ni!»

¹⁹Davida a dí-nyalin lɛn man nə́ goã diɛ kɔn nɛ zùũzùũ. Á tɔ́n dɔ̃, mà nɛ lɛ na á gã. Davida tɔ́n nɔ̀n da a dí-nyalin lɛn la mà nɛ lɛ na á gã? Ǹ ná a lɛ sii mà hiĩ, mà á gã.

²⁰Bɛa biikoo li, Davida yoo á n bɔ tán, á n zoo á nyɔɔ giĩ kɔɔ̃n lɔ a din ganaa, á mɔnaa kɔsɔn wɔ. Bɛ kio, á woo wɔ Dɛnaa Lawa a kion, á kaa tán á ná a guguru kɔ. A bɛ́ á n bɔyaa á woo piɛ, á pɛ mà ǹ da ka màn-bii ni. Ǹ nə́ màn-bii kɔ la á bii.

²¹A dí-nyalin lɛn nə́ tɔ́n pɛ nɛ: «Wàa mɛn sii n ke ń zɛnɛɛ? Nɛ lɛ yii bɛ́ koo, n nə ń goã n lɛ soɛ. Ń goã wuu pii a lɛa. Nɛ lɛ na á gã kanna kəni, ma n yui giɛ̃ lon n tá màn bii!»

²²Davida tɔ́n pɛ: «Taãn nɛ. Nɛ lɛ yii bɛ́ tɔn koo, má goã n lɛ soɛ, má goã wuu pii. A giala, man má goã pii ma din gɔ́ɔ̃ nɛ máa min ba doɛ̃ wa, máa kɔntan Dɛnaa Lawa á re makara boe ma ganaa, a nɛ lɛ yii toa koo.

²³Sɛnɛ, kanna, a bɛ́ á gã, masɛ a lɛ-sɔɔ mìi n ka wàa nɛ? Ma á boe la, ma a yii kaa doo? Ma á woe a li walan, a bie n bɔyɛɛ á die ma li kànaa doo wa.»

²⁴Bɛ kio, Davida ná a lɔ Bati-Seebaa lɛ foo wɔraa. Á giã kun ni, lɔ lɛ nɛ yɛ, Davida ná a tɔ kɔ mà Salomɔn. Dɛnaa Lawa nɛginin lɛ narɛ,

²⁵á pɛ a boo gii-dali Natan nɛ, mà a na a tɔ kɔ Zedidia, bɛ giala mà Dɛnaa Lawa goã narɛ.

²⁶Bɛa biikoo li, Zoabu na á goã zia biɛ Rabaa ganaa. Amɔn tɔrɔn lɛn kiwi gole ne. Ǹ kii lɛ goã giã-n bǎã mɛn nɛ, á bɛ kũ.

²⁷Zoabu minin dia Davida li mà ǹ pɛ-n kɛnɛn: «Má zia baa Rabaa ganaa, kiwi kɛ din mu lɛ-a, ma bɛ kũ.

²⁸Kanna kəni, má zia-baali gialakun kɛ sɔkɔn, má da kiwi lɛ gialaa, a kũ n baa n din wɔ lɛa. Masɛ ba li ma kiwi lɛ kũ, n ma yaa kiɛ̃ gugurubaa yii bɛ gɔ́ɔ̃-n wa.»

²⁹Davida nɔmaa á ná a zia-baalin lɛn tumaa sɔkɔn, á woo Rabaa gialaa, á zia baa a ganaa, á kũ.

³⁰Á Amɔn tɔrɔn lɛn kii a bafolo bɔ á bɔ a mìi ganaa. Bɛa bafolo lɛ tumaa na á goã sana lɛa, a gugurubaa la kilo pɔsɔɔ nɛ, ǹ ná a nyaǹ kɔ ka kɔlɔ giɔ̀mɔ kakaan nɛ. Ǹ nə́ bɛa bafolo lɛ wɔ Davida mìi ganaa. Davida gɔn màn gigiã goa kiwi lɛ nɛ á woo ne.

³¹Kiwi minin kɛn, á bɛn kũ á woo ǹ kaa pàã dí ganaa: Gɔn wɔsiɛ nɛ, sukun wɔ nɛ, sɛ̀miɛ̃ wɔ nɛ, ka toopaabɔ nɛ. A na á goã Amɔn tɔrɔn lɛn kiwin tumaa a minin biɛ miɛ̃. Bɛ kio, Davida laanka zaman lɛ tumaa nə́ n bɔyaa, ǹ nə́ daa Zeruzalɛmu.