Read Samo, Southern Sam2 15 Bible Online

Sam2 15 - Samo, Southern bible

Sam2 15

¹Bɛa siin lɛn kio, Abusalɔn ga fɔlɔ wotoro goon laanka sùin li a din wɔn lɛa. Á giĩ posooro dɔ bɔ, bɛn nə́ goã miɛ̃ a nyɛɛnɛ bɛ̀ ǹ baa si.

²Abusalɔn na á goã yui baayɛlɛ yiisoone, bɛ̀ a wo golee kiwi lɛ a wɔ ǹ kiɛnlɛ zii la. Bɛ̀ sii yoo min ganaa yǎa a kiri baa, bɛ̀ á bɛa dɛnaa yɛ kiɛ̃ lɔn, a n woe a yɔrɔ boe kii li, a na á goã lɛ diɛ bɛ la, bɛ̀ a nɔ̀n da la: «Ma n boe kɛ mɛn-a?» Bɛ na a lɛ sii mà Izirayeli tɔrɔn kɛn min goon nə ka asɛ nɛ.

³Abusalɔn nə goɛ̃ bɛ̀ a pɛ nɛ: «Ga, n boo lɛ á kɔɔ̃nɛ, sonbore tá n lon. Sɛnɛ, min kɔn na a re yii kii a minin kɛn bii, a n too kɔ n lon wa.»

⁴Abusalɔn nə goɛ̃ bɛ̀ a pɛ kɛnɛn dɔn: «A! Bɛ̀ ma din nə kiri-kuruli lɛa gána kɛ nɛ, min mɛn tumaa a sii bɛ́ a tan, a n die a kiri we, bɛ̀ ǹ tumaa n die die masɛ li, ma sonbore pɛ má kɔ ǹ la.»

⁵Bɛ̀ bɛa dɛnaa lɛ nə́ n zɔ̃ á n mɔrɔ a ganaa lɔn, á kaa tán a giulun, a nə n gɔn diɛ a bɛ kũ, a n sɔɔ a nɛ.

⁶Izirayeli minin lɛn mɛnɛn tumaa goã woe kii li ka kiri sii ni mà a na a yɔrɔ bɔ, Abusalɔn na á goã zɛnɛɛ bɛn tumaa-n miɛ̃. Abusalɔn na á goã Izirayeli minin lɛn mìi doe ǹ li, a tá n din sii kɔɔ̃n koe ǹ ganaa ka bɛa yɔrɔ lɛ nɛ.

⁷Lɛ̀ sii bɛ kio, Abusalɔn pɛ kii Davida nɛ: — Bǐɛ̃ kɔ, n zii kɔ ma la, ma wo Ebrɔn. Man lɛ kɔ Dɛnaa Lawa la ka màn mɛn nɛ, toa ma wo bɛ lɛ bɔ ma bɔ ma bɔlɔ-a.

⁸A giala, ma bɛ́ Gesuuru kiwi, Siirii gána nɛ ǹ mɛn waáraa, man má n lɛ kɔ Dɛnaa Lawa la má pɛ: «Bɛ̀ Dɛnaa Lawa wusoo á daa ka masɛ-n Zeruzalɛmu sɛn, ma á re wúlu mànan koe Dɛnaa Lawa la.»

⁹Kii tɔ́n pɛ nɛ: «Lawa dɔ n bǐɛ̃ nɛ.» Abusalɔn yoo á zii saa, á woo Ebrɔn.

¹⁰Abusalɔn minin dia Izirayeli minin lɛn tumaa li, á pɛ ǹ nɛ: — Bɛ̀ ká bɛn wuu ma lɔn, ka n lɛ dɛ ka pɛ: «Abusalɔn kii baa Ebrɔn.»

¹¹Abusalɔn min mɛnɛn bii, giĩ biɛpaa nɛ, ǹ nə́ soo kun ni Zeruzalɛmu, ǹ yii n tì. Sii mɛn bɛ́ nɛ, ǹ goã màn kɔn doɛ̃ a gɔ́ɔ̃-n wa.

¹²Abusalɔn bɛ́ wúlu mànan lɛn dii ǹ mɛn waáraa, á minin dia Giloo kiwi, mà ǹ wo lɛ dia Giloon giĩ Ayitofɛli la. Bɛa giĩ lɛ na á goã yiri koe Davida la. Abusalɔn a minin lɛn nə́ daa ǹ nə́ mɔnaa. Ǹ kɔn wɔ ma lɛ pàã daa á gole kɔ, kii lɛ a bɔ a daa boo wɔ paǹ li.

¹³Bɛ kio, min daa pɛ Davida ni ǹ kɔn pinaa: «Izirayeli minin lɛn taasiɛ nə́ n bɔyaa, á kaa kun ka Abusalɔn nɛ.»

¹⁴Davida tɔ́n pɛ a dí-nyalin manɛ, ǹ mɛnɛn lɛn bɛ́ kun ni Zeruzalɛmu: «Ka yoo wɔ baa si, a giala, la ǹ gɔn kɔn ba wɔ la Abusalɔn yɔrɔ-a wa. Ka n nanaa wɔ woo. Bɛ̀ bie wa, Abusalɔn tá re n nanaɛ a dɔ wɔ ganaa, a basaã kɔ wɔ nɛ, a kiwi minin lɛn tumaa dɛ.»

¹⁵Kii a dí-nyalin nə́ tɔ́n pɛ nɛ: «Wɔa dɛnaagiĩ kii, wɔsɛn nə́ ke, yǎa n din pɛ mà lɔn.»

¹⁶Kii soo ka a gòã nɛ, kun ka a kion minin tumaa nɛ. Sɛnɛ, a wɔ lɔ kɔsɔn mɛnɛn lɛ, a na á bɛa fù toa walan, mà ǹ ga kion lɛ walan.

¹⁷Kii soo ka a gòã nɛ, kun ka zaman lɛ tumaa nɛ. Ǹ bɛ́ ǹ nə́ dɔ kion giala-nyɔmɔɔ ganaa, ǹ nə́ golee walan.

¹⁸A dí-nyalin lɛn tumaa daa a li: Kerɛti minin tumaa ka Pelɛti minin tumaa nɛ. Gaati minin kɛn dɔn tumaa, min biɛsɔrɔ (600), ǹ nə́ bɔ Gaati ǹ nə́ daa a kio, bɛn nə́ mɛ kii lɛ nyɛɛnɛ.

¹⁹Kii pɛ Gaatin giĩ Itayii ni: «Wàa na á baa, n dɔ á die kun ka wɔsɛn nɛ? Wusoo n wo giã kun ka kii kɔsɔ kɛ nɛ, a giala ma n tii lɛa, ma n gùli din lɛa bǎã kɛ lɛ nɛ.

²⁰Nsɛ n da gunun wole lɛa, ma a boe la pelo gɔrɔ, ma n kũ ma n da kun ka wɔ dinin ni man bibiĩ n ni wa, a da yaa, ma dinmaa lɛ din ba maa woo ǹ bǎã doɛ̃ wa. N bɔyaa kun ka n dɔɔ̃nɔn lɛn nɛ ka woo. Lawa die a goã kunun n ni, a bǐɛ̃ zɛnaa n nɛ!»

²¹Itayii tɔ́n kii lɛ si á pɛ nɛ: «Ka Dɛnaa Lawa Yiikoonaa kɛ tɔ nɛ, a maa dɛnaagiĩ kii kɛ yii toa koo, n bɛ́ re goɛ̃ bǎã mɛn nɛ, ta ma n giɛ̃, ta ma n liɛ, masɛ dɔ á walan.»

²²Davida tɔ́n pɛ Itayii ni: «Kiɛ̃ nyɛɛnɛ.» Gaatin giĩ Itayii kiɛ̃ nyɛɛnɛ ka a minin tumaa nɛ, ka nɛnyaanan mɛnɛn tumaa bɛ́ kun ni.

²³Zaman lɛ tumaa bɛ́ kiɛ̃, gána lɛ a minin tumaa na á goã wuu pii n lɛ dii. Bɛ á zɛnɛɛ, bɛ̀ kii din nə Sedrɔn tà kɛ kuri, zaman lɛ sɛ n koe diə gole zii kɛ wàã lɛ kiɛ̃.

²⁴Lawa a wúlu-bɔle Sadɔki dɔ́ goã a tan, kun ka *Levii tɔrɔn kɛn tumaa nɛ, ǹ mɛnɛn lɛn bɛ́ Lawa a *lɛ kɔ kɔn la ǹ goo lɛ guĩ. Ǹ nə́ lɛ kɔ kɔn la ǹ goo lɛ da tán, yǎa zaman lɛ tumaa soo kiwi gɔ́ɔ̃ nɛ á nya. Bɛ a biikoo li, wúlu-bɔle Abiataara mɛ ǹ nyɛɛnɛ.

²⁵Bɛ kio, kii pɛ Sadɔki ni: «Lawa a lɛ kɔ kɔn la ǹ goo lɛ saa, n wusoo n wo ne kiwi gɔ́ɔ̃ nɛ. Bɛ̀ Dɛnaa Lawa wusoo á bǐɛ̃ kɔ ma ganaa, á die wusii a n bɔyaa ka ma nɛ, á die toɛ ma yii wusoo a lɛ kɔ kɔn la ǹ goo lɛ yɛ, kun ka a koa ǹ bǎã kɛ nɛ.

²⁶Sɛnɛ, bɛ̀ á pɛ dɔn mà a ba masɛ li wa, bɛ̀ sii mɛn kɔɔ̃n kɔ a ganaa, a bɛ zɛnaa ma nɛ.»

²⁷Kii wusoo á pɛ wúlu-bɔle Sadɔki ni: — N yii tá a ganaa ke? N bɔyaa n wo kiwi gɔ́ɔ̃ nɛ ka là nyantoro ne, kun ka ǹ nɛgiĩ min paa kɛ nɛ: «N din a nɛgiĩ Ayimasi laanka Abiataara a nɛgiĩ Zonaatan nɛ.»

²⁸Ka ga, masɛ Davida n die n lɔloɛ diə fúlu kɛ nɛ don, yǎa ka dinin boo doe ma li.

²⁹Sadɔki laanka Abiataara tɔ́n Lawa a lɛ kɔ kɔn la ǹ goo lɛ saa, ǹ nə́ n bɔyaa ǹ nə́ woo Zeruzalɛmu, ǹ nə́ giã walan.

³⁰Davida na á *olivie dan kele kɛa zii saa, á goã dii woe. A na á goã dii, bɛ̀ á n wuu pii. Foo ziziɛ̃ taman yii, màn na á goã koe ne a mìi lɛ, á n tɔ we ka a gòã kooro ne. Zaman mɛn tumaa goã kun ni, bɛn dɔn man nə́ màn kɔ ǹ mìi lɛ, ǹ nə́ goã dii kele lɛ la. Maǹ dii bɛ̀ ǹ tá wuu pii.

³¹Ǹ nə́ pɛ Davida nɛ, mà Ayitofɛli giala á kun ka Abusalɔn nɛ, piã-wɔlen lɛn bii. Bɛ lɛ nɛ, Davida tɔ́n pɛ: «Dɛnaa Lawa, bǐɛ̃ kɔ n Ayitofɛli a minin doroo ǹ boon kɛn baa baãnaa baa ǹ boon lɛa.»

³²Davida dɔ kele lɛ mìi ni, ǹ bɛ́ kiɛ tán Lawa yɔrɔ-a bǎã mɛn nɛ, bɛ̀ ǹ na a guguru kɔ. A bɛ́ doe walan, bɛ̀ Arkaan giĩ Usayii á ke die a li, a mɔnaa n tɔtoɛ̃nɛ, a mìi tumaa n tii lɛa.

³³Davida tɔ́n pɛ nɛ: — Bɛ̀ ń kɔ masɛ lɛ, ma n die sii diɛ masɛ mìi ni.

³⁴Á soɛ, n nə n bɔyaa n wo Zeruzalɛmu kiwi gɔ́ɔ̃ nɛ, n pɛ Abusalɔn nɛ kɛnɛn: «Kii ganaa, masɛ n die dí nyɛɛ n nɛ. Lɛlɛ, má goã dí nyɛɛ n di Davida nɛ.» Sɛnɛ, kanna, ma nə n din a dí-nyali lɛa. Bɛ̀ n zɛnaa miɛ̃, n tá re boe la n Ayitofɛli a doree babaraa kɛ ziziɛ̃, n masɛ wɔ bǐɛ̃ kɔ nɛ.

³⁵Wúlu-bɔlen kɛn, Sadɔki laanka Abiataara nɛ, bɛn tá re goɛ̃ kunun n ni walan. N bɛ́ re boo woo boo miɛ kii a kion, n pɛ bɛn lɛn manɛ.

³⁶Ǹ nɛgiĩ min paa kɛ dɔ tá ǹ li walan: Sadɔki a Ayimaasi laanka Abiataara a Zonaatan nɛ. Bɛ̀ ka boo woo boo ma, ka bɛn lɛn dia, ǹ da pɛ ma nɛ.

³⁷Davida a giaáragiĩ Usayii wusoo á woo kiwi gɔ́ɔ̃ nɛ. A bɛ́ doe, bɛ̀ Abusalɔn dɔ n we Zeruzalɛmu kiwi.