Read Samo, Southern Sam2 18 Bible Online

Sam2 18 - Samo, Southern bible

Sam2 18

¹Kii Davida wusoo a ná a minin lɛn sɔkɔn, á tɔ́n nə ǹ tatala kɔn duu gogoon laanka paabibiɛ lɛ la, á goledɛnan koa ǹ mìi la.

²Bɛ kio, kii Davida zaman lɛ talakɔn wɔlɔ sɔɔ, a ná a talakɔn goon a sii wɔ Seruzaa a nɛgiĩ Zoabu gɔn. Á goon a sii wɔ Zoabu ǹ dɔɔ̃ngiĩ Abisayii gɔn, á tɔ́n goon kɛa sii wɔ Gaati min Itayii gɔn. Bɛ kio, á pɛ zaman lɛ nɛ mà asɛ dɔ tá li a soo a wo zia baa kun ka ǹ nɛ.

³Sɛnɛ, zaman lɛ pɛ-n kɛnɛn: «Wɔ ba lɛ koe duduu, n soo n wo kun ka wɔsɛn nɛ wa. A giala, bɛ̀ ǹ nə́ baa da wɔ gòã li, min kɔn ba re n yiri koɛ wɔ li wa. Ta wɔa talɛɛ na á gã, min kɔn ba re n yiri koɛ wɔ li wa. Sɛnɛ, nsɛ bɛ́ wɔ miã duu fù boe, á soɛ nsɛ goã piɛ, n nə n toa kiwi lɛ nɛ, bɛ̀ n nə n dɔ wɔ lɛ.»

⁴Kii lɛ tɔ́n pɛ ǹ nɛ: «Sii mɛn bɛ́ siĩni ka dinin yii li, masɛ á re bɛ lɛ zɛnɛɛ.» Kii golee kiri wɔ ǹ bǎã nɛ. Bɛa biikoo li, zaman lɛ tumaa na á goã soe min paabibiɛ kun, min duu gogoon kun.

⁵Bɛ kio, kii nə́ n gɔn waa Zoabu ni ka Abisayii laanka Itayii ni, á pɛ ǹ nɛ: «Ka tɔntɔraagiĩ Abusalɔn lɛ kũ doɛ̃ masɛ din taman yii.» Zaman lɛ tumaa kii lɛ ma bɛa gɔn waa ǹ boo lɛ diɛ goledɛnan lɛn tumaa nɛ Abusalɔn wɔ paǹ li.

⁶Davida a zia-baalin lɛn nə́ zii saa, ǹ nə́ woo don, mà maǹ woe zia biɛ Abusalɔn wɔn lɛn ganaa. Bɛa zia lɛ na á n baa Efrayimu a daã kɛ gɔ́ɔ̃ nɛ.

⁷Walan lɛ nɛ, Davida a zia-baali lɛn nə́ Abusalɔn wɔn lɛn dɛ. Bɔ̀n gole yɛ bɛa pinaa kɛ lɛ nɛ. Giĩ duu fuə (20 000) na á gã.

⁸Zia lɛ nə́ n daa gána lɛ gɔ́ɔ̃ tumaa la. Bɛa pinaa kɛ lɛ nɛ, daã lɛ min mɛnɛn bii zaman lɛ bii, bɛn nə́ mɔnaa ǹ nə́ la kɛn manɛ zia lɛ nə́ ǹ bii.

⁹Abusalɔn laan bɛ̀ a n doɛ̃, a laanka Davida a zia-baalin nə́ woo kaa kɔn lɛ bǎã kɔn nɛ. Abusalɔn na á goã á dii dundun sùi kɔn la. Dundun sùi lɛ nə́ n dɔ da gole kɔn giulun, da lɛ gùrùn nə́ gɔgasiɛɛnɛ. Abusalɔn mìi nə́ n lɔɔ bɛa da lɛ gùrùn ni, á goã n loolaan boe lon, a gòãn ba doe tán wa. Bɛa biikoo li, dundun sùi mɛn goã a giulun, bɛ́ baa si á kiɛ̃.

¹⁰Giĩ kɔn Abusalɔn yɛ, á n bɔyaa á daa pɛ Zoabu ni: «Á ke, má Abusalɔn yɛ loɛ-n da gole kɔn gùrù ganaa.»

¹¹Min mɛn da boo lɛ pɛ Zoabu ni, Zoabu pɛ bɛ nɛ: «Á ke, n bɛ́ n yɛ miɛ̃, wàa na á baa, n dɛ a din bǎã-n gɔrɔ wa. Bɛ̀ ma nə n zɛnaa miɛ̃, bɛ̀ man die paa fù koe n la, wɔrɔ lɛa ka maabɛlɛ goon ne.»

¹²Sɛnɛ giĩ lɛ pɛ Zoabu ni: — Ta n din nə wɔrɔ duu goon kiɛ ma gɔn, masɛ a re n gɔn diɛ kii a nɛgiĩ ganaa wa. A giala, kii bɛ́ n gɔn wɛɛ n laanka Abisayii ni ka Itayii ni ǹ mɛn pinaa, wɔsɛn dɔn too ma: «Min kɔn nyan toa a n gɔn da Abusalɔn ganaa wa.»

¹³Ka bɛ din ni, bɛ̀ masɛ n má dɛ, sii kɔn bɛ́ a ba n duri kii la wa. Bɛ̀ n dinmaa kɛ lɛ dɔ n die n sɔlɛɛ n nə n bɔ ma li.

¹⁴Zoabu tɔ́n pɛ nɛ: «Biikoo ba masɛ gɔn ma golee n li kɛnɛn wa.» Á sɛmiɛ̃ sɔɔ goa a gɔn, á woo ǹ dere Abusalɔn tìãbii. Bɛ á zɛnɛɛ, bɛ̀ Abusalɔn yii á tɔn koo lon, da gole lɛ gùrù ganaa.

¹⁵Bɛ kio, tɔntɔraa fù mɛn bɛ́ á goã Zoabu a ziabaa ǹ mànan guĩ, bɛn nə́ daa Abusalɔn lɛnpɛnɛ, ǹ nə́ dɛ á gã.

¹⁶Bɛ kio kəni, Zoabu bɛn pɛ, á zaman lɛ kurəə ne, Davida a zia-baalin lɛn nə́ tɔ́n Abusalɔn wɔn lɛn loo lɛ da.

¹⁷Ǹ nə́ Abusalɔn gere saa, ǹ nə́ zũ nyankɔrɔ gole kɔn nɛ daã lɛ nɛ, ǹ nə́ kɔlɔ goa, ǹ nə́ dɛrɛ kɔn la a lalan. Bɛa biikoo li, bɛ̀ Abusalɔn a zia-baalin lɛn gogoonmaa á baa la woe piɛ.

¹⁸Abusalɔn yii bɛ́ tɔn koo, á tíĩ kɔn doa kii a nyankɔrɔ basa kɛ nɛ. A giala, a na á goa pii, mà nɛgiĩ ba asɛ lon bɛ́ n die toɛ, asɛ tɔ goã kanaa wa. Bɛ lɛ nɛ, á tɔ́n nə n din tɔ kɔ tíĩ lɛ ganaa. Haalɛ tɔn pelo, maǹ bɛa tíĩ lɛ bíi mà Abusalɔn a tíĩ.

¹⁹Bɛ kio, Sadɔki a nɛgiĩ Ayimaasi pɛ Zoabu ni: «Toa ma baa si ma wo boo kɛ pɛ kii ni, mà Dɛnaa Lawa na á si a zɔ́ɔn lɛn la, á da.»

²⁰Zoabu tɔ́n pɛ nɛ: «Pelo a boo kɛ lɛ, a pɛle bie ka nsɛ-n wa. Lɛawaa kɔsɔ-a, n tá die woe boon pii. Sɛnɛ, pelo wɔ ke, ǹ ba woe bɛ pii wa, a giala, bɛ n kii a nɛgiĩ a gɛ̀ boo lɛa.»

²¹Zoabu tɔ́n pɛ bɛ̀rɛgiĩ goon ne Etiopii min lɛa: «N sii mɛn yɛ, baa si n wo pɛ kii ni.» Etiopii min lɛ kaa tán Zoabu giulun a guguru kɔ ǹ sii lɛa, bɛ kio, á yoo á baa si á woo.

²²Sadɔki a nɛgiĩ Ayimaasi wusoo á pɛ Zoabu-n doo: «Ta sii mɛn nə boe a nɛ, má golee li. Toa masɛ dɔ baa si ma wo Etiopiin giĩ lɛ kio.» Zoabu tɔ́n nɔ̀n da la: «N dɔ a baa si a woo mìi n ka wàa nɛ? Boo kɛ lɛ a pɛ a die là goon biɛ n ganaa wa.

²³Ta sii mɛn nə́ boe a nɛ, masɛ golee li. Man die baa sii ma woo.» Zoabu tɔ́n pɛ nɛ: «Baa si n woo.» Ayimaasi Zurdɛ̃ bǎã kɛa diə fúlu zii saa ka baa nɛ, á daa Etiopiin giĩ lɛ na zii la.

²⁴Bɛa biikoo li, bɛ̀ Davida á giã-n tán kiwi lɛ a wɔ ǹ kiɛnlɛ màn paa kɛ bii. Wɔlɔ-lɛduə̃li woo dii kungɔn la kiɛnlɛ baãbii, á n yii saa á ga, bɛ̀ giĩ goon bɛ́ baa sii a dinsɔɔ̃.

²⁵Wɔlɔ-lɛduə̃li lɛ nə́ n lɛ dɛ, á ná a boo da kii ni. Kii tɔ́n pɛ nɛ: «Bɛ̀ a dinsɔɔ̃ nɛ, boo kɔɔ̃n na a lɛ-n á n die pii.» Giĩ lɛ wɔlɔ bɛ́ kunu koe ǹ mɛn waáraa,

²⁶wɔlɔ-lɛduə̃li lɛ kɔsɔ dɔ yɛ baa sii die. Á tɔ́n lɛ dia kiɛnlɛ-lɛduə̃li la ka koeene á pɛ nɛ: «Giĩ goon dɔ á ke baa sii a dinsɔɔ̃.» Kii lɛ tɔ́n pɛ: «Kɛ dɔ n die ka boo kɔɔ̃n nɛ.»

²⁷Wɔlɔ-lɛduə̃li lɛ pɛ doo: — Ma á giĩ lɛ a bibinaa kɛ doɛ̃ a baa si ǹ gɔn li: «Sadɔki a nɛgiĩ Ayimaasi ni.» Kii tɔ́n pɛ doo: «Min sonbore ne, a n die ka boo kɔɔ̃n nɛ.»

²⁸Ayimasi bɛ́ á dɔ, á n lɛ dɛ á pɛ kii ni: «Fòo ka là nyantoro ne!» Bɛ kio, á kaa tán kii giulun guguru kɔ ǹ sii lɛa á pɛ nɛ: «Ma á barka diɛ n Lawa, Dɛnaa Lawa kɛ nɛ. A giala, min mɛnɛn bɛ́ ǹ nə́ yoo maa dɛnaagiĩ kii gialaa, Lawa nə́ ǹ kɔ wɔsɛn la.»

²⁹Kii tɔ́n nɔ̀n da: «Tɔntɔraagiĩ Abusalɔn lɛ á là nyantoro la?» Ayimaasi ná a lɛ si kɛnɛn: «Zoabu bɛ́ masɛ laanka dí-nyali kɔsɔ kɛ diɛ ǹ mɛn waáraa, bɛ̀ sɛ̀-pɛ gigiã lɛ á boe. Sɛnɛ, ma a doɛ̃ sii mɛn bɛ́-n wa.»

³⁰Kii tɔ́n pɛ nɛ: «N nyanaa n nə n tiləə, n golee kànaa. Á n nyanaa á n tiləə, á golee walan.»

³¹Boɛɛnɛ, bɛ̀ Etiopii min lɛ dɔ á ke á dɔ. Á pɛ kii ni: «Maa dɛnaagiĩ kii, n too kɔ boo kɔɔ̃n kɛ li: Pelo, Dɛnaa Lawa nə n si n zɔ́ɔn lɛn tumaa la, á n da.»

³²Kii nɔ̀n da Etiopiin giĩ lɛ la: «Tɔntɔraagiĩ Abusalɔn lɛ tá là nyantoro la?» Etiopiin giĩ lɛ ná a lɛ si á pɛ: «Maa dɛnaagiĩ kii, n zɔ́ɔn nɛ, ka min mɛnɛn tumaa bɛ́ yui n gialaa ǹ nə́ giɛ n bɔ̀n li, sii mɛn tɔntɔraagiĩ lɛ yɛ, bɛ miã die a ǹ dɔn yɛ.»