Read Samo, Southern Sam2 19 Bible Online

Sam2 19 - Samo, Southern bible

Sam2 19

¹Kii bɛ ma lɔn, a gɔ̀nɔn bìn da. Bɛ kio, á dii a kion kɛ nɛ *kiwi a kiɛnlɛ lalan, á n lɛ da wuu ni. A na á goã tɔ we bɛ̀ á n pii: «E, Abusalɔn, wui maa nɛ, maa nɛ, maa nɛ Abusalɔn! Toa bɛ̀ ma dinmaa lɛ n má gã n bǎã nɛ! E, Abusalɔn, wui maa nɛ, maa nɛ!»

²Min nə́ daa pɛ Zoabu ni: «Á ke, kii á wuu pii, n duduwii Abusalɔn a gɛ̀ lɛ taman yii.»

³Gɔ̀lɔ̀baa lɛ nə́ n bɔyaa bɛa pinaa, á yɔrɔ kɔsiɛ baa zaman lɛ tumaa gɔn. A giala, zaman lɛ ma minin lɛ-n bɛa pinaa kɛ lɛ nɛ mà kii a nɛgiĩ lɛ a gɛ̀ ná a foo ziziɛ̃ parsiini.

⁴Bɛa pinaa kɛ lɛ nɛ, zaman lɛ na á n duru á kaa kiwi gɔ́ɔ̃ nɛ, ka n pɛ mà min mɛnɛn bɛ́ ke ǹ nə́ baa si zia la, sìi nə́ ǹ ganaa.

⁵Kii lɛ sɛ na á goã á n gɔnɔn kɔ a yɔrɔ lɛ. A na á goã n lɛ dii kɔsɛkɔsɛ á n pii: «E, maa nɛ Abusalɔn, Abusalɔn, wui maa nɛ, maa nɛ!»

⁶Zoabu woo dɔ kii li kion á pɛ nɛ: «Sìi n ka kɛ nɛ, n nə́ diɛ n dí-nyalin lɛn tumaa ganaa pelo. Ǹ dinin lɛn man nə́ n si gɛ̀ la n laanka n nɛgiĩn ni, ka n nɛlɔn nɛ, ka n gòã li ǹ lɔn laanka n lɔ kɔsɔn nɛ.

⁷Min mɛnɛn bɛ́ n biɛ zɔ́ɔ, ma n bɛn narɛ. Min mɛnɛn bɛ́ n narɛ, ma n bɛn biɛ zɔ́ɔ. Ma nə n nyaa pelo, n din goledɛnan laanka dí-nyalin mɛnɛn koa, bɛn ba màn kɔn lɛa n yɔrɔ-a wa. Masɛ á doɛ̃ pelo, bɛ̀ Abusalɔn yii n koo, wɔsɛn kɛn tumaa gã pelo lɛawaa kɛ nɛ, bɛ n sii sonbore lɛa n yii li.

⁸Kanna kəni, yoo n soo, n boo da ka n dí-nyalin lɛn nɛ, n nə ǹ foo taã. A giala, bɛ̀ n woo wa, masɛ nə n liɛ n nɛ, ka Dɛnaa Lawa tɔ nɛ, min kɔn ba pelo a lɛ̀ kɛ wɛɛ kunun n ni wa. Bɛ dɔ n die bɔ̀n gole biɛ n ganaa, ǹ mɛn bɛ́ baraa á la lɛlɛ wɔn kɛn tumaa nɛ, ǹ mɛnɛn nə n yɛ, a saa n tɔntɔraamaa waáraa ganaa, a da pelo yaa.»

⁹Bɛ kio, kii yoo á daa giã tán kiri wɔ ǹ bǎã nɛ. Ǹ nə́ pɛ zaman lɛ tumaa nɛ: «Á ke, kii á giã-n tán kiri wɔ ǹ bǎã nɛ.» Zaman lɛ tumaa daa n sɔkɔn kii li. Izirayeli minin lɛn tumaa na á goã ǹ nə́ baa si, didie woo a din a piɛ.

¹⁰Izirayeli tɔrɔn lɛn tumaa bii, minin man nə́ goã n dinin zɛ̀rɛ biɛ ǹ nə́ pii: «Kii lɛ din na á goã, á wɔ gɔsɛ, á wɔ bɔ wɔa zɔ́ɔn gɔn, a din na á goã á wɔ si Filisiti minin kɛn la. A din nə ke, á baa si á gána toa, màn mɛn bɛ́ toɛ, a kanbaa Abusalɔn ganaa.

¹¹Wɔsɛn nə Abusalɔn mɛn dɔ bɔ wɔ́ koa wɔa kii lɛa, bɛ dɔ á ke á gã zia la. Wɔ n wàa duĩ kəni, wɔ tɔn wo kii Davida kũ wɔ da nɛ?»

¹²Ǹ goã boo mɛn pii Izirayeli gána tumaa nɛ, bɛ́ dɔ kii ganaa a piɛ. Bɛ lɛ nɛ, á tɔ́n pɛ wúlu-bɔlen manɛ, Sadɔki laanka Abiataara nɛ mà n wo nɔ̀n da Zudaa min golen lɛn la kɛnɛn: «Wàa na á baa ka dinin tá re wusii ka goã kio ka kii a wusoo a da-piɛ sii yɔrɔ bɔ nɛ?

¹³Ka n masɛ dɔɔ̃nɔn lɛa, ma din wɔ taãnan man ka nɛ. Wàa na á baa ka dinin tá tɔn die wusii goɛ̃ kio ka masɛ a wusoo a da-piɛ kɛa sii yɔrɔ bɔ nɛ?»

¹⁴Ka pɛ Amasaa dɔ nɛ: «N bɛ́ masɛ din wɔ taãn lɛa, bɛ̀ má n koa Zoabu bǎã nɛ, maa zia-baalin kɛn goledɛnaa lɛa miɛ̃ duduu wa, Lawa die a dɔlɔ babaraa bɔ ma ganaa!»

¹⁵Davida Zudaa minin lɛn tumaa a taasiɛ bɔyaa á baa goon. Ǹ dinin nə́ tɔ́n min dia, mà a wo pɛ kii Davida nɛ: «N laanka n dí-nyalin lɛn tumaa wusoo ka da piɛ.»

¹⁶Bɛ lɛ nɛ, kii wusoo, á daa á dɔ Zurdɛ̃ tà lɛ-a. Zudaa minin nə́ daa n da kii lɛ Gilgaali, màn mɛn bɛ́ toɛ, ǹ nə n dɔ lɛ, ǹ Zurdɛ̃ tà kuru ni.

¹⁷ Geraa mɛn bɛ́ Bɛnzamɛn tɔrɔ lɛa, boe Bawurimu kiwi, bɛa nɛgiĩ Simeyii kɛ nə́ n nanaa, á n dɔ kun ka Zudaa minin lɛn nɛ, á woo n da kii Davida lɛ.

¹⁸Bɛnzamɛn tɔrɔn kɛn min duu goon (1 000) na á goã kun ni, ka Sayulu a kion dí-nyali Siibaa kɛ nɛ. Siibaa a nɛgiĩ fulusooro laanka a dí-nyali fuə dɔ́ goã kun ni. Bɛn nə́ n nanaa ǹ nə́ dɔ Zurdɛ̃ tà lɛ-a kii nyɛɛnɛ.

¹⁹Ǹ mu la ǹ goo mɛn kɔ kii la, bɛ na á goã tà kuri, á n woe kii a kion minin goɛ tà kio. A bɛ́ á Zurdɛ̃ tà kuru ǹ mɛn waáraa, Geraa a nɛgiĩ Simeyii kaa tán a giulun a guguru kɔ ǹ sii lɛa.

²⁰Á pɛ kii ni: «Dɛnaagiĩ, n baran ga maa sii baraa kɛ-a wa. Ń bɛ́ soe Zeruzalɛmu ǹ mɛn pinaa, masɛ sii mɛn la n la, bɛ bɔ, n bɔ n yiri ni. N nyan bɛ toa n gɔ́ɔ̃-n wa.

²¹A giala, ma á doɛ̃ máa ma sii baraa zɛnaa. Sɛnɛ, pelo, ma din nə ke má daa n da maa dɛnaagiĩ kii lɛ, gɔsɛ a lɛ̀gɔn la gána minin kɛn tumaa nyɛɛnɛ.»

²²Seruzaa a nɛgiĩ Abisayii nə́ n zɔ̃ á dɔ á pɛ: «Ka ǹ die Simeyii toɛ walan bɛ lɛ sɛ a lɛa, ka n ka a dii wa? A da yaa, Dɛnaa Lawa min mɛn bɔ á koa kii lɛa, á lɛn baraa bíi bɛ li.»

²³Sɛnɛ, Davida pɛ: «Seruzaa a nɛgiĩn lɛn, wàa mɛn sii n ka laanka masɛ bii, ka n yui zɔ́ɔbaa ǹ sii kɛ miã zɛnɛɛ masɛ-n pelo? Má waa la pelo, masɛ din nə Izirayeli minin lɛn kii lɛa. Bɛ lɛ nɛ, masɛ ba li, ǹ min dɛ Izirayeli gána kɛ-n pelo wa.»

²⁴Bɛ kio, kii pɛ Simeyii ni: «Ǹ ǹ ba re dii wa. Á n liɛ nɛ ka bɛa boo lɛ nɛ.»

²⁵ Sayulu a nɛgiĩ Mefibosɛti dɔ́ goã á daa n da kii lɛ. A saa kii a woo ganaa, a da kaa a wusoo a daa kɛ lɛ ka là nyantoro ne, Mefibosɛti ga a gòãn lɛn laanka a lɛ ka kɛ walan wa, a bin na a mɔnaan dɔn pii wa.

²⁶Zeruzalɛmu minin bɛ́ ǹ nə́ daa n da kii lɛ ǹ mɛn waáraa, kii lɛ nɔ̀n da Mefibosɛti la: «Mefibosɛti ganaa, wàa na á baa, n wo kun ka ma-n wa?»

²⁷A ná a lɛ si: «Maa dɛnaagiĩ kii, maa dí-nyali na á ma yiri sã. Bɛ̀ bɛ lɛ bie wa, man má goã, máa man die maa dundun dan kuĩ ma kɛkɛrɛ da a dɔ̀ɔ̃ nɛ, ma dii la, ma wo kunun n ni. A giala, ma gòã lɛ a toɛ ma á tɔ we wa.

²⁸Maa dí-nyali lɛ na á daa ma pɔpɔsɛ maa dɛnaagiĩ kii li. Sɛnɛ, maa dɛnaagiĩ kii n goon ka lon a dia dí-a wole ne. Sii mɛn bɛ́ kɔɔ̃n a din ganaa, a n bɛ zɛnɛɛ.

²⁹Sonbore ne, maa dɛnaagiĩ kii wɔ paǹ li, ma di kion minin kɛn tumaa bii, min kɔn din yii doamaa bie a goã koo wa. Ka bɛ tumaa nɛ, min mɛnɛn bɛ́ màn bii n goo la, ń lɛ kɔ ń masɛ da kun ka bɛn nɛ. Man die pii kii-n doo, yǎa a wàa mɛn sii zɛnɛɛ masɛ nɛ, a kiɛ̃ bɛ la?»

³⁰Kii tɔ́n pɛ nɛ: «Bɛa boo gigiã kɛa là n ka wàa-n doo? Man kɛ pii n ni: N laanka Siibaa die bǎãn lɛn gii kɔn.»

³¹Mefibosɛti tɔ́n pɛ kii ni: «Siibaa na a tumaa din si. Yǎa maa dɛnaagiĩ kii din bɛ́ á n bɔyaa á daa piɛ ka là nyantoro ne.»

³²Barzilayii mɛn bɛ́ Galaati min lɛa, bɛ dɔ bɔ Rogelimu kiwi, á Zurdɛ̃ tà kuru kun ka kii ni, á da zii yǎa tà kio, á tɔ́n wusoo walan.

³³Barzilayii goã á zizi kɔ parsiini. A lɛ̀ pɔkiwisi ni. A din na á goã á ga kii lɛ walan, bɛ̀ a bɛ́ Mahanayimu ǹ mɛn waáraa. A giala, gɔn màn gigiã goã Barzilayii lon.

³⁴Kii pɛ nɛ: «N tá kun ka ma-n Zeruzalɛmu, ma á die giɛ n walan.»

³⁵Barzilayii tɔ́n pɛ kii ni: «Lɛ̀ gia n tɔn masɛ gɔn má n zɛnɛɛ kanaa doo, ma tɔn wo kunun n ni Zeruzalɛmu?

³⁶Ma lɛ̀ pɔkiwisi n ke pelo. Máa màn sonbore laanka a baraa bɔkɔnlɛ doɛ̃ doo? Ma bɛ́ màn mɛn bii, ma bɛ́ màn mɛn mii, ma á boe la, ma bɛa kɔɔ̃nbaa dɔ̃ doo? Ma á tɔn boe la, man too kɔ giĩ kɔlɔn laanka lɔ kɔlɔn loe ganaa doɛ̃ doo? Maa dɛnaagiĩ kii, ma ba li ma wusoo ma guĩ baa n mìi-n wa.

³⁷Man má Zurdɛ̃ tà kɛ na n nɛ boɛɛnɛ kooro. Sɛnɛ, wàa na á baa, n tá bɛa bǐɛ̃ gole kɛ miã zɛnɛɛ ma nɛ.

³⁸Sabara baa n toa man bɔyaa ma wo maa kiwi, ma gã walan, ǹ ma gere bĩ ma di laanka ma dan a yala li. Sɛnɛ, n dí-nyali Kimamu á ke, bɛ lɛ kũ n wo ne, bɛ̀ sii mɛn tá siĩni n din yii li, n die n bɛ zɛnaa nɛ.»

³⁹Kii lɛ tɔ́n pɛ: «Ma á re kuĩ ma wo ne. Bɛ̀ sii mɛn kɔɔ̃n kɔ n din Barzilayii ganaa, ma á re bɛ zɛnɛɛ Kimamu ni. Bɛ̀ ń nɔ̀n da ma la ka màn woo màn nɛ, ma á re bɛ koe n la.»

⁴⁰Kii Davida laanka a minin lɛn tumaa Zurdɛ̃ tà kuru. Bɛ kio, kii nə́ n sɔɔ Barzilayii ni, á barka da a ganaa. Barzilayii sɛ nə́ n bɔyaa á woo a bǎã nɛ.

⁴¹Kii woo Gilgaali kun ka Kimamu ni. Zudaa minin ni, ka Izirayeli minin kɛn talɛɛ nɛ gɔsɛ a lɛ̀gɔn la, bɛn nə́ tà kuru kun ka kii ni.

⁴²Izirayeli minin lɛn tumaa tɔn nə n zɔ̃ kəni ǹ nə́ dɔ kii li, ǹ nə́ pɛ nɛ: «Wàa na á baa, wɔ dɔɔ̃n Zudaa minin lɛn nə́ n duru wɔsɛn ganaa, ǹ dininsɔɔ̃nɔn nə́ kii Davida laanka a kion minin kuĩ Zurdɛ̃ tà kuri ǹ ni, ka a kiodɛnan lɛn tumaa nɛ.»

⁴³Zudaa minin lɛn tumaa tɔ́n pɛ Izirayeli minin lɛn manɛ. Dɔɔ̃nbaa tá wɔsɛn laanka kii lɛ bii á la ka nɛ. Wàa na á baa kasɛn foo á yui bɛ taman yii. Kii lɛ na á màn-bii kɔ wɔsɛn la wɔ́ bii? Kii lɛ na á màn bɔ á kɔ wɔsɛn la?

⁴⁴Izirayeli minin lɛn nə́ Zudaa wɔn lɛn lɛ si ǹ nə́ pɛ ǹ nɛ: «Wɔsɛn wɔ gii tá kiibaa kɛ lɛ nɛ á la ka nɛ guyin fù, Davida tá wɔsɛn wɔ lɛa á la ka nɛ. Wàa na á baa, ka wɔsɛn puusə kɔ kɛnɛn? Wɔa kii a wusoo a da piɛ boo kɛ lɛ, wɔsɛn dinin bie wɔ́ pɛ bibinaa nɛ wa ya?» Sɛnɛ, Zudaa minin lɛn boo we goã laanɛ á la Izirayeli minin lɛn wɔ nɛ.