Read Samo, Southern Sam2 23 Bible Online

Sam2 23 - Samo, Southern bible

Sam2 23

¹Davida n Zesee a nɛgiĩ lɛa, a n min lɛa Lawa koa gole. Zakɔba a Lawa lɛ na á bɔ á koa kii lɛa. Izirayeli minin bɛ́ loe kɔɔ̃nɔn mɛnɛn loe, a din na á bɛn bɔ. Davida lɛ a boo giala nyɔmiɛ̃n man ka kɛn nɛ.

²Dɛnaa Lawa yiri a boo n ke soe ma lɛ-n, a din a boo kɛ lɛ n ma lɛwɔn la.

³Izirayeli a Lawa na á kɛ pɛ. Izirayeli tamaali lɛ na á kɛ pɛ ma nɛ: «Min mɛn bɛ́ a kiibaa zɛnɛɛ minbuiinin bii ka peperebaa nɛ, kii mɛn bɛ́ a kiibaa zɛnɛɛ ka nyɛ́ɛ baa Lawa yii-n ni,

⁴bɛ n ka wasa a folon bɛ́ lɔn a bɔ tán biikoo li baayɛlɛ, bɛ̀ labara ba lon ǹ mɛn pinaa wa. A n ka wasa a folon bɛ́ lɔn, buu diɛ bɔ tán ganaa la a kaa kio.»

⁵Lawa n bɛ lɛ miã zɛnɛɛ maa kion wɔ paǹ li. A giala, á lɛ kɔ kɔn la wɔ ka masɛ nɛ yǎa duduu. A lɛ kɔ sii mɛn ganaa, bɛa sàabiɛ wa. A n lɛ kɔ ka sii mɛn nɛ, a ba bɛ bɔyɛɛ wa. Á die sii tumaa yɔrɔ boe maa kirisibaa a lɛa, màn mɛn bɛ́ toɛ, sii mɛn bɛ́ kɔɔ̃n ma ganaa bɛ nə n zɛnaa.

⁶Sɛnɛ, min baraan kɛn tumaa n ka nyan bɛ́ lɔn ǹ tá n nyɛnɛɛ ǹ nɛ, min ba kuĩ ka a gɔn nɛ wa.

⁷Min mɛn bɛ́ n gɔn diɛ a ganaa, yǎa a fɔlɔ siɛ a gɔn, hinlaa sɛmiɛ̃ bàlà, a na a tumaa tã a din bǎã-n lenlen.

⁸Min mɛnɛn nə goã zia-baali babaraan lɛa kun ka Davida nɛ, bɛn man ka kɛn nɛ: Zosɛbu-Basebɛti mɛn bɛ́ boe Akimonii kiwi. Zia-baali dadaran lɛn nyɛɛnaandɛnaa goon ne. Etnii tɔrɔ nɛ, ǹ tá bii Adinoo, a din lɛ na á min biɛ kiwisi dɛ zia goon gɔ́ɔ̃ nɛ.

⁹Bɛ kio n ka Eleyazaara nɛ. Dodo mɛn bɛ́ Awokii a tanlɛ min lɛa, bɛa nɛgiĩ ni. Zia-baali babaraa sɔɔ mɛn goã kun ka Davida nɛ, bɛn lɛn goon ne. Ǹ kɔn pinaa, Filisiti minin nə́ n sɔkɔn ziabaa taman yii. Davida laanka a tá-kun wolen lɛn nə́ yoo da Filisiti minin lɛn ganaa. Bɛa pinaa lɛ nɛ, Izirayeli minin zia-baalin lɛn nə́ wusoo ka ǹ kio ne.

¹⁰Sɛnɛ, Eleyazaara lɛ sɛ́ golee giĩbaa la, á Filisiti minin lɛn dɛ yǎa a gɔn laa á dama a gɔya sa ganaa. Dɛnaa Lawa sii gole zɛnaa ǹ nɛ bɛa pinaa kɛ nɛ, á ǹ si Filisiti minin lɛn la. Eleyazaara a woo kio ne, zaman lɛ wusoo a kio, ǹ nə́ daa geren lɛn mànan goa.

¹¹Asɛ kio n ka Agee a nɛgiĩ Saamaa nɛ, boe Arara kiwi. Ǹ kɔn pinaa, Filisiti minin lɛn nə́ n sɔkɔn Leyii kiwi. Wuru goon na á goã walan, a gɔ́ɔ̃ tumaa n zii. Izirayeli minin lɛn nə́ baa si Filisiti minin lɛn nyɛɛnɛ.

¹²Sɛnɛ, Saamaa sɛ́ golee bɛa wuru lɛ bii á n doa a li, á Filisiti minin lɛn dɛ. Dɛnaa Lawa sii gole zɛnaa bɛa pinaa kɛ nɛ, á ǹ kirisibaa nɛ.

¹³Ǹ kɔn pinaa, kaa-piɛ waáraa, min pɔsɔɔ mɛn goã Davida lɛduĩ, bɛn min sɔɔ daa dɔ a li Adulaamu a kele yala kɛ nɛ. A giala, Filisiti minin kɛn zia-baalin kɔnɔn man nə́ daa golee Refayimu a nyankɔrɔ basa kɛ nɛ.

¹⁴Davida na á goã a duru ǹ bǎã sonbore kɛ nɛ. Bɛa biikoo li, bɛ̀ Filisiti minin lɛn kɔnɔn dɔn tá doa-n Bɛtlehɛmu kiwi.

¹⁵Sii kɔn zɛnaa sii bɛ́ á goã Davida ganaa, á tɔ́n pɛ: «Mu yala mɛn bɛ́ Bɛtlehɛmu *kiwi a kiɛnlɛ-a, die n die woe bɛa mu sii, a da kɔ masɛ la, ma mi?»

¹⁶Bɛa zia-baali babaraa sɔɔ lɛ tɔ́n kiɛ̃ Filisiti minin giã ǹ bǎã lɛ-n ka pàã nɛ. Mu yala kɛ lɛ Bɛtlehɛmu kiwi a kiɛnlɛ-a, ǹ nə́ woo bɛ lɛ a mu si, ǹ nə́ daa kɔ Davida la. Sɛnɛ, a lɛ kɔ á mi wa. A na á mu lɛ kaa tán, á Dɛnaa Lawa gɔ nɛ.

¹⁷Á pɛ: «Dɛnaa Lawa, kɛa zɛnaa a taasiɛ din wɔlɔ á lui ni ma ganaa. A giala, minin kɛn lɛn ǹ nə́ n nyin kɔ ǹ nə́ woo, mu kɛ lɛ n goon ka ǹ dinin mà nɛ. Bɛ lɛ nɛ, á n piã a mi wa.» Zia-baali babaraa sɔɔ lɛ màn mɛn zɛnaa, a din nə ka kɛ nɛ.

¹⁸Zoabu mɛn bɛ́ Seruzaa a nɛgiĩ lɛa, bɛ dɔɔ̃ngiĩ Abisayii kɛ na á goã zia-baali pɔsɔɔ mìi la. Ǹ kɔn pinaa, a din na á ǹ zɔ́ɔn lɛn min biɛsɔɔ dɛ ka sɛmiɛ̃ nɛ. Bɛ lɛ na á toa á tɔ gole yɛ bɛa min pɔsɔɔ lɛ bii.

¹⁹Taãn nɛ á gugurubaa yɛ á la min pɔsɔɔ lɛ nɛ. A din na á goã ǹ mìi la. Sɛnɛ a dɔ min sɔɔ kɛ lɛ li wa.

²⁰Goon dɔ n ka Zozadaa a nɛgiĩ Benaazaa nɛ, ǹ di gole n zia-baali babaraa lɛa, boe Kabsɛli kiwi. Benaazaa sii dadara gigiã zɛnaa: A din na á Moabu a yàra min paa lɛ dɛ. Ǹ kɔn pinaa, nyan a mu da nyuù wɔ ganaa biikoo li, a din na á wɔ nyankɔrɔ goon ne, á yàra dɛ.

²¹A din dɔ na á Eziptin giĩ sasa gegere goon dɛ. A pinaa, sɛmiɛ̃ na á goã giĩ lɛ gɔn. Bàbàla na á goã Benaazaa sɛ gɔn. Á tele Eziptin giĩ lɛ ganaa, á ná a sɛmiɛ̃ lɛ baã á bɔ a gɔn, á dɛ ka a din a sɛmiɛ̃ lɛ nɛ.

²²Benaazaa sii mɛn zɛnaa, a din nə ka bɛ nɛ. Á tɔ gole yɛ bɛa min pɔsɔɔ lɛ bii.

²³Á gugurubaa yɛ á la bɛa min pɔsɔɔ lɛ nɛ, sɛnɛ a dɔ min sɔɔ kɛ li wa. Davida na á da kun ka a din lɛduə̃lin ni.

²⁴Min mɛnɛn dɔn nə goã bɛa min pɔsɔɔ kuru lɛ nɛ, ǹ tɔn nə́ ke: Zoabu ǹ dɔɔ̃ngiĩ Azayeli goã kunun ǹ ni, ka Dodo a nɛgiĩ Elanan kɛ nɛ boe Bɛtlehɛmu,

²⁵Saamaa laanka Elikaa nɛ boe Arodi,

²⁶Elisi ni boe Palti, Ikɛsi a nɛgiĩ Iraa nɛ boe Tekoa,

²⁷Abiezɛɛrɛ nɛ boe Anaatɔti, Mebunayii ni boe Usaa,

²⁸Salomɔn nɛ boe Awokii, Marayii ni boe Netofati,

²⁹Baanaa a nɛgiĩ Ɛlɛbu ni bɛ dɔ n boe Netofati, ka Ribayii a nɛgiĩ Itayii ni boe Gibeya Bɛnzamɛn tɔrɔn kɛn bii.

³⁰Benaazaa mɛn bɛ́ boe Piratɔn bɛ tá kunun ǹ ni, ka Idayii ni, boe Gaasi a mu gole basa kɛ nɛ,

³¹Abii-Albɔn nɛ boe Arabaa, Azimabɛti ni boe Barumu,

³²Eliabaa nɛ boe Saalbɔn ka Yasɛn a nɛgiĩ Zonaatan nɛ,

³³Saamaa nɛ boe Haraara, Sarara mɛn bɛ́ boe Araraa bɛa nɛgiĩ Ayiamu ni,

³⁴Aasibayi a nɛgiĩ Elifelɛti ni boe Makaati, Ayitofɛli ke boe Gilɔn, bɛa nɛgiĩ Eliamu ni,

³⁵Ɛtrayii ni boe Karmɛli, Parayii ni boe Arabu,

³⁶Natan a nɛgiĩ Yigali ni boe Sobaa, Banii ni boe Gaadi,

³⁷Amɔn tɔrɔ Selɛki ni, Narayii ni boe Beerɔti, bɛ na á goã Seruzaa a nɛgiĩ Zoabu a ziabaa ǹ mànan guĩ.

³⁸Iraa laanka Garɛbu ni boe Yietɛɛrɛ.

³⁹Ɛti tɔrɔ Urii ni. Ǹ tumaa a kaa kun min pɔsɔɔwensɔbaa.