Read Samo, Southern Sam2 5 Bible Online

Sam2 5 - Samo, Southern bible

Sam2 5

¹Izirayeli tɔrɔn lɛn tumaa daa dɔ Davida li Ebrɔn, ǹ nə́ pɛ nɛ: — Wɔsɛn nə́ ke, wɔ nə n din wɔ taãn-taãnan lɛa.

²Haalɛ bibi dinin, bɛ̀ Sayulu bɛ́ wɔa kii lɛa, n din Davida na á goã miɛ̃ wɔsɛn Izirayeli minin zia-baalin nyɛɛnɛ, bɛ̀ n soo ǹ ne, bɛ̀ n nə n bɔyaa ǹ nɛ. Dɛnaa Lawa pɛ n nɛ dɔn dinin: «N din nə die giɛ maa zaman Izirayeli minin lɛn walan, n din nə die Izirayeli minin lɛn mìilandɛnaa biɛ.»

³Izirayeli minin lɛn min golen nə́ daa dɔ kii lɛ li Ebrɔn. Kii Davida lɛ kɔn la wɔ ǹ nɛ Ebrɔn, Dɛnaa Lawa yɔrɔ-a. Ǹ nə́ nyɔɔ kaa Davida mìi-n walan, ǹ nə́ bɔ ǹ nə́ koa Izirayeli minin lɛn kii lɛa.

⁴ Davida bɛ́ kii biɛ, bɛ̀ a lɛ̀ pɔsɔɔ nɛ. A na á kii baa lɛ̀ pusi gɔ́ɔ̃ nɛ.

⁵A bɛ́ Ebrɔn, a na á giã Zudaa minin mìi la lɛ̀ sɔbaa ka mui sɔrɔ. A bɛ́ Zeruzalɛmu, a na á giã Izirayeli minin tumaa laanka Zudaa minin mìi la yǎa lɛ̀ pɔsɔɔwensɔɔ.

⁶ Kii Davida laanka a minin lɛn nə́ woo Zebuzu kiwi minin kɛn gialaa Zeruzalɛmu. Ǹ dinin man nə́ goã giã-n gána lɛ nɛ. Ǹ nə́ pɛ Davida nɛ: «N gòã ba miɛ kànaa wa. A giala, yii tere-an laanka gɔ̀nàan dinin tá re n diɛ n lɛ.» Bɛ giala, mà Davida gòã ba miɛ kànaa wa.

⁷Davida *Siɔn kiwi a duru ǹ bǎã kaka kɛ kũ á si. A din lɛ nɛ ǹ tá bii "Davida a kiwi".

⁸Davida pɛ bɛa pinaa kɛ lɛ nɛ: «Bɛ̀ min mɛn tá li a Zebuzu minin kɛn dɛ, ǹ dɛnaa doamaa nɛ a dɔ mu a baa si ǹ bǎã kɛ nɛ. Min mɛn bɛ́ re boe maa zɔ́ɔ yii tere-an kɛn laanka gɔ̀nàan kɛn la, áh!» Bɛ lɛ na á toa ǹ tá pii: «Yii tere-a laanka gɔ̀nàa ba re we kion lɛ-n wa.»

⁹Davida giã bɛa duru ǹ bǎã kaka kɛ lɛ nɛ, á bii "Davida a kiwi". Bɛ kio, Davida kionən dɔdɔ á ná a lɛnpɛnɛ nɛ, a saa Miiloo bǎã kɛ ganaa, a wo kiwi lɛ a gɔ́ɔ̃ yaa.

¹⁰Màn na á goã miɛ Davida pàã li woe miɛ̃. Dɛnaa Lawa mɛn bɛ́ pàã tumaa dɛnaa Lawa lɛa, bɛ́ goã kun ni.

¹¹Tiirin kii Iramu minin dia Davida la ka da kaka kɛa gɔn nɛ, ka da-sɛlɛlin ni, ka kɔlɔ-sɛlɛlin ni kungɔn dɔ ǹ wɔ lɛa, ǹ nə́ kii kion dɔ ǹ nə́ kɔ Davida la.

¹²Bɛa biikoo li, Davida dɔ̃ mà Dɛnaa Lawa din na á ná asɛ koa kii lɛa Izirayeli minin lɛn mìi la, á gugurubaa wɔ asɛ a kiibaa lɛ nɛ, a din a zaman, Izirayeli minin lɛn taman yii.

¹³Davida bɛ́ á bɔ Ebrɔn á daa Zeruzalɛmu, á san kɔsɔn bɔ walan, á lɔn dɔn goa. Bɛn dɔn nə́ wusoo ǹ nə́ nɛgiĩn laanka nɛlɔn yɛ Davida wɔn lɛa.

¹⁴A nɛnyaanan mɛnɛn yɛ Zeruzalɛmu, bɛn tɔn nə́ ke: Samuwa nɛ, Sobabu ni, Natan nɛ, Salomɔn nɛ,

¹⁵Ziibaara nɛ, Elisuwa nɛ, Nefɛgi ni, Zafia nɛ,

¹⁶Elisamaa nɛ ka Elifelɛti ni.

¹⁷Filisiti minin nə́ ma, mà ǹ nə́ Davida bɔ ǹ nə́ koa kii lɛa Izirayeli minin lɛn mìi la. Filisiti minin lɛn tumaa yoo, ǹ nə́ woo ga Davida li. Davida bɛ́ a na a boo ma, á woo n duru duru ǹ bǎã kaka kɛ nɛ.

¹⁸Filisiti minin lɛn bɛ́ ǹ nə́ dɔ, ǹ nə́ n nyɔmaa Refayimu tɔrɔn nyankɔrɔ basa kɛ nɛ.

¹⁹Davida nɔ̀n da Dɛnaa Lawa la kɛnɛn: «Ma á boe la ma wo Filisiti minin lɛn gialaa? N tá re ǹ we ma gɔn?» Dɛnaa Lawa Davida lɛ si: «Hiĩ, woo, ma á re Filisiti minin lɛn we n gɔn.»

²⁰Davida woo Baali-Perasimu, á boo Filisiti minin lɛn la walan. Davida tɔ́n pɛ: «Dɛnaa Lawa na á masɛ a zɔ́ɔn sawaa á ǹ bɔ ma nyɛɛnɛ ka tà na á toɛ̃ a mu n baa sii.» Bɛ lɛ na á toa ǹ nə́ tɔ́n bɛa bǎã lɛ tɔ kɔ: "Kaa ǹ bii ni ǹ bǎã".

²¹Ǹ nə́ ǹ dìn toa tán walan, Davida laanka a minin lɛn nə́ ǹ goa, ǹ nə́ woo ǹ ne.

²²Biikoo kɔsɔ-a doo, Filisiti minin lɛn nə́ woo n nyɔmaa Refayimu a nyankɔrɔ basa lɛ nɛ.

²³Davida nɔ̀n da Dɛnaa Lawa la doo, Dɛnaa Lawa ná a lɛ si: «N baran golee ǹ nyɛɛnɛ n zia baa ǹ ganaa wa. N pɛnɛ ǹ kio li, n tá re doe ǹ ganaa nyuunun too ǹ dan kɛn yɔrɔ-a.

²⁴Bɛ̀ ń bìn diɛ ma dan lɛn mìi ni ǹ mɛn waáraa ka gòã wuu n boe, bɛa biikoo li, n nanaa. A giala, masɛ Dɛnaa Lawa din ni má mɛ n nyɛɛnɛ, má n zia biɛ Filisiti minin lɛn ganaa.»

²⁵Dɛnaa Lawa màn mɛn laa Davida ganaa, Davida zɛnaa miɛ̃. Á boo la á Filisiti minin lɛn dɛ, a saa Gebaa kiwi ganaa yǎa Gezɛɛrɛ kiwi lɛkoro-a.