Read Samo, Southern Sam2 7 Bible Online

Sam2 7 - Samo, Southern bible

Sam2 7

¹Davida a zɔ́ɔn mɛnɛn tumaa goã a lɛnpɛnɛ, Dɛnaa Lawa ná a kanbaa bɛn tumaa ganaa, á là nyantoro kɔ la. Davida giã a kii kion lɛ nɛ.

²Ǹ kɔn pinaa, á pɛ Lawa a boo gii-dali Natan nɛ: «Ga, masɛ bɛ́ giã-n kion mɛn nɛ, maǹ nə́ bɛ dɔ ka da kaka gɔn nɛ. Sɛnɛ, Lawa a *lɛ kɔ kɔn la ǹ goo kɛ bɛ́ koa-n bǎã mɛn nɛ, mɔnaa kion ne. Ma n wàa taasɛ?»

³Natan tɔ́n pɛ kii lɛ nɛ: «Ń bɛ́ li n sii mɛn tumaa zɛnaa, wo zɛnaa, a giala, Dɛnaa Lawa tá kunun n ni.»

⁴Sɛnɛ, a din pinaa tèlò-n, Dɛnaa Lawa boo da ka Natan nɛ á pɛ nɛ:

⁵— Wo pɛ maa dí-nyali Davida nɛ mà masɛ Dɛnaa Lawa n kɛ pii: «Nsɛ Davida bie re kion doe n kɔ ma la ma giã-n wa.

⁶A giala, ma Izirayeli minin lɛn waa ǹ mɛn pinaa má ǹ bɔ Ezipti, a da kaa pelo lɛ, masɛ bin tɔn kion baa maa giã ǹ bǎã lɛa wa. Sɛnɛ, man má goã mɔnaa kion giulun kɔn yɛ ka Lawa nɛ ǹ kion kɛ nɛ má n Izirayeli minin lɛn diɛ zii.

⁷Ma goã kun ka Izirayeli minin lɛn nɛ biikoo mɛn tumaa li, má minin bɔ, má ǹ koa ǹ mìi la ǹ nyɛɛnaan-bɔlen lɛa, ma bin bɛ kɔn zɛ̀rɛ baa má pɛ nɛ máa wàa na á baa kion dɔ ka da kaka gɔn nɛ á kɔ masɛ la wa.»

⁸Bɛ lɛ nɛ, wo pɛ maa dí-nyali Davida nɛ mà masɛ Dɛnaa Lawa mɛn bɛ́ pàã tumaa a Dɛnaa lɛa, mà masɛ n kɛ pii: «Ma din ni má n bɔ má n bɔ tɔɔn kio tɔɔn lɛduə̃ ǹ bǎã nɛ, màn mɛn bɛ́ toɛ n masɛ a zaman, Izirayeli minin lɛn mìilandɛnaa baa.

⁹N wo bǎã mɛn tumaa nɛ, masɛ goã kunun n ni má n zɔ́ɔn tumaa dɛ má ǹ bɔ n nyɛɛnɛ. Má tɔ gole kɔ n la ka kanaa a min dadaran kɛn wɔ bɛ́ lɔn.

¹⁰Ma din ni má bǎã kɔ maa zaman Izirayeli minin lɛn la. Ma á re ǹ gòãn woe tán walan, màn mɛn bɛ́ toɛ ǹ giã a nɛ, sii kɔn ná a nyɛ́ɛ diɛ ǹ ganaa wa. Min baraan kɛn ba re wusii doo ǹ fuu nyaa ǹ nɛ ka lɛlɛ wɔ kɛ bɛ́ lɔn wa,

¹¹biikoo mɛn lɛ á ke masɛ sii yɔrɔ-bɔlen bɔ má ǹ koa maa zaman Izirayeli minin lɛn mìi la. Masɛ din ni má n kanbaa n zɔ́ɔn tumaa ganaa, má là nyantoro kɔ n la. Dɛnaa Lawa mà ma pɛ n nɛ kɛnɛn: Masɛ Dɛnaa Lawa din nə die n kion koɛ.

¹² Bɛ̀ n lɛawaan lɛ pã ǹ mɛn waáraa n papaã n nə́ n bɔ kanaa, ma á re n din gɔ́ɔ̃gɔ́ɔ̃ ǹ nɛ goon boe ma koa kii lɛa n bǎã nɛ. Ma á re pàã we a kiibaa lɛ nɛ.

¹³Bɛ lɛ n die kion doe a masɛ tɔ da la. Man die bɛ lɛ koɛ kiibaa la yǎa duduu.

¹⁴ Ma á re n biɛ a díi lɛa, a dɔ á re n biɛ maa nɛ lɛa. Bɛ̀ á sii baraa zɛnaa, man die minin biɛ a doroo ǹ bàlà lɛa, ma minbuiinin kaa a ganaa ǹ dɔlɔ bɔ a ganaa.

¹⁵Sɛnɛ, Sayulu mɛn nə́ ke ma nyɛnaa má bɔ n nyɛɛnɛ, ma a re maa bǐɛ̃ kɛ nyɛnɛɛ ma bɔ li ka ma bɛ́ má nyɛnaa má bɔ Sayulu li lɔn wa.

¹⁶ N kion laanka n kiibaa lɛ n die goɛ̃ yǎa duduu. N kii dankan lɛ gɔ́ɔ̃ kooro á die goɛ̃ duduu wa.»

¹⁷Natan boo mɛn tumaa ma Lawa li, a sii mɛn tumaa yɛ, a na á boo da Davida nɛ, á kɔnpɛ ka bɛ lɛ nɛ.

¹⁸Bɛ kio, kii Davida daa giã tán Dɛnaa Lawa yɔrɔ-a á pɛ: — Dɛnaa Lawa, n din ni maa Lawa lɛa. Bɛ̀ bɛ bie wa, masɛ n wàa lɛa? Masɛ a kion minin man wàa lɛa? Ma bɛ́ bǎã mɛn nɛ pelo, ma bie má sii kɔn zɛnaa n nɛ, ń tɔn daa ka ma-n kànaa wa.

¹⁹Dɛnaa Lawa ganaa, bɛ dɔ din na á goã tɔn kiɛɛrɛ taãn-taãnɛ n din yii li. Ń masɛ a kion dɔ a sii toa nyɛɛn sɔsɔɔ, ń ná a boo da ma nɛ. Dɛnaa Lawa, á ke ń bɛ dɔ nyaa masɛ din minbuiin nɛ kɛ nɛ.

²⁰Dɛnaa Lawa, masɛ Davida n boe la ma wàa mɛn boo da n nɛ doo kəni, a giala, ma nə n dí-nyali lɛa, n din tá ma doɛ̃.

²¹N din boo mɛn da, ma sii dɔ bɛ́ kɔɔ̃nɛ n ganaa lɔn, bɛ lɛ na á toa ń sii gole kɛ zɛnaa ń nyaa ma nɛ.

²²Dɛnaa Lawa, n din ni maa Lawa lɛa, n din nə gole. Wɔsɛn nə màn mɛn tumaa ma ka wɔ too ne, bɛ n ka kɛ nɛ: «N miã banban, Lawa kɔsɔ banban á kiɛ̃ n din la wa.»

²³ Kanaa kɛ gɔ́ɔ̃ nɛ, tɔrɔ kɔsɔ mɛn goon na a tan ka n din a zaman Izirayeli minin kɛn bɛ́ lɔn? Izirayeli tɔrɔn kɛn lɛn manɛ, n din woo ǹ waa ń nə́ ǹ bɔ bɛ̀rɛbaa nɛ, ń nə́ ǹ baa n din a zaman lɛa. N din ni ń sii gole kɛ zɛnaa ǹ nɛ ka kaãbaa ǹ sii dadaran kɛn nɛ ń nə́ ǹ tɔ bɔ nɛ. N nə n zaman mɛn lɛ si Ezipti minin bɛ̀rɛbaa la, bɛa gána kɛ laanka ǹ dìn la, tɔrɔ mɛn nə n zoɛ̃ kɔn ka bɛ nɛ?

²⁴N din ni ń nə́ n zaman Izirayeli minin lɛn koa, màn mɛn bɛ́ toɛ, ǹ goã n din a zaman lɛa yǎa duduu. N din Dɛnaa Lawa n nə́ ǹ Lawa baa.

²⁵Dɛnaa Lawa, n din mɛn bɛ́ masɛ a Lawa lɛa, sisia kəni, n boo mɛn da masɛ laanka maa kion minin wɔ paǹ li, bɛ toa a bǎã-n duduu, n zɛnaa ka ń bɛ́ ń ná a lɛ kɔ lɔn.

²⁶Minbuiinin die ǹ nə́ n tɔ bɔ duduu ǹ pɛ: «Dɛnaa Lawa mɛn bɛ́ pàã tumaa a dɛnaa lɛa, a din lɛ n Lawa lɛa Izirayeli minin lɛn mìi la.» A din die a masɛ Davida tɔrɔ koa a din yɔrɔ-a.

²⁷A giala, n dinmaa Dɛnaa Lawa, pàã tumaa a dɛnaa, Izirayeli a Lawa na á n din nyaa masɛ nɛ, ń pɛ ma nɛ mà n din nə die maa kion koɛ. Bɛ lɛ n ke, n dí-nyali lɛ foo tãbaa yɛ, á n bɛa nyankɔ we n lon.

²⁸Dɛnaa Lawa, n din nə Lawa lɛa, n boon lɛn man taãn lɛa. N din ni ń lɛ kɔ masɛ la ka bɛa sii sonbore kɛ nɛ.

²⁹Kanna kəni, barka da masɛ a kion minin lɛn ganaa, màn mɛn bɛ́ toɛ, ma tɔrɔn lɛn nə goã kiibaa la n din yɔrɔ-a yǎa duduu. Dɛnaa Lawa, n din bɛ́ n maa Lawa lɛa, n din bɛ́ n nə n lɛ kɔ, n din die n barka da maa kion lɛ ganaa, yǎa duduu.