Read Samo, Southern Sam2 9 Bible Online

Sam2 9 - Samo, Southern bible

Sam2 9

¹ Ǹ kɔn pinaa, Davida nɔ̀n da: «Min tá tɔn yii Sayulu a kion a yii n koo má n boe la ma bǐɛ̃ zɛnaa nɛ, Zonaatan taman yii?»

²Sayulu a kion minin lɛn bɛ̀rɛ goon goã, a tɔ n Siibaa. Ǹ nə́ bɛ kũ ǹ nə́ woo-n Davida a piɛ. Kii nɔ̀n da la: N din lɛ tɔ n Siibaa ya? Á kii lɛ si mà asɛ á ke.

³ Kii lɛ tɔ́n nɔ̀n da: «Min na a ba Sayulu a kion lɛ-n doo, masɛ bǐɛ̃ zɛnaa nɛ, a kaa Lawa foo la wa?» Siibaa tɔ́n pɛ kii ni: «Zonaatan a nɛgiĩ goon tá tɔn a tan, ǹ mɛn lɛ bɛ́ a gòãn paanan nə́ ziziɛ̃.»

⁴Kii lɛ nɔ̀n da la mà a n maa? Siibaa tɔ́n pɛ kii ni: A tá Amiyeli a nɛgiĩ Makiiri a kion Lodebaara kiwi.

⁵Kii Davida minin dia, mà ǹ wo kũ Amiyeli a nɛgiĩ Makiiri a kion Lodebaara ǹ da nɛ.

⁶Sayulu a nɛ Zonaatan a nɛgiĩ Mefibosɛti woo á dɔ Davida li. Á na á kaa tán a giulun, á n mìi zuməə tán. Davida ná a tɔ bíi: «Mefibosɛti!» Á Davida lɛ si: «Ma á ke.»

⁷Davida tɔ́n pɛ nɛ: «N baran nyɛ́ɛ goon baa wa. Man giɛ li ma bǐɛ̃ zɛnaa n nɛ, n di Zonaatan lɛ taman yii. Bǎã mɛn tumaa bɛ́ n digolo Sayulu wɔ lɛa, man die wusii ma bɛ tumaa kɔ n la. N dinmaa kɛ n die màn bii kun ka masɛ nɛ biikoo tumaa li.»

⁸Mefibosɛti kaa tán a giulun á n mìi zuməə tán, á pɛ nɛ: «Masɛ nə n bɛ̀rɛgiĩ lɛa. Man wàa lɛa kəni, n tɔn ga masɛ gin gere kɛ miã walan?»

⁹Sɛnɛ, kii Davida Sayulu a bɛ̀rɛgiĩ Siibaa bii á pɛ nɛ: «Màn mɛn tumaa bɛ́ Sayulu laanka a kion minin tumaa wɔ lɛa, má a tumaa kɔ maa dɛnaagiĩ a nɔ̀ɔn Mefibosɛti la.

¹⁰N din ni, n nɛgiĩn ni ka n bɛ̀rɛgiĩn ni, ka á re tán kɔsɛ, bɛ̀ màn mɛn yɛ a nɛ ka da bɛ kɔ kaa dɛnaagiĩ a nɛgiĩ lɛ la, a boo la a n din too ne. Ka bɛ tumaa nɛ, n dɛnaagiĩ a nɛgiĩ Mefibosɛti á die màn bii kun ka masɛ nɛ biikoo tumaa li.» Bɛ á zɛnɛɛ bɛ̀ nɛgiĩ fulusooro n Siibaa lon, ka bɛ̀rɛgiĩ fuə ne.

¹¹Siibaa tɔ́n pɛ kii ni: «Dɛnaagiĩ, n màn mɛn tumaa pɛ masɛ nɛ, ma á re bɛ zɛnɛɛ.» Ka n pɛ lɔn, Mefibosɛti lɛ á die goɛ̃ bɛ̀ a màn bii kunun n ni, ka n pɛ mà n din a nɛgiĩ goon ne.

¹²Mefibosɛti a nɛgiĩ tɔntɔraa goon goã a tɔ n Miikaa. Min mɛn tumaa dɔ goã Siibaa a kion, bɛn tumaa na á goã Mefibosɛti a dí-nyalin lɛa.

¹³Mefibosɛti na á goã simii a gòãn paanan la, bɛ lɛ na á toa á goã giã-n Zeruzalɛmu, màn mɛn bɛ́ toɛ, a boo la a màn bii kun ka kii ni biikoo tumaa li.