Read Samo, Southern Kiin1 14 Bible Online

Kiin1 14 - Samo, Southern bible

Kiin1 14

¹Bɛa biikoo lɛ li, busu Zeroboamu a nɛgiĩ Abiya kũ.

²Zeroboamu tɔ́n pɛ a lɔ nɛ: «Ma nə n nyankoe, yoo n wo Siiloo. N nə n giã ǹ gɔn bɔyaa n tɔn woo, màn mɛn bɛ́ toɛ minin baran dɔ̃ mà maa a lɔ nə n nɛ wa. Lawa a boo gii-dali Ayia n giã-n Siiloo lɛ nɛ. A din Ayia lɛ na á goã á pɛ ma nɛ mà ma á die zaman kɛ lɛ a kii biɛ.

³N die n wo ka buuru mìi fù ni n gɔn, ka takɔlɔ laanka zoo dɔn goon ne, n kɔ la. Sii mɛn bɛ́ re wɔa nɛginin lɛ yii a tá re pii n ni.»

⁴Zeroboamu a lɔ lɛ dɔ́ zɛnaa miɛ̃. Á yoo á woo Siiloo Ayia a piɛ. A da yaa, Ayia yii goã wɔlɔ yii doo wa, zizi kɔ taman yii.

⁵Sɛnɛ Dɛnaa Lawa goã á pɛ Ayia nɛ: «Á ke, Zeroboamu a lɔ tá zii la die, a n die nɔ̀n diɛ n la ka a nɛginin busulə a sii ni. N die n pɛ nɛ kɛnɛn ka kɛnɛn. Lɔ lɛ bɛ́ re doe, a tá re n din biɛ ka min kɔsɔ nɛ.»

⁶Sɛnɛ Ayia bɛ́ á lɔ lɛ gòã wuu ma lɔn gɔrɔ die kiɛnlɛ-a biikoo mɛn li, á pɛ: — Da wɔ, Zeroboamu a lɔ! Wàa na á baa n tá n din biɛ ka min kɔsɔ nɛ? Má boo guguru ma n wɔ lɛa.

⁷Woo, n pɛ Zeroboamu ni, mà Izirayeli a Lawa, Dɛnaa Lawa n kɛ pii: «Masɛ n má n bɔ maa zaman bii má n koa Izirayeli a zaman a kii lɛa.

⁸Man má kiibaa lɛ si Davida a sumu minin la, má kɔ n la. Sɛnɛ n nə n baa ka maa dí-nyali Davida bɛ́ lɔn wa. Davida na á maa gɔn waa ǹ boon tamaa, á kɔ ma lɛ, ka a foo din tumaa nɛ, a sii zɛnaa tumaa n kiɛ ma foo la.

⁹Min mɛnɛn tumaa kiɛ̃ n nyɛɛnɛ, ń dí baraa nya á la bɛn manɛ. Ń yoo n nə n daa guguru kɔ ǹ mànan la n nə ǹ zɛnaa ka màn nyínin ni fɔlɔ lɛa, ń ma foo busu. N ma dinmaa lɛ sɛ zũ kio.

¹⁰ Bɛ lɛ n ke, masɛ n die koe diɛ Zeroboamu a sumu minin mìi ni. Man die giĩn dii ma ǹ bɔ Zeroboamu a sumu-n, bɛ̀rɛn nɛ ka min mɛnɛn bɛ́ ǹ ba bɛ̀rɛn lɛa wa Izirayeli gána nɛ. Man die n sumu papaɛ̃ lenlen, ka min bɛ́ yisi wɔrɛɛ lenlen lɔn ka mɛsɛ nɛ.

¹¹Zeroboamu a kion minin mɛnɛn yii bɛ́ re giɛ̃ kiwi, ginin tá re bɛn soɛ̃, a kion minin mɛnɛn yii bɛ́ re giɛ̃ don, bàanan tá re ǹ gere mui, a giala Dɛnaa Lawa na á boo da.»

¹²Sisia, n din sɛ yoo n wo piɛ. N gòã bɛ́ re miɛ kiwi lɛ-n lɔn gɔrɔ, nɛnyaan lɛ á die giɛ̃.

¹³Izirayeli minin tumaa tá re a gɛ̀ koɛ, ǹ na a gere bĩ. Sonbore, a dinsɔɔ̃n n Zeroboamu a kion min lɛa, a gere n die n diɛ yala-n. A giala, a dinsɔɔ̃ n Zeroboamu a kion min lɛa a sii n siĩni, Izirayeli a Lawa, Dɛnaa Lawa yii li.

¹⁴Dɛnaa Lawa tá re kii koɛ Izirayeli mìi la, bɛa kii lɛ n die Zeroboamu a kɛbɔlɔ kiɛ. Bɛ lɛ a yɔrɔ yɛ-n kɛ-n pelo dinin.

¹⁵Dɛnaa Lawa tá re dɔlɔ boe Izirayeli gána ganaa, a tá re bìn diɛ ka kɔ̀buu bɛ́ bìn diɛ lɔn. Dɛnaa Lawa n die tán sonbore kɛ kuĩ a si Izirayeli minin la, tán mɛn lɛ bɛ́ á kɔ ǹ digolon la. A tá re ǹ sawɛɛ a ǹ kaa Efrati tà kɛ kio, a giala, ǹ nə́ dì gɔnɔn zɛnaa guguru kɔ ǹ mànan lɛa, ǹ nə́ wɔ Dɛnaa Lawa lon.

¹⁶Zeroboamu sii baraan mɛnɛn zɛnaa, á Izirayeli minin dɔn kaa a zɛnaa ganaa, Dɛnaa Lawa n die n là boe Izirayeli minin ganaa bɛ lɛ taman yii.

¹⁷Bɛ kio Zeroboamu a lɔ lɛ yoo á woo, á dɔ Tirsaa kiwi. A gòã mɛ kion biikoo mɛn waáraa, nɛginin lɛ gã.

¹⁸Ǹ ná a gere bĩ, Izirayeli minin tumaa ná a gɛ̀ koa ka Dɛnaa Lawa goã á ná a boo gii-dali Ayia lɛ da a pɛ ganaa lɔn.

¹⁹Zeroboamu sii gialakunun mɛnɛn zɛnaa, ziabaa laanka kiibaa wɔ paǹ li, bɛ yii tá kiɛ̃ nɛ sɛ́wɔ kɛ nɛ boo diɛ Izirayeli minin kiibaa wɔ gɔn la.

²⁰Zeroboamu ná á lɛ̀ fuəwenpaa zɛnaa pàã la, á tɔ́n gã. A bɛ́ á gã, a nɛgiĩ Naadaabu na á pàã saa a bǎã nɛ.

²¹Salomɔn a nɛgiĩ, Roboamu kii baa Zudaa gána nɛ. A bɛ́ kii lɛ biɛ bɛ́ a lɛ̀ pusi ka goon ne. A na á kiibaa zɛnaa lɛ̀ fulusɔbaa Zeruzalɛmu kiwi, kiwi mɛn lɛ bɛ́ Dɛnaa Lawa ná a yii gɔ̀gɔ́ɔ̃ Izirayeli a bǎãn tumaa bii, á n tɔ da la. Roboamu ǹ dan tɔ na á goã Naamaa, Amɔn tɔrɔ nɛ.

²²Sii mɛn bɛ́ baraa Dɛnaa Lawa yii li, Zudaa minin nə́ bɛ zɛnaa. Ǹ sii baraan mɛnɛn zɛnaa, bɛn nə́ Dɛnaa Lawa da miãgoã bɔ ganaa á la sii baraan kɛn tumaa nɛ, ǹ digolon nə́ zɛnaa.

²³ Ǹ dɔn man nə́ wúlu bɔ ǹ bǎãn doa, tíĩn ni, bìbìn ni, tentenen sɔsɔrɔ tumaa la, luu buruu bɛ́ da mɛn tumaa la, ka bɛn giulun ni, guguru kɔ ǹ wɔn lɛa.

²⁴ Wo dìn la ǹ kɔrɔbaa-zɛnaalin dinin nə́ goã gána lɛ nɛ. Dɛnaa Lawa goã á tɔrɔn mɛnɛn loo á Izirayeli minin kaa ǹ bǎã nɛ, bɛn nə goã sii bɔbɔnɛɛ mɛn tumaa zɛnɛɛ, Zudaa minin lɛn dɔn nə́ goã bɛn zɛnɛɛ.

²⁵ Roboamu a kiibaa lɛ a lɛ̀ soorobaa ǹ wɔ, Ezipti gána a kii Siikaaki yoo Zeruzalɛmu ganaa ka zia nɛ.

²⁶ Gɔn mànan mɛnɛn nə goã Lawa a kion lɛ laanka kii a kion ne, á bɛn yii goa ka lenlen. Kii Salomɔn goã á goóron mɛnɛn zɛnaa ka sana nɛ, á bɛn dɔn dininmaan lɛn goã.

²⁷Kii Roboamu lɛ tɔ́n goóron zɛnaa ka zan nɛ, á ǹ kaa bɛa sana goóron lɛn bǎã nɛ. Min mɛnɛn nə goã kii a kiɛnlɛ-lɛduə̃lin nyɛɛnaandɛnan lɛa, á ǹ gama walan sii toa bɛn gɔn.

²⁸Bɛ̀ kii lɛ á woe Dɛnaa Lawa a kion lɔn, bǎã-lɛduə̃lin lɛn man nə́ goã bɛa goóron lɛn guĩ ǹ gɔn. Kion kɔn tan bǎã-lɛduə̃lin lɛn wɔ lɛa, maǹ nə́ goã ǹ bɔyɛɛ, bɛ̀ ǹ da góoron lɛn kaa bɛa kion lɛ nɛ.

²⁹Roboamu sii gialakunun mɛnɛn zɛnaa, a màn mɛn din tumaa zɛnaa, bɛ yii ta kiɛ̃ nɛ sɛ́wɔ kɛ nɛ boo diɛ Zudaa kiin wɔ gɔn la.

³⁰Roboamu laanka Zeroboamu na á goã kɔn gialaa ka zia-n miɛ̃.

³¹Roboamu gã, ǹ nə ǹ digolon bĩ yala mɛn nɛ, ǹ ná a dɔ bĩ walan "Davida a kiwi". Roboamu ǹ dan tɔ na á goã Naamaa, Amɔn tɔrɔ nɛ. Roboamu a nɛgiĩ Abiyamu kii baa a bǎã nɛ.